SP Balu | ఎస్పీ బాలు విగ్ర‌హాన్ని ఆవిష్క‌రించిన వెంక‌య్య‌నాయుడు

SP Balu | ర‌వీంద్ర‌భార‌తి (Ravindra Bharati)లో ఏర్పాటు చేసిన ప్ర‌ముఖ గాయ‌కుడు ఎస్పీ బాల‌సుబ్ర‌హ్మ‌ణ్యం (SP Balu) విగ్ర‌హాన్ని మాజీ ఉప‌రాష్ట్ర‌ప‌తి వెంక‌య్య‌నాయుడు (Venkaiah Naidu) ఆవిష్క‌రించారు. ఈ సంద‌ర్భంగా ఆయ‌న మాట్లాడుతూ దేవుడు స్వార్థపరుడని, ముందు ఘంటసాలను తీసుకెళ్లారని, ఆ తర్వాత బాలసుబ్రహ్మణ్యంను తీసుకెళ్లారని అన్నారు. బాలసుబ్రహ్మణ్యం స్వరసార్వభౌమత్వానికి నిదర్శనమ‌ని కొనియాడారు. సంగీత దర్శకుడు కోరుకున్నది ఇచ్చే అక్షయపాత్రలాంటిది ఆయన గళమ‌ని కీర్తించారు. ఈ కార్య‌క్ర‌మంలో మాజీ గ‌వ‌ర్న‌ర్ ద‌త్తాత్రేయ‌, మంత్రి శ్రీ‌ధ‌ర్‌బాబు, ఎస్పీ శైల‌జ‌, శుభ‌లేఖ సుధాక‌ర్ త‌దిత‌రులు పాల్గొన్నారు.

విగ్ర‌హ ఏర్పాటుపై తీవ్ర వివాదం

ర‌వీంద్ర‌భార‌తిలో ఎస్పీబీ విగ్ర‌హ ఏర్పాటుపై తీవ్ర వివాదం నెల‌కొంది. తెలంగాణ రాష్ట్ర గీతాన్ని పాడేందుకు నిరాక‌రించార‌ని ఆరోపిస్తూ తెలంగాణ‌వాదులు, ఉద్య‌మ‌కారులు విగ్ర‌హ ఏర్పాటును తీవ్రంగా వ్య‌తిరేకించారు. ఆంధ్ర ప్రాంతానికి చెందిన వ్య‌క్తి, తెలంగాణ గురించి పాట పాడ‌ను అని చెప్పిన వ్య‌క్తి విగ్ర‌హాన్ని తెలంగాణ సాంస్కృతిక కేంద్ర‌మైన ర‌వీంద్ర‌భార‌తిలో ఎలా పెడ‌తార‌ని అభ్యంత‌రం వ్య‌క్తం చేశారు. విగ్ర‌హాన్ని ఏర్పాటు చేస్తే కూల‌గొడ‌తామ‌ని హెచ్చ‌రించారు. ఈ నేప‌థ్యంలో తెలంగాణవాదుల‌ను గృహ‌నిర్బంధంలో ఉంచి, భారీ పోలీసు బందోబ‌స్తు న‌డుమ విగ్ర‌హావిష్క‌ర‌ణ చేప‌ట్టారు.

ఎమోహ‌న‌ల్ అయిన ఎస్పీ శైల‌జ

బాలు విగ్ర‌హావిష్క‌ర‌ణ సంద‌ర్భంగా ఆయ‌న సోద‌రి, ప్ర‌ముఖ గాయ‌ని ఎస్పీ శైల‌జ ఎమోష‌న‌ల్ అయ్యారు. ర‌వీంద్ర‌భార‌తిలో త‌న విగ్ర‌హాన్ని ఏర్పాటు చేయాల‌నేది బాలు కోరిక అని చెప్పిన ఆమె ఆ కోరిక ఇప్పుడు నెర‌వేరింద‌ని భావోద్వేగానికి గుర‌య్యారు. ఆయ‌న సంగీతంలో ఒక కొత్త ఒర‌వడిని సృష్టించార‌ని, త‌మ‌కు మంచి బాట వేశార‌ని అన్నారు.