T20 World Cup 2026 Australia Team | టీ20 వ‌రల్డ్ క‌ప్‌కు జ‌ట్టును ప్ర‌క‌టించిన ఆస్ట్రేలియా.. ప్యాట్ క‌మిన్స్‌, జాష్ హేజ‌ల్‌వుడ్‌కు చోటు..

T20 World Cup 2026 Australia Team | ఫిబ్రవరి, మార్చి నెలల్లో భారత్, శ్రీలంక వేదికలుగా జరగనున్న ఐసీసీ మెన్స్ టీ20 వరల్డ్ కప్ 2026 టోర్నీకి గాను ఆస్ట్రేలియా క్రికెట్ బోర్డు 15 మంది ప్లేయర్లతో కూడిన జట్టును తాజాగా ప్రకటించింది. ఇందులో ఆశ్చర్యకరంగా ప్యాట్ కమిన్స్, జాష్ హేజల్వుడ్లకు చోటు కల్పించడం విశేషం. వారు గత కొంత కాలంగా గాయాలతో బాధపడుతున్నారు. ఈ క్రమంలోనే యాషెస్ సిరీస్లోనూ పూర్తి స్థాయిలో అందుబాటులో లేరు. అయినప్పటికీ వారిని టీ20 వరల్డ్ కప్కు ఎంపిక చేయడం విశేషం. ఇక గాయాలతో సతమతం అవుతున్న మరో ప్లేయర్ టిమ్ డేవిడ్కు సైతం జట్టులో చోటు కల్పించారు. అలాగే ఆస్ట్రేలియా ఆడిన గత 12 టీ20 మ్యాచ్లలో జట్టులో చోటు దక్కని కూపర్ కానొల్లీకి సైతం ఈసారి జట్టులో చోటు దక్కింది. అయితే ప్రస్తుతం ఎంపిక చేసిన జట్టు ప్రాబబుల్స్ జట్టు మాత్రమే అని, పూర్తి స్థాయిలో జట్టును మరికొద్ది రోజుల్లో ఎంపిక చేస్తామని ఆ జట్టు చీఫ్ సెలెక్టర్, కోచ్ జార్జ్ బెయిలీ వెల్లడించారు. టీ20 వరల్డ్ కప్ 2026కు ఆస్ట్రేలియా జట్టు ఇదే.. మిచెల్ మార్ష్ (కెప్టెన్), జేవియర్ బార్ట్లెట్, కూపర్ కానొల్లీ, ప్యాట్ కమిన్స్, టిమ్ డేవిడ్, కామెరాన్ గ్రీన్, నాథన్ ఎల్లిస్, జాష్ హేజల్వుడ్, ట్రావిస్ హెడ్, జాష్ ఇంగ్లిష్, మాథ్యూ కూనెమన్, గ్లెన్ మాక్స్వెల్, మాథ్యూ షార్ట్, మార్కస్ స్టాయినిస్, ఆడం జంపా. త్వరలో పూర్తి స్థాయిలో జట్టు ఎంపిక.. కాగా ప్యాట్ కమిన్స్, జాష్ హేజల్వుడ్, టిమ్ డేవిడ్లు ప్రస్తుతం గాయాలతో బాధపడుతున్నారు. కానీ వారు టోర్నీ వరకు కచ్చితంగా కోలుకుంటారని, వారు ఈ టోర్నీలో ఆడుతారని తమకు నమ్మకం ఉందని జార్జ్ బెయిలీ తెలిపారు. అయితే మరికొద్ది రోజుల్లో పాకిస్థాన్తో ఆస్ట్రేలియా 3 టీ20ల సిరీస్ ఆడనుంది. ఈ క్రమంలో ఈ సిరీస్ అనంతరం పూర్తి స్థాయిలో జట్టును ఎంపిక చేస్తామని అన్నారు. జనవరి 7 నుంచి 11 తేదీల మధ్య పాకిస్థాన్ జట్టు శ్రీలంకలో పర్యటిస్తుంది. ఈ టూర్లో ఇరు జట్లు 3 టీ20లు ఆడనున్నాయి. ఆ తరువాత పాకిస్థాన్ టూర్కు ఆస్ట్రేలియా రానుందని తెలిసింది. ఈ టూర్ తేదీలు, మ్యాచ్ల నిర్వహణపై ఇంకా స్పష్టత రాలేదు. అయితే ఈ టూర్ తరువాత టీ20 వరల్డ్ కప్కు పూర్తి స్థాయిలో జట్టును ఎంపిక చేస్తామని జార్జ్ బెయిలీ తెలిపారు. కమిన్స్ అందుకేనా..? ఇక టీ20 వరల్డ్ కప్ ను ఈసారి భారత్, శ్రీలంకలలో నిర్వహించనున్న విషయం తెలిసిందే. ఈ క్రమంలోనే ఈ సారి ట్రోఫీని ఎలాగైనా సరే దక్కించుకోవాలని ఆసీస్ భావిస్తోంది. అందులో భాగంగానే ఉపఖండం పిచ్లు కనుక స్పిన్నర్లకు ఎక్కువ ప్రాధాన్యతను ఇచ్చింది. ఇక ఆసీస్ జట్టు ఈ టోర్నీలో తమ తొలి మ్యాచ్ను ఫిబ్రవరి 11వ తేదీన ఐర్లాండ్తో కొలంబోలో ఆడనుంది. అయితే జాష్ హేజల్వుడ్ సంగతి అటుంచితే ప్యాట్ కమిన్స్ను మాత్రం కెప్టెన్సీ మెళకువల కోసమే ఈ టోర్నీలోకి తీసుకున్నారని అర్థమవుతోంది. వన్డే వరల్డ్ కప్ 2023 టోర్నీ భారత్ లో జరిగినసప్పుడు కమిన్స్ కెప్టెన్సీలోని ఆసీస్ జట్టు ట్రోఫీని కైవసం చేసుకుంది. దీంతో కమిన్స్ను ఎంపిక చేయడం ద్వారా అతని కెప్టెన్సీ నైపుణ్యాలను ఉపయోగించుకోవాలని ఆసీస్ జట్టు భావిస్తోంది. కనుకనే అతన్ని టీమ్లోకి తీసుకున్నారని అర్థమవుతోంది. ఇక ఈసారి టోర్నీలో ఆసీస్ ప్రదర్శన ఎలా ఉంటుందో చూడాలి.