ICC Rankings | ఐసీసీ ర్యాంకింగ్స్‌లో భారత బౌలర్ల జోరు.. ఏకంగా 60 స్థానాలు ఎగబాకిన గుర్నూర్

ICC Rankings | న్యూజిలాండ్‌తో జరుగుతున్న వన్డే సిరీస్‌లో భారత బౌలర్లు అదరగొడుతున్నారు. మైదానంలో వికెట్ల వేటతో ఆకట్టుకుంటున్న టీమిండియా బౌలర్లకు తాజాగా ఐసీసీ ర్యాంకింగ్స్‌లోనూ మంచి గుర్తింపు లభించింది. న్యూజిలాండ్‌తో తొలి రెండు వన్డేల్లో ప్రదర్శించిన ప్రతిభతో భారత బౌలర్లు ర్యాంకింగ్స్‌లో పురోగతి సాధించారు. యువ ఫాస్ట్ బౌలర్ గుర్నూర్ బ్రార్ ఏకంగా 60 స్థానాలు ఎగబాకి 48వ ర్యాంకుకు చేరాడు. స్పిన్ ఆల్‌రౌండర్ అక్షర్ పటేల్ 23 స్థానాలు మెరుగుపరుచుకుని 21వ స్థానానికి చేరుకోగా.. ఎడమచేతి వాటం పేసర్ అర్ష్‌దీప్ సింగ్ 11 స్థానాలు ఎగబాకి సంయుక్తంగా 31వ ర్యాంకును దక్కించుకున్నాడు.

గుర్నూర్‌కు జంప్

న్యూజిలాండ్‌తో వన్డే సిరీస్‌లో గుర్నూర్ బ్రార్ తన బౌలింగ్‌తో ప్రత్యేకంగా ఆకట్టుకుంటున్నాడు. ఇప్పటివరకు జరిగిన రెండు మ్యాచ్‌ల్లో ఏడు వికెట్లు పడగొట్టి సిరీస్‌లో అత్యధిక వికెట్లు తీసిన బౌలర్‌గా కొనసాగుతున్నాడు. ఈ ప్రదర్శనతో ఐసీసీ వన్డే బౌలర్ల ర్యాంకింగ్స్‌లో భారీ పురోగతి సాధించాడు. గతంలో టాప్‌-100లో కూడా చోటు దక్కించుకోలేకపోయిన గుర్నూర్.. ఏకంగా 60 స్థానాలు మెరుగుపరుచుకుని 48వ ర్యాంకుకు చేరడం విశేషం.

అక్షర్, అర్ష్‌దీప్‌ ర్యాంకులు మెరుగు

భారత స్పిన్ ఆల్‌రౌండర్ అక్షర్ పటేల్ కూడా ర్యాంకింగ్స్‌లో సత్తా చాటాడు. న్యూజిలాండ్‌తో వెల్లింగ్టన్‌లో జరిగిన రెండో వన్డేలో 28 పరుగులిచ్చి రెండు వికెట్లు పడగొట్టిన అక్షర్.. 23 స్థానాలు ఎగబాకి 21వ ర్యాంకుకు చేరుకున్నాడు. మరోవైపు తొలి వన్డేలో నాలుగు వికెట్లు తీసిన అర్ష్‌దీప్ సింగ్ 11 స్థానాలు మెరుగుపరుచుకుని సంయుక్తంగా 31వ స్థానాన్ని దక్కించుకున్నాడు. 2027 వన్డే ప్రపంచకప్‌కు ఏడాదిలోపు సమయం మాత్రమే ఉండటంతో భారత బౌలర్లకు ఈ ర్యాంకింగ్స్ పురోగతి మరింత ఉత్సాహాన్నిచ్చే అంశం. ఈ మెగా టోర్నీ దక్షిణాఫ్రికా, జింబాబ్వే, నమీబియా వేదికలుగా జరగనుంది. భారత బౌలర్లతోపాటు న్యూజిలాండ్ ఆటగాళ్లూ ర్యాంకింగ్స్‌లో మెరుగుదల సాధించారు. జాకబ్ డఫీ ఎనిమిది స్థానాలు ఎగబాకి సంయుక్తంగా 43వ ర్యాంకుకు చేరగా.. కైల్ జేమీసన్ ఏకంగా 24 స్థానాలు మెరుగుపరుచుకుని 60వ స్థానంలో నిలిచాడు.

