Petal Gahlot | ఐరాసలో పాక్‌ ప్రధానికి దిమ్మతిరిగే కౌంటర్.. ప్రపంచాన్ని ఆకర్షించిన భారత దౌత్యవేత్త ‘పెటల్ గెహ్లాట్’ ఎవరు?

Petal Gahlot | త్రినేత్ర.న్యూస్ : ఐక్యరాజ్యసమితి (UN) సర్వసభ్య సమావేశంలో పాకిస్థాన్ ప్రధాని షెహబాజ్ షరీఫ్‌కు భారత యువ దౌత్యవేత్త పెటల్ గెహ్లాట్ ఇచ్చిన స్ట్రాంగ్ కౌంటర్ ఇప్పుడు అంతర్జాతీయంగా చర్చనీయాంశమైంది. కశ్మీర్, సింధు జలాల ఒప్పందంపై పాక్ ప్రధాని చేసిన ఆరోపణలను ఎండగడుతూ 'రైట్ ఆఫ్ రిప్లై' (Right of Reply) కోటాలో ఆమె మాట్లాడిన తీరు యావత్ దేశాన్ని ఆకట్టుకుంది. సరిహద్దు ఉగ్రవాదాన్ని ఇలాగే కొనసాగిస్తే తీవ్ర పరిణామాలు ఉంటాయని ఇస్లామాబాద్‌ను ఆమె నిర్మొహమాటంగా హెచ్చరించారు.

పాక్‌కు సూటి ప్రశ్నలు.. గట్టి వార్నింగ్

శాంతి గురించి పాకిస్థాన్ మాట్లాడటం హాస్యాస్పదమని పెటల్ గెహ్లాట్ మండిపడ్డారు. "పాకిస్థాన్‌కు శాంతిపై నిజంగా చిత్తశుద్ధి ఉంటే, తమ గడ్డపై నడుస్తున్న ఉగ్రవాద శిబిరాలను వెంటనే మూసివేయాలి. భారత్‌లో నేరాలకు పాల్పడి అక్కడ తలదాచుకుంటున్న మోస్ట్ వాంటెడ్ టెర్రరిస్టులను మాకు అప్పగించాలి" అని డిమాండ్ చేశారు. ఉగ్రవాదంపై తనను తాను కాపాడుకునే హక్కు భారత్‌కు ఉందని తేల్చిచెప్పారు.

జమ్మూ కశ్మీర్ భారత్‌లో అంతర్భాగమని, దీనిపై ఎలాంటి చర్చకూ తావులేదని స్పష్టం చేస్తూ.. పాక్ ఆక్రమిత కశ్మీర్ (PoK)లోని మానవ హక్కుల ఉల్లంఘనలను ప్రపంచం దృష్టికి తెచ్చారు. మిలిటరీ కనుసన్నల్లో నడిచే పాకిస్థాన్.. ప్రజాస్వామ్య విలువల గురించి మాట్లాడటం నీతిమాలిన కపటత్వం (Hypocritical Homilies) తప్ప మరొకటి కాదని ఘాటుగా విమర్శించారు.

ఇంతకీ ఎవరీ పెటల్ గెహ్లాట్?

పెటల్ గెహ్లాట్ న్యూయార్క్‌లోని ఐక్యరాజ్యసమితి భారత శాశ్వత మిషన్‌లో ఫస్ట్ సెక్రటరీగా బాధ్యతలు నిర్వర్తిస్తున్నారు. ఢిల్లీలో జన్మించిన ఆమె, 2015 బ్యాచ్‌కు చెందిన ప్రతిభావంతులైన ఇండియన్ ఫారెన్ సర్వీస్ (IFS) అధికారిణి.

విదేశాంగ శాఖ (MEA)లో చేరిన తర్వాత వివిధ విభాగాల్లో సమర్థవంతంగా పనిచేశారు. న్యూయార్క్ పోస్టింగ్‌కు వెళ్లడానికి ముందు, 2020 నుంచి 2023 వరకు MEAలోని యూరోప్ వెస్ట్ డివిజన్‌లో అండర్ సెక్రటరీగా విధులు నిర్వహించారు. జూలై 2023 నుంచి ఐరాసలోని భారత మిషన్‌లో చేరి, అంతర్జాతీయ వేదికలపై భారతదేశ గళాన్ని బలంగా వినిపిస్తున్నారు.

సంగీత ప్రియురాలు.. గిటారిస్ట్ కూడా

పెటల్ గెహ్లాట్ ముంబైలోని ప్రముఖ సెయింట్ జేవియర్స్ కాలేజీ నుంచి పొలిటికల్ సైన్స్, సోషియాలజీ, ఫ్రెంచ్ లిటరేచర్‌లో బీఏ డిగ్రీ పొందారు. ఆ తర్వాత ఢిల్లీలోని ప్రతిష్టాత్మక లేడీ శ్రీరామ్ కాలేజ్ ఫర్ ఉమెన్ (LSR) నుంచి పొలిటికల్ సైన్స్‌లో మాస్టర్స్ పూర్తి చేశారు.

Also Read : UNGA | ప‌గ‌లు ప్ర‌పంచ శాంతి, రాత్రి ఉగ్ర‌వాదం.. ఇదీ దాయాది క‌ప‌ట బుద్ధి.. ఐరాసలో పాక్ పీఎం ప్రసంగంపై భారత్ ఘాటు స‌మాధానం

ఆమె కేవలం దౌత్య వ్యవహారాల్లోనే కాకుండా కళా రంగంలోనూ ప్రావీణ్యం సంపాదించారు. గెహ్లాట్‌కు సంగీతం అంటే ఎంతో ఇష్టం. ఆమె అద్భుతమైన గిటారిస్ట్ కూడా. ప్రముఖ పాటలను రీక్రియేట్ చేస్తూ ఆమె సోషల్ మీడియాలో పోస్ట్ చేసే వీడియోలకు మంచి ఫాలోయింగ్ ఉంది. ముఖ్యంగా ఇటాలియన్ విప్లవ గీతం 'బెల్లా సియావో' (Bella Ciao) ను ఆమె గిటార్‌పై వాయించిన వీడియో నెట్టింట విపరీతంగా ఆకట్టుకుంది.

షెహబాజ్ షరీఫ్‌కు రెండోసారి చెక్

ఐరాస వేదికగా పాక్ ప్రధాని షెహబాజ్ షరీఫ్‌కు పెటల్ గెహ్లాట్ కౌంటర్ ఇవ్వడం ఇది మొదటిసారి కాదు. గతంలో 2025 UN జనరల్ అసెంబ్లీలో కూడా భారత్-పాక్ సరిహద్దు ఘర్షణలు, 'ఆపరేషన్ సిందూర్' అంశాలపై షరీఫ్ చేసిన వ్యాఖ్యలకు ఆమె దీటుగా బదులిచ్చి వార్తల్లో నిలిచారు. తాజాగా మరోసారి అదే రీతిలో అంతర్జాతీయ వేదికపై దాయాది దేశపు డొల్లతనాన్ని బట్టబయలు చేసి ప్రశంసలు అందుకుంటున్నారు.