Hindu Temple Shooting Plot US | అమెరికాలో హిందూ ఆలయంపై కాల్పుల కుట్ర.. భారత్ సీరియస్

• అమెరికాలో హిందూ ఆలయంపై సామూహిక కాల్పులకు కుట్ర
• 19 ఏళ్ల నిందితుడు అరెస్ట్
• తీవ్ర ఆందోళన వ్యక్తం చేసిన భారత్

Hindu Temple Shooting Plot US | త్రినేత్ర న్యూస్ : అమెరికాలోని ఇల్లినాయిస్ (Illinois) రాష్ట్రంలో ఒక హిందూ ఆలయాన్ని లక్ష్యంగా చేసుకుని సామూహిక కాల్పులకు కుట్ర పన్నిన ఘటన తీవ్ర కలకలం రేపింది. ఈ దారుణ ఘటనపై భారత్ తీవ్రంగా స్పందించింది. అమెరికాలో పెరుగుతున్న జాతి వివక్ష, హిందూ వ్యతిరేక దాడుల పట్ల భారత విదేశాంగ మంత్రిత్వ శాఖ (MEA) తీవ్ర ఆందోళన వ్యక్తం చేసింది. ఈ ఘటన అత్యంత బాధాకరమని పేర్కొంటూ, ఇలాంటి హింసాత్మక ధోరణులపై కఠినంగా వ్యవహరించాలని స్పష్టం చేసింది.

నిందితుడి వద్ద వైట్ సుప్రిమ్రిస్ట్ మ్యానిఫెస్టో

అమెరికాలోని చికాగో సమీపంలోని అరోరా (Aurora) ప్రాంతంలో ఉన్న ఓ హిందూ ప్రార్థనా మందిరంపై దాడి చేసేందుకు కుట్ర పన్నిన 19 ఏళ్ల అలెగ్జాండ్రోస్ పపోరాకిస్ (Alexandros Paporakis) అనే యువకుడిని స్థానిక పోలీసులు అరెస్ట్ చేశారు. పాలటైన్ ప్రాంతానికి చెందిన పపోరాకిస్ వద్ద నుంచి తెల్లజాతీయుల ఆధిపత్య (White supremacist) భావజాలాన్ని ప్రదర్శించే, భారతీయ సంతతి ప్రజలపై హింసను ప్రేరేపించే ఎనిమిది పేజీల మ్యానిఫెస్టోను పోలీసులు స్వాధీనం చేసుకున్నారు.

ఈ పరిణామంపై MEA అధికార ప్రతినిధి రణ్‌ధీర్ జైస్వాల్ మాట్లాడుతూ.. "ఇల్లినాయిస్‌లోని అరోరా ప్రాంతంలో హిందూ ఆలయాన్ని లక్ష్యంగా చేసుకుని సామూహిక కాల్పులకు కుట్ర పన్నినట్లు వస్తున్న వార్తలు మమ్మల్ని తీవ్రంగా కలచివేశాయి. భారతీయ సంతతి ప్రజలపై హింసను ప్రేరేపించేలా ఉన్న ఈ హిందూ వ్యతిరేక, జాత్యహంకార పూరిత చర్య అత్యంత ఆందోళనకరం" అని పేర్కొన్నారు. అమెరికా భద్రతా బలగాల సకాల స్పందనను, నిందితుడి అరెస్ట్‌ను తాము గమనించామని తెలిపారు.

తుపాకీ జామ్ కావడంతో తప్పిన పెను ప్రమాదం

అమెరికా మీడియా కథనాల ప్రకారం.. నిందితుడు పపోరాకిస్ తన తల్లి నివాసం నుంచి దాదాపు 40 మైళ్ల దూరంలో ఉన్న అరోరాలోని హిందూ ఆలయం వద్దకు మోడిఫైడ్ ఏఆర్-స్టైల్ రైఫిల్, దాదాపు 300 రౌండ్ల మందుగుండు సామగ్రి, బాడీ ఆర్మర్‌తో వెళ్లాడు. అయితే, అతను కాల్పులు జరపడానికి ప్రయత్నించిన సమయంలో అనుకోకుండా తుపాకీ జామ్ (Jam) అయింది. దీంతో అక్కడి నుంచి పరారైన అతను, ఆ టెక్నికల్ సమస్యను ఎలా పరిష్కరించుకోవాలో ఆన్‌లైన్‌లో వెతికాడు.

నిందితుడి సహచరులు ఇచ్చిన సమాచారంతో అప్రమత్తమైన పోలీసులు.. అతడు తన నివాసం నుంచి వెళ్తుండగా అరెస్ట్ చేశారు. విచారణలో భాగంగా అతడి ఇంటిని తనిఖీ చేయగా రైఫిల్, లోడెడ్ మ్యాగజైన్లు, వందలాది తూటాలు లభించినట్లు పోలీసులు తెలిపారు. టెర్రర్ బెదిరింపులు, చట్టవిరుద్ధంగా ఆయుధాలు కలిగి ఉన్నాడనే అభియోగాలపై కేసు నమోదు చేసిన కోర్టు, అక్టోబర్ 30న తదుపరి విచారణ జరగనున్నట్లు వెల్లడించింది. ఈ కుట్ర వెనుక ఇతర కోణాలున్నాయా అనే కోణంలో ఎఫ్‌బీఐ (FBI) తో కలిసి పోలీసులు దర్యాప్తు చేస్తున్నారు.

అమెరికాలో పెరుగుతున్న భారత్ వ్యతిరేక ధోరణులు

అమెరికాలో పెరుగుతున్న జాత్యహంకార శత్రుత్వం, భారత్ వ్యతిరేక ద్వేషంపై న్యూఢిల్లీ తీవ్ర గళం విప్పింది. "ఈ ఘటన అమెరికాలో పెరుగుతున్న భారత్ వ్యతిరేక భావజాలానికి అద్దం పడుతోంది. ఇలాంటి వాటిపై జీరో టాలరెన్స్ విధానాన్ని అవలంబించాలి. భారతీయ సమాజం భద్రతను కాపాడేందుకు సత్వర చర్యలు తీసుకోవాలి" అని రణ్‌ధీర్ జైస్వాల్ కోరారు.

బాధ్యులపై సమగ్ర విచారణ జరిపి చట్టపరమైన శిక్షపడేలా చూడాలని అమెరికా అధికారులను కోరామని తెలిపారు. మరోవైపు, చికాగోలోని భారతీయ కాన్సులేట్ (Indian Consulate) అమెరికా లా-ఎన్‌ఫోర్స్‌మెంట్ అధికారుల సకాల చర్యలను ప్రశంసించింది. స్థానిక భారతీయ కమ్యూనిటీతో ఎప్పటికప్పుడు టచ్‌లో ఉన్నామని ఎక్స్ (X) వేదికగా వెల్లడించింది. భారత సంతతికి చెందిన అమెరికన్ కాంగ్రెస్ సభ్యుడు రాజా కృష్ణమూర్తి ఈ ఘటనపై తీవ్ర దిగ్భ్రాంతి వ్యక్తం చేస్తూ.. అమాయకులు ప్రాణాలు కోల్పోయే వరకు వేచి చూడకుండా ఈ తెల్లజాతీయ అహంకార విషాన్ని వెంటనే అణచివేయాలని పిలుపునిచ్చారు.

Also Read | అమెరికాలో హిందూ ఆలయంపై కాల్పుల కుట్ర.. 19 ఏళ్ల యువకుడి అరెస్ట్..