టెస్టు ర్యాంకింగ్స్‌లో రహ్మత్ షా చరిత్ర

మరోవైపు అఫ్గానిస్థాన్ కెప్టెన్ రహ్మత్ షా టెస్టు ర్యాంకింగ్స్‌లో చరిత్ర సృష్టించాడు. ఐసీసీ పురుషుల టెస్టు ప్లేయర్ ర్యాంకింగ్స్‌లో ఏ విభాగంలోనైనా టాప్‌-10లో చోటు దక్కించుకున్న తొలి అఫ్గాన్ ఆటగాడిగా రికార్డు నెలకొల్పాడు. జింబాబ్వేతో షార్జాలో జరిగిన తొలి టెస్టులో 173 పరుగుల అద్భుత ఇన్నింగ్స్ ఆడిన రహ్మత్.. ఆరు స్థానాలు ఎగబాకి ఏడో ర్యాంకుకు చేరుకున్నాడు. ఇది అతడి కెరీర్‌లోనే అత్యుత్తమ ర్యాంకు. 33 ఏళ్ల రహ్మత్‌కు ఇది ఐదో టెస్టు సెంచరీ కాగా.. ఈ ఏడాది రెండోది కావడం విశేషం. ఈ క్రమంలో భారత కెప్టెన్ శుభ్‌మన్ గిల్, దక్షిణాఫ్రికా ఆటగాడు ఎయిడెన్ మార్క్‌రమ్, శ్రీలంక బ్యాటర్ కమిందు మెండిస్‌లను వెనక్కి నెట్టాడు. ఇటీవలే జింబాబ్వే, బంగ్లాదేశ్‌లతో జరిగిన ముక్కోణపు సిరీస్‌ను గెలుచుకున్న అఫ్గానిస్థాన్ వన్డే జట్టు ర్యాంకింగ్స్‌లోనూ ఆరో స్థానానికి చేరుకుంది. ఆ జట్టుకు ఇదే అత్యుత్తమ స్థానం కావడం గమనార్హం.

జింబాబ్వే, విండీస్ ప్లేయ‌ర్ల ర్యాంకులు..

టెస్టు ర్యాంకింగ్స్‌లో జింబాబ్వే సీనియర్ బ్యాటర్ క్రెయిగ్ ఎర్విన్ సైతం పురోగతి సాధించాడు. షార్జా టెస్టు రెండో ఇన్నింగ్స్‌లో అజేయ డబుల్ సెంచరీ సాధించిన అతడు తొమ్మిది స్థానాలు ఎగబాకి 48వ ర్యాంకుకు చేరాడు. బంగ్లాదేశ్, వెస్టిండీస్ మధ్య జరిగిన వరల్డ్ టెస్ట్ ఛాంపియన్‌షిప్ సిరీస్ ముగిసిన తర్వాత ఇరు జట్ల ఆటగాళ్ల ర్యాంకుల్లోనూ మార్పులు చోటుచేసుకున్నాయి. వెస్టిండీస్ బ్యాటర్ కవెమ్ హాడ్జ్ 12 స్థానాలు మెరుగుపరుచుకుని 52వ ర్యాంకుకు చేరగా.. అమీర్ జాంగూ 28 స్థానాలు ఎగబాకి 62వ స్థానాన్ని దక్కించుకున్నాడు. బంగ్లాదేశ్ ఆటగాడు తౌహిద్ హృదయ్ కూడా టాప్‌-100 వెలుపలి నుంచి ఏకంగా 60వ ర్యాంకుకు చేరాడు. బౌలర్ల జాబితాలో వెస్టిండీస్ ఆటగాడు జోమెల్ వారికన్ 11 స్థానాలు మెరుగుపరుచుకుని సంయుక్తంగా 19వ ర్యాంకుకు చేరుకున్నాడు. ఆల్‌రౌండర్ల జాబితాలోనూ నాలుగు స్థానాలు ఎగబాకి 31వ స్థానాన్ని దక్కించుకున్నాడు. జస్టిన్ గ్రీవ్స్ ఒక స్థానం మెరుగుపరుచుకుని సంయుక్తంగా ఎనిమిదో ర్యాంకుకు చేరాడు. ఇలా తాజా ఐసీసీ ర్యాంకింగ్స్‌లో భారత ఆటగాళ్లతోపాటు అఫ్గానిస్థాన్, జింబాబ్వే, వెస్టిండీస్ క్రికెటర్లూ తమ ప్రదర్శనతో మెరుగైన స్థానాలను సొంతం చేసుకున్నారు.