Stephen Raveendra | స‌రిపడా పెట్రోల్ ఉంది.. అపోహ‌ల‌తో నిల్వ చేసుకోవ‌ద్దు: స్టీఫెన్ ర‌వీంద్ర‌

Petrol | త్రినేత్ర‌.న్యూస్‌: రాష్ట్రంలో స‌రిప‌డా పెట్రోల్, డీజిల్(Diesel) నిల్వలు ఉన్నాయ‌ని, సరఫరా క్ర‌మం త‌ప్ప‌కుండా జ‌రుగుతున్న‌ట్లు పౌర సరఫరాల శాఖ కమిషనర్ స్టీఫెన్ రవీంద్ర (Stephen Raveendra) తెలిపారు. సోమవారం (27వ తేదీన) డిమాండ్ ను మించి పెట్రోల్, డీజిల్ లను 29,939 కిలో లీటర్లు సరఫరా చేసినట్లు చెప్పారు. సగటున రోజుకు 5,883 కిలో లీటర్లు పెట్రోల్, 7,348 కిలో లీటర్లు డీజిల్ కు డిమాండ్ ఉండేదని ఆయన వివ‌రించారు.

నిన్న ఒక్క‌రోజే 11,490 కిలో లీట‌ర్లు స‌ర‌ఫ‌రా..

కానీ నిన్న ఒక్క రోజే 11,490 కిలో లీటర్లు పెట్రోల్, 18,449 కిలో లీటర్లు డీజిల్ ను వాహనదారులకు సరఫరా చేశామ‌న్నారు. క్షేత్రస్థాయి అధికారులు, పెట్రోల్ కంపెనీల ప్రతినిధులతో క్షేత్ర‌స్థాయిలో క్ర‌మం త‌ప్పకుండా ప‌రిస్థితుల‌ను స‌మీక్షిస్తున్న‌ట్లు పేర్కొన్నారు. లేనిపోని అపోహలతో పెట్రోల్, డీజిల్ ను నిల్వ చేసుకోవద్దని వినియోగదారులకు సూచించారు.

మ‌రోవైపు హైదరాబాద్‌లో పెట్రోల్, డీజిల్ కొరత నెల‌కొంద‌న్న వదంతుల‌తో మూడో రోజూ పలు పెట్రోల్‌ బంకుల్లో నో స్టాక్ బోర్డులు దర్శనమిస్తున్నాయి. తెరిచి ఉన్న‌ పెట్రోల్‌ బంకుల ముందు వాహనాలు బారులు తీరుతున్నాయి. చంపాపేట్‌, ఐఎస్‌ సదన్‌లో పెట్రోల్‌ బంకుల ముందు వాహనదారులు ఆందోళనకు దిగారు. గంటల తరబడి క్యూలో ఉండాల్సి వస్తోందని ఆగ్రహం వ్యక్తం చేస్తున్నారు. దీంతో రోడ్లపై ట్రాఫిక్ జామ్‌ నెలకొంటోంది.