MP Chamala Kirankumar Reddy | తెలంగాణ ప్రజలు మిమ్మల్ని నమ్మరు.. రేవంత్‌ను తిడితే మీకు మార్కులు ప‌డ‌వు: కవిత కొత్త పార్టీపై ఎంపీ చామల రియాక్షన్

MP Chamala Kirankumar Reddy | త్రినేత్ర‌.న్యూస్‌: క‌విత తెల్ల కాగితం కాద‌ని.. ప్ర‌జ‌లు ఆమెను న‌మ్మే ప‌రిస్థితిలో లేర‌ని.. సీఎం రేవంత్ రెడ్డి(CM Revanth Reddy)ని కర్కోటకుడు, హిట్లర్ అంటే ఆమెకు మార్కులు పడవని భువ‌న‌గిరి ఎంపీ చామల కిరణ్ కుమార్ రెడ్డి విమ‌ర్శించారు. ఇదే స‌మ‌యంలో కవిత (Kavitha) నిర్మాణాత్మక రాజకీయాలు చేస్తే స్వాగతిస్తామ‌ని చెప్పారు. శ‌నివారం ఏర్పాటైన క‌విత కొత్త పార్టీపై ఆయ‌న స్పందించారు. తెలంగాణ రాష్ట్ర సేన (TRS) పార్టీ పెట్టినందుకు ఆమెకు ధన్యవాదాలు తెలిపారు.

అప్పుడే బ‌య‌ట‌కొస్తే ఆద‌ర‌ణ ఉండేది...

అమ్మగా జేబులు చూసి కాదు, కడుపు చూసి పాలిస్తానని కవిత చెప్పారు. బీఆర్ఎస్ పదేళ్లు అధికారంలో ఉన్నప్పుడు జేబులు చూసి పరిపాలించారని అంటున్నారు. నీళ్లు, నిధులు, నియామకాల పేరుతో గతంలో టీఆర్ఎస్ పుట్టింది. బీఆర్ఎస్ అధికారంలో ఉన్నప్పుడే కవిత బయటకు వచ్చి పార్టీ పెట్టి ఉంటే ప్రజల్లో మంచి ఆదరణ వచ్చేది. నీళ్లు, నిధులు, నియామకాల పేరుతో తెలంగాణను దోపిడీ చేశారు. పదేళ్లు కవిత మౌనంగా ఉన్నారు. పంచుకునే వాటాల్లో తేడాలు వచ్చి బయటకు వచ్చారని తెలంగాణ ప్రజలు భావిస్తున్నారు. ఇప్పుడు బయటకు వచ్చి సీఎం, సీఎం అని నినాదాలు చేపించుకుంటున్నారు. ఆమె తెలంగాణ ప్రజలను తప్పుదోవ పట్టిస్తున్నారు అని చామ‌ల‌ ధ్వ‌జ‌మెత్తారు.

రేవంత్ రెడ్డి క‌ర్కోట‌కుడు అయ్యారా?

రేవంత్ రెడ్డి రుణమాఫీ, ఫ్యూచర్ సిటీ, ఉద్యోగాలు, మూసీ ప్రక్షాళన చేస్తున్నందుకు కర్కోటకుడు అయ్యారా? కవిత పార్టీ పెట్టుకోవచ్చు, పోరాటం చేయొచ్చు, ప్రజల్లోకి వెళ్లొచ్చు. తెలంగాణను దోచుకోవడానికే కవిత సీఎం కావాలని అంటున్నారా? కవిత తెల్ల కాగితం కాదు. గత పదేళ్ల బీఆర్ఎస్ పాలనలో ఎంపీగా, ఎమ్మెల్సీగా పని చేశారు అని ఎంపీ చామ‌ల చెప్పారు.