T20 World Cup 2026 | టీ20 వ‌ర‌ల్డ్ క‌ప్‌లో పాల్గొంటున్న అత్యంత పిన్న వ‌య‌స్కులు వీరే..!

T20 World Cup 2026 | ఫిబ్రవరి 7 నుంచి మార్చి 8 వరకు జరగనున్న ఐసీసీ టీ20 వ‌ర‌ల్డ్ క‌ప్ 2026లో స్టార్ క్రికెటర్లతో పాటు యువ ప్రతిభ కూడా వెలుగులోకి రానుంది. అనుభవజ్ఞుల స్థిరత్వం, యువకుల ఉత్సాహం - ఈ రెండింటి సమ్మేళనంతో జట్లు బరిలోకి దిగుతున్నాయి. ఈ టోర్నీ అనేక యువ ఆటగాళ్లకు దీర్ఘకాల అంతర్జాతీయ కెరీర్‌కు తొలి మెట్టుగా మారనుంది.

కెన‌డా ప్లేయ‌ర్ అజ‌య్‌వీర్‌..

కెనడా తరఫున ఆడనున్న 20 ఏళ్ల ఆల్‌రౌండర్ అజయ్‌వీర్ హుండల్ అంతర్జాతీయ క్రికెట్‌లో ఇంకా కొత్తవాడే. ఇప్పటివరకు అతడు ఒక్క టీ20 అంతర్జాతీయ మ్యాచ్ మాత్రమే ఆడాడు. 2025 మార్చిలో నమీబియాపై అరంగేట్రం చేసిన హుండల్‌కు ప్రొఫెషనల్ క్రికెట్‌లో మొత్తం రెండు మ్యాచ్‌ల అనుభవమే ఉంది. అయితే, బ్యాట్‌తోనూ బంతితోనూ సహకరించే సామర్థ్యం అతడిని ప్రత్యేకంగా నిలబెడుతోంది. వరల్డ్ కప్ అతడికి తన ప్రతిభను ప్రపంచ వేదికపై చూపించే అరుదైన అవకాశం ద‌క్క‌నుంది. ఈ క్ర‌మంలోనే ఈ వ‌ర‌ల్డ్ క‌ప్ టోర్నీలో ఆడుతున్న అత్యంత యువ ఆట‌గాళ్ల‌లో అజ‌య్‌వీర్ ఒక‌డిగా నిలిచాడు.

నేపాల్ యువ ఆట‌గాడు గుల్ష‌న్ ఝా..

ఇక కేవలం 19 ఏళ్ల వయసులోనే నేపాల్‌కు కీలక ఆటగాడిగా మారిన గుల్షన్ ఝా, ఎడమచేతి బ్యాట్స్‌మన్, కుడిచేతి మీడియం పేసర్. 2021 సెప్టెంబర్‌లో అరంగేట్రం చేసినప్పటి నుంచి 51 టీ20లు, 40 వన్డేలు ఆడాడు. టీ20ల్లో 629 పరుగులు, 29 వికెట్లు, దాదాపు 145 స్ట్రైక్‌రేట్‌తో అతడి గణాంకాలే అతడి ప్రభావాన్ని చెబుతున్నాయి. టోర్నీ మధ్యలో (ఫిబ్రవరి 17న) 20 ఏళ్లు నిండనున్న ఝా, నేపాల్‌కు కీలక ప్లేయ‌ర్‌గా మారాడు.

స్కాట్లండ్ ప్లేయ‌ర్ జైనుల్లా ఇహ్సాన్‌..

అలాగే స్కాట్లండ్ జట్టులో చోటు దక్కించుకున్న 19 ఏళ్ల జైనుల్లా ఇహ్సాన్ ఇప్పటివరకు టీ20 అంతర్జాతీయ మ్యాచ్ ఆడకపోయినా, అండర్-19 స్థాయిలో మంచి అనుభవం సంపాదించాడు. ఆఫ్ఘనిస్తాన్‌లో జన్మించి, శరణార్థిగా స్కాట్లండ్‌కు వచ్చిన ఇతడు, అక్కడే ఎదిగి దేశానికి ప్రాతినిధ్యం వహించే అర్హత పొందాడు. మార్చి 28న 20 ఏళ్లు నిండనున్న ఇహ్సాన్‌కు ఈ వరల్డ్ కప్ సీనియర్ అంతర్జాతీయ క్రికెట్‌లో తొలి పెద్ద పరీక్ష ఎదురు కానుంది.

సౌతాఫ్రికా ప్లేయ‌ర్ క్వెనా మ‌ఫాకా..

టెస్ట్ ఆడే దేశాల నుంచి ఈ టోర్నీలో ఆడనున్న అతి పిన్న వయస్కుడు క్వెనా మ‌ఫాకా. 19 ఏళ్ల ఎడమచేతి పేసర్ ఇప్పటికే అత్యున్నత స్థాయిలో తన ముద్ర వేశాడు. 17 ఏళ్లకే ఐపీఎల్ 2024లో ముంబై ఇండియ‌న్స్ తరఫున ఆడిన మ‌ఫాకా, ఆ తర్వాత దక్షిణాఫ్రికా కోసం టెస్టులు, వన్డేలు, టీ20ల్లో ప్రాతినిధ్యం వహించాడు. టీ20ల్లో ఇప్పటికే 15 వికెట్లు పడగొట్టి తన వయసుకు మించిన పరిణతి చూపిస్తున్నాడు.

యువ‌రాజ్ స‌మ్రా..

అదేవిధంగా టీ20 వరల్డ్ కప్ 2026లో అత్యంత పిన్న వయస్కుడు యువరాజ్ సమ్రా. 19 ఏళ్ల ఈ ఓపెనింగ్ బ్యాట్స్‌మన్ కెనడా తరఫున ఇప్పటికే తన పేరు మారుమోగేలా చేస్తున్నాడు. అమెరికాస్ క్వాలిఫయర్స్‌లో టాప్ రన్ స్కోరర్‌గా నిలిచిన సమ్రా, 16 టీ20 అంతర్జాతీయ మ్యాచుల్లో 442 పరుగులు చేశాడు. సగటు దాదాపు 37, స్ట్రైక్‌రేట్ 160కి పైగా ఉంది. నిర్భయమైన బ్యాటింగ్‌తో ఈ టోర్నీలో అందరి దృష్టిని ఆకర్షించే ఆటగాళ్లలో సమ్రా ఒకడిగా నిలవనున్నాడు. ఇలా ఆయా యువ ప్లేయ‌ర్లు ఈసారి అత్యంత పిన్న వ‌య‌స్కులుగా ఈ టోర్నీలో అల‌రించేందుకు సిద్ధ‌మ‌వుతున్నారు.