గ్రామాల్లో బీజేపీ అస్తిత్వం కోల్పోయిందా? పంచాయ‌తీ ఫ‌లితాలు ఏం చెబుతున్నాయి?

గ్రామాల్లో బీజేపీ అస్తిత్వం కోల్పోయిందా? పంచాయతీ ఫలితాలు ఏం చెబుతున్నాయి? త్రినేత్ర.న్యూస్ : తెలంగాణ వ్యాప్తంగా తొలి విడతలో డిసెంబరు 11న 4235 గ్రామ పంచాయతీల్లో జరిగిన స్థానిక ఎన్నికల్లో 67 శాతం కాంగ్రెస్ పార్టీ దక్కించుకున్నది. 27 శాతం బీఆర్ ఎస్ గెలుచుకున్నది. అయితే సర్పంచ్ ఎన్నికలకు పార్టీలకు సంబంధం లేనప్పటికీ ఆయా పార్టీలు గ్రామాల్లో అభ్యర్థులకు మద్దతు ప్రకటించి.. అవి తమ సీట్లుగా చెప్పుకుంటాయి. ఫలితాలు వచ్చిన తర్వాత ఆయా పార్టీలు తాము గెలిచిన స్థానాలంటూ ప్రకటనలు ఇచ్చుకోవడం సర్వ సాధారణం. అయితే అందులో భాగంగానే ఓ ప్రధానపార్టీ అనధికారికంగా వెలువరించిన గ్రామ పంచాయతీ ఎన్నికల ఫలితాలు ఇలా ఉన్నాయి. డిసెంబరు 11న ఎన్నికలు జరిగిన గ్రామాలు - 4235 కాంగ్రెస్ గెలిచినవి - 2864 (67.63%) బీఆర్ ఎస్ గెలిచినవి - 1143 (26.99%) బీజేపీ గెలిచినవి - 185 (4.37%) మిగిలినవారు - 43 (1.02) గ్రామాల్లో బీజేపీ లేదా? అయితే ఇవి అనధికారికమైన ఫలితాలే అయినప్పటికీ ఇందులో ఒక విషయం చర్చనీయాంశంగా మారింది. అధికారంలో ఉన్న కాంగ్రెస్ పార్టీ 2864 గ్రామాలను గెలుచుకొని 67 శాతంతో అగ్రభాగంలో ఉండగా ప్రతిపక్షంలో ఉన్న బీఆర్ ఎస్ 1143 గ్రామాల్లో లో విజయం సాధించి 26.99 శాతం చోట్ల పట్టు నిలుపుకున్నది. కాగా దేశవ్యాప్తంగా బలంగా ఉన్న బీజేపీ తెలంగాణ తొలి విడత పంచాయతీ ఎన్నికల్లో మాత్రం కేవలం 185 (4.37%) స్థానాలకే పరిమితం కావడం ఆ పార్టీ జాతీయ కార్యవర్గాన్ని కలవరపరుస్తున్నది.