Regena Cassandrra | రీఎంట్రీకి రెజీనా మాస్టర్ ప్లాన్.. RXతో సాలిడ్ కమ్‌బ్యాక్‌కు రెడీ!

Regena Cassandrra | అందం, అభినయంతో దక్షిణాది ప్రేక్షకుల్లో మంచి గుర్తింపు తెచ్చుకున్న నటి రెజీనా కసాండ్రా ప్రస్తుతం ఓ సాలిడ్ హిట్ కోసం ఎదురుచూస్తున్నది. కెరీర్ ఆరంభంలోనే విభిన్నమైన పాత్రలతో తన నటనలోని ప్రతిభను చాటుకున్న ఈ భామకు గత కొంతకాలంగా సరైన విజయాలు దక్కడం లేదు. ముఖ్యంగా ఇటీవల విడుదలైన ‘విడాముయర్చి’ ఆశించిన ఫలితాన్ని అందుకోకపోవడంతో కొంత విరామం తీసుకున్న రెజీనా.. తాజాగా ‘మూకుత్తి అమ్మన్ 2’తో కోలీవుడ్‌లోకి తిరిగి అడుగుపెట్టింది. నవంబర్ 6న విడుదలైన ఈ సినిమాకు ప్రేక్షకుల నుంచి మిశ్రమ స్పందన లభించింది. అయితే ఇందులో రెజీనా నటనకు, ఆమె లుక్స్‌కు మంచి ప్రశంసలు దక్కాయి. సినిమా ఫలితం ఎలా ఉన్నా.. తన స్క్రీన్ ప్రెజెన్స్‌తో మరోసారి ప్రేక్షకుల దృష్టిని ఆకర్షించింది.

RXతో కొత్త ప్రయోగం

‘మూకుత్తి అమ్మన్ 2’ తర్వాత రెజీనా మరో ఆసక్తికరమైన ప్రాజెక్ట్‌కు గ్రీన్ సిగ్నల్ ఇచ్చింది. విశాల్ వెంకట్ దర్శకత్వంలో తెరకెక్కనున్న వుమెన్ ఓరియెంటెడ్ చిత్రంలో ఆమె ప్రధాన పాత్ర పోషించనున్నారు. ఆర్ఎస్ (RX) పేరుతో రూపొందుతున్న ఈ సినిమాను మైత్రీ మూవీ మేకర్స్, లోకేశ్ కనగరాజ్‌కు చెందిన జీ స్క్వాడ్ సంస్థలు సంయుక్తంగా నిర్మిస్తున్నాయి. ఇటీవలే ప్రత్యేక ఫస్ట్‌లుక్ పోస్టర్‌ను విడుదల చేస్తూ చిత్రబృందం ఈ ప్రాజెక్ట్‌ను అధికారికంగా ప్రకటించింది. పోస్టర్‌ను బట్టి చూస్తే ఇది మెడికల్ థ్రిల్లర్ నేపథ్యంలో తెరకెక్కనున్నట్లు తెలుస్తోంది. అయితే కథ, ఇతర నటీనటులు, సాంకేతిక బృందానికి సంబంధించిన పూర్తి వివరాలు వెల్లడించాల్సి ఉంది.

హిట్ కోసం ఎదురుచూపులు

రెజీనా కెరీర్‌ను పరిశీలిస్తే.. ‘మానగరం’ వంటి చిత్రాలతో నటిగా మంచి గుర్తింపు తెచ్చుకున్న‌ది. కేవలం గ్లామర్ పాత్రలకే పరిమితం కాకుండా నటనకు ఆస్కారమున్న పాత్రలను ఎంచుకుంటూ తనకంటూ ప్రత్యేకమైన గుర్తింపు సంపాదించుకున్న‌ది. తెలుగు, తమిళ భాషల్లోనూ పలు చిత్రాల్లో న‌టించింది. గత కొన్నేళ్లుగా ఆమె నటించిన సినిమాల్లో చాలా వరకు బాక్సాఫీస్ వద్ద ఆశించిన విజయాన్ని అందుకోలేకపోయాయి. హిందీలో చేసిన ప్రయత్నాలు కూడా పెద్దగా కలిసిరాలేదు. దీంతో నటిగా మంచి ప్రతిభ ఉన్నప్పటికీ విజయాల పరంగా వెనుకబడిపోయారనే అభిప్రాయాలు సినీ వర్గాల్లో వ్య‌క్త‌మ‌వుతున్న‌ది.

భారీ నిర్మాణ సంస్థల అండ

ఇప్పుడు ‘RX’ సినిమాతో రెజీనా మరోసారి తన సత్తా చాటేందుకు సిద్ధ‌మ‌వుతున్న‌ది. మైత్రీ మూవీ మేకర్స్‌కు తెలుగు, తమిళ చిత్ర పరిశ్రమల్లో మంచి గుర్తింపు ఉండగా.. లోకేశ్ కనగరాజ్‌కు చెందిన జీ స్క్వాడ్ కూడా ఈ ప్రాజెక్ట్‌లో భాగం కావడం ఆసక్తిని పెంచుతోంది. ఈ రెండు నిర్మాణ సంస్థల కలయిక సినిమాపై అంచనాలు పెంచుతోంది. మహిళా ప్రధాన పాత్రతో పాటు మెడికల్ థ్రిల్లర్ కథాంశం కావడం కూడా ఈ చిత్రానికి ప్రత్యేక ఆకర్షణగా మారనుంది. ఇప్పటివరకు చేసిన పాత్రలకు భిన్నంగా ‘RX’లో రెజీనా ఎలా కనిపించబోతున్నారు? ఈ సినిమా ఆమెకు కావాల్సిన విజయాన్ని అందిస్తుందా? అన్నది ఆసక్తికరంగా మారింది.