ITP Aero India | రూ.453 కోట్లతో ‘ఐటీపీ ఏరో ఇండియా’ ప్లాంట్​.. శంషాబాద్‌లో భూమి పూజ చేసిన‌ మంత్రి శ్రీధర్​బాబు

• 10 ఎక‌రాల విస్తీర్ణంలో ఏర్పాటు
• 2027 నాటికి పూర్తిగా అందుబాటులోకి
• తెలంగాణ పారిశ్రామిక రంగానికి మైలురాయి
• మంత్రి శ్రీ‌ధ‌ర్‌బాబు వెల్ల‌డి

ITP Aero India | త్రినేత్ర‌.న్యూస్‌: శంషాబాద్ (Shamshabad) హార్డ్​వేర్ పార్కు (ఫేజ్-III)లో రూ.453 కోట్ల (Rs.453 crores) పెట్టుబడితో 10 ఎకరాల విస్తీర్ణంలో 'ఐటీపీ ఏరో - ఇండియా' ప్లాంట్​ ఏర్పాటు కానుంది. దీనికి మంగ‌ళ‌వారం రాష్ట్ర పరిశ్రమల శాఖ మంత్రి శ్రీధర్ బాబు (Sridhar Babu) భూమి పూజ చేశారు. విమాన ఇంజిన్ల రిజిడ్ ట్యూబ్స్​కు అవసరమయ్యే ఎండ్-ఫిట్టింగ్స్, బ్రాకెట్లను ఈ సంస్థ ఉత్పత్తి చేయనుంది. 2027 నాటికి ఈ ప్లాంటులో ఉత్పత్తి పూర్తి స్థాయిలో ప్రారంభం కానున్న‌ట్లు సంబంధిత అధికారులు తెలిపారు. తయారీ కేంద్రానికి శంకుస్థాపన చేయడం గౌరవంగా భావిస్తున్నట్లు శ్రీ‌ధ‌ర్‌బాబు తెలిపారు.

350 మంది నిపుణుల‌కు ఉపాధి..

ప్రిసిషన్ ఇంజినీరింగ్, అడ్వాన్స్‌డ్ మాన్యుఫ్యాక్చరింగ్, క్వాలిటీ కంట్రోల్ విభాగాల్లో కొత్తగా 350 మంది ఇంజినీర్లు, త‌యారీ రంగ నిపుణులకు ఉపాధి లభించనుంది. భ‌విష్య‌త్‌ కాలంలో ఈ సంఖ్య 600 వరకు పెరిగే అవకాశాలున్నాయి. ఏరోస్పేస్, అధునాతన తయారీ రంగాల్లో తెలంగాణను గ్లోబల్ హబ్‌గా తీర్చిదిద్దడంలో ఇది కీలక పాత్ర పోషిస్తుంది. తెలంగాణ పారిశ్రామిక రంగంలో ఒక మైలురాయిగా నిల‌వ‌నుంది.

ఆవిష్క‌ర‌ణ‌ల‌ను ప్రోత్స‌హించ‌డానికి..

శ్రీ‌ధ‌ర్‌బాబు మాట్లాడుతూ.. పారిశ్రామిక వృద్ధిని పెంపొందించడం, ఆవిష్కరణలను ప్రోత్సహించడం, రాష్ట్రంలో ఉద్యోగ అవకాశాలను సృష్టించడమే ప్ర‌ధాన ల‌క్ష్య‌మ‌న్నారు. ఏరోస్పేస్, అధునాతన తయారీ రంగాల్లో తెలంగాణను ప్రపంచ స్థాయి కేంద్రంగా బలోపేతం చేయడంలో ఒక ముఖ్యమైన అడుగుగా ఆయ‌న అభివ‌ర్ణించారు. ఆవిష్కరణలను ప్రోత్సహించడానికి ఇది ఎంతో ఉప‌యోగ‌ప‌డుతుంద‌ని చెప్పారు.