భారత ఆర్మీ మాజీ అధికారి అయిన సెలినా జైట్లీ సోదరుడిని యూఏఈలో ఎందుకు నిర్బంధించారు?

బాలీవుడ్ నటి సెలినా జైట్లీ గత కొన్ని రోజులుగా మీడియా ముందు వాపోవడం చూస్తూనే ఉన్నాం. ఢిల్లీ హైకోర్టు చుట్టూ తిరగడం, తనకు న్యాయం కావాలని కోరడం, తన సోదరుడిని రక్షించాలని కోరడం, వీటన్నింటి వెనుక ఉన్నది విక్రాంత్ జైట్లీ. ఆయన ఎవరో కాదు.. సెలినా జైట్లీ సోదరుడు. ఆయన ఇప్పుడు యూఏఈ నిర్బంధంలో ఉండటం వల్లనే తన సోదరుడికి న్యాయం చేయాలని సెలినా వేడుకుంటోంది. అసలేం జరిగింది. తన సోదరుడికి ఏమైంది? విక్రాంత్ జైట్లీ.. సెలినా జైట్లీ సోదరుడు. ఇండియన్ ఆర్మీలో పని చేసి రిటైర్ అయ్యాడు. ఆర్మీలో ఎలైట్ పారా స్పెషల్ ఫోర్సెస్లో విక్రాంత్ పని చేశాడు.2001 లో జాయిన్ అయ్యాడు. 2021 లో రిటైర్ అయ్యాడు. అంతకుముందు నుంచే 2016 నుంచే ఆయన తన మకాన్ని దుబాయ్కి షిఫ్ట్ చేశాడు. 2021 లో ఆర్మీలో రిటైర్ అయిన తర్వాత నుంచి యూఏఈలోనే విక్రాంత్ సెటిల్ అయ్యాడు. అయితే, సెప్టెంబర్ 2024 నుంచి విక్రాంత్ కనిపించకుండా పోయాడు. దీంతో అతడిని ఎవరైనా కిడ్నాప్ చేశారేమో అని కుటుంబ సభ్యులు అనుమానించారు. కానీ, ఆయన యూఏఈ అధికారుల అదుపులో ఉన్నట్టుగా తెలుసుకున్నారు. యూఏఈ అధికారుల అదుపులో ఎందుకు ఉన్నాడు? నిజానికి మేజర్ విక్రాంత్ 2016 లో యూఏఈకి మకాం మార్చినప్పుడు అక్కడ మాటిటి గ్రూప్ (Matiti Group) అనే సంస్థలో ఉద్యోగిగా చేరాడు. అది స్టాక్ మార్కెట్ ట్రేడింగ్ కంపెనీ. అప్పటి నుంచి ఆయనే ఆ కంపెనీలో బాధ్యతలు నిర్వర్తించేవాడు. డిసెంబర్ 2021 లో ఆర్మీ నుంచి రిటైర్ అయ్యాక ఆ కంపెనీపైనే ఎక్కువగా ఫోకస్ పెట్టాడు. సెప్టెంబర్ 6, 2024 న మాల్ ఆఫ్ ఎమిరేట్స్ పార్కింగ్ ప్లేస్ నుంచి కనిపించకుండా పోయాడు. అసలు యూఏఈ అధికారులు ఎందుకు విక్రాంత్ని అరెస్ట్ చేశారో ఎవ్వరికీ తెలియదు. జాతీయ భద్రతకు సంబంధించిన అంశం అని తెలుస్తోంది. సైబర్ ఇంటెలిజెన్స్ లేదా నిఘాకు సంబంధించిన విషయాలపై అనుమానంతోనే ఆయన్ను యూఏఈ అధికారులు అదుపులోకి తీసుకున్నట్టు తెలుస్తోంది. గతంలో ఖతార్లో ఇండియన్ నేవీ అధికారులను అరెస్ట్ చేసిన కేసు లాగానే ఇది కూడా అత్యంత సెన్సిటివ్ అంశం అని చెబుతున్నారు. ఢిల్లీ హైకోర్టును ఆశ్రయించిన సెలినా జైట్లీ సెప్టెంబర్ 2024 నుంచి ఇప్పటి వరకు తన సోదరుడు ఎక్కడున్నాడో, ఎలా ఉన్నాడో తెలియదని, తన సోదరుడి గురించి కుటుంబ సభ్యులు అందరూ బెంగ పెట్టుకున్నారని చాలా రోజుల నుంచి సెలినా జైట్లీ ఆందోళన వ్యక్తం చేస్తోంది. తన సోదరుడిని రక్షించాలని సెలినా జైట్లీ ఢిల్లీ హైకోర్టును ఆశ్రయించింది. నవంబర్ 2025 లో ఢిల్లీ హైకోర్టులో పిటిషన్ దాఖలు చేసింది. ఆ పిటిషన్లో తన సోదరుడిని అన్యాయంగా నిర్బంధించారని తెలిపింది. ఆ కేసుపై ఢిల్లీ హైకోర్టు డిసెంబర్ 4, 2025 న విచారణ జరిపింది. ఇందుకోసం విదేశీ వ్యవహారాల మంత్రిత్వ శాఖ ఒక నోడల్ ఆఫీసర్ను నియమించింది. సెలినా జైట్లీ తన సోదరుడితో మాట్లాడేందుకు కావాల్సిన అన్ని ఏర్పాట్లు చేయాలని కోర్టు ఆదేశాలు జారీ చేసింది. అబుదాబిలోని అల్ వత్బా జైలులో విక్రాంత్ విక్రాంత్ ప్రస్తుతం అబుదాబిలో ఉన్న అల్ వత్బా జైలులో ఉన్నట్లు తెలుస్తోంది. ఢిల్లీ హైకోర్టులో ఈ కేసు విచారణ మళ్లీ డిసెంబర్ 23న జరగనుంది. సెలినా జైట్లీ ఆవేదన సెప్టెంబర్ 2024 నుంచి ఇప్పటి వరకు నా సోదరుడి ఆచూకీ లభించలేదు. ఎక్కడ ఉన్నాడు? ఎలా ఉన్నాడు? అనేది కూడా తెలియదు. నా సోదరుడి క్షేమ సమాచారం కోసం తన కుటుంబం అంతా వేదన పడుతోందని సెలినా జైట్లీ ఆవేదన వ్యక్తం చేసింది. కనీసం ఢిల్లీ హైకోర్టు జోక్యంతో అయినా తమకు న్యాయం జరుగుతుందన్న నమ్మకం ఉందని సెలినా జైట్లీ ఆశాభావం వ్యక్తం చేసింది.