Damien Martyn | అత్యంత విష‌మంగా ఆస్ట్రేలియ‌న్ మాజీ క్రికెట‌ర్ ఆరోగ్యం.. ఐసీయూలో చికిత్స‌..

Damien Martyn | మాజీ ఆస్ట్రేలియా క్రికెటర్ డేమియన్ మార్టిన్ ఆరోగ్య పరిస్థితి అత్యంత విషమంగా మారింది. ఆస్ట్రేలియా తరఫున టెస్టులు, వన్డేల్లో ఆడిన మార్టిన్ ప్రస్తుతం అక్కడి బ్రిస్బేన్ హాస్పిటల్లో తీవ్రమైన అనారోగ్య సమస్యలతో చేరి ఐసీయూలో చికిత్స పొందుతున్నాడు. 54 ఏళ్ల మార్టిన్ ఇటీవల తీవ్ర అనారోగ్యానికి గురయ్యాడు. మెనింజైటిస్ కారణంగా అతను కోమాలోకి వెళ్లాడు. దీంతో అతని ఆరోగ్య పరిస్థితి విషమంగా మారింది. ఈ క్రమంలో అతనికి ఐసీయూలో చికిత్సను అందిస్తున్నారు. కాగా సహచర టీమ్ మేట్, మాజీ ఆసీస్ క్రికెటర్ డారెన్ లీమన్ సోషల్ మీడియా వేదికగా ఈ విషయంపై స్పందించారు. మార్టిన్ కుటుంబానికి అందరూ ధైర్యం చెప్పాలని, ఆయన ఆరోగ్యం కోసం అందరూ ప్రార్థించాలని కోరారు. మరో మాజీ సహచర ప్లేయర్, మాజీ వికెట్ కీపర్ బ్యాట్స్మన్ ఆడం గిల్ క్రిస్ట్ ఇదే విషయంపై మాట్లాడుతూ ప్రస్తుతం మార్టిన్ పరిస్థితి విషమంగా ఉందని, అయితే అతనికి కావల్సిన వైద్య సహాయం అందుతుందని, అత్యుత్తమమైన చికిత్సను అందిస్తున్నారని అన్నారు. మార్టిన్ భార్య అమాండా, ఆయన కుటుంబ సభ్యుల కోసం ఫ్యాన్స్ ప్రార్థిస్తున్నారని అన్నారు. కాగా మార్టిన్ తన కెరీర్లో అద్భుతమైన టెస్టు ప్లేయర్గా గుర్తింపు పొందాడు. అలాగే వన్డేల్లోనూ తనదైన ముద్ర వేశాడు. టెస్టుల్లో 46.37 సగటుతో అతను బ్యాటింగ్ చేయగా, 21 ఏళ్ల వయస్సులో టెస్టుల్లో ప్రవేశించాడు. 1992-93 హోమ్ సిరీస్లో వెస్టిండీస్తో తన తొలి టెస్ట్ మ్యాచ్ ఆడాడు. ఆస్ట్రేలియా దేశవాళీ క్రికెట్లో వెస్టర్న్ ఆస్ట్రేలియాకు కెప్టెన్గా 23 ఏళ్ల వయస్సులో ఉన్నప్పుడు ప్రాతినిధ్యం వహించాడు. మార్టిన్ టెస్టుల్లో 165 పరుగుల అత్యధిక వ్యక్తిగత స్కోరు సాధించాడు. 2005లో న్యూజిలాండ్తో జరిగిన టెస్టు మ్యాచ్లో మార్టిన్ ఈ స్కోరు చేశాడు. అతను మొత్తం 13 టెస్టు సెంచరీలు చేయడం విశేషం. మార్టిన్ 2006-07లో సొంత గడ్డపై చివరిసారిగా యాషెస్ టెస్టు సిరీస్లో ఆడాడు. అదే సిరీస్లో అడిలైడ్ ఓవల్ మ్యాచ్లో టెస్టులకు గుడ్ బై చెప్పాడు. ఆ తరువాత కామెంటేటర్గా మారాడు. ఇక 208 వన్డేలు ఆడిన మార్టిన్ 40.8 బ్యాటింగ్ యావరేజ్ను కలిగి ఉన్నాడు. 1999, 2003 వన్డే వరల్డ్ కప్లను ఆసీస్ గెలవగా ఆ జట్లలో మార్టిన్ కూడా ఒక సభ్యుడిగా ఉన్నాడు. ఈ క్రమంలోనే తన బ్యాటింగ్తో రాణించి వరల్డ్ కప్ విన్నర్గా పేరుగాంచాడు. 2003లో జరిగిన వన్డే వరల్డ్ కప్ ఫైనల్లో భారత్పై 88 పరుగుల స్కోరు చేసి నాటౌట్గా నిలిచాడు. ఆ మ్యాచ్లో మార్టిన్ వేలు విరిగిపోయినా అద్బుతమైన ఆట తీరును కనబరిచాడు. ఇక 2006 ఆస్ట్రేలియా గెలిచిన చాంపియన్స్ ట్రోఫీ జట్టులోనూ అతను సభ్యుడిగా ఉన్నాడు.