TMC Rebel MPs | స్పీకర్ నిర్ణయం తీసుకోకపోతే సుప్రీంకోర్టుకే: 20 మంది రెబల్ ఎంపీలపై టీఎంసీ గురి

TMC Rebel MPs | త్రినేత్ర.న్యూస్ : పశ్చిమ బెంగాల్ ప్రతిపక్ష పార్టీ తృణమూల్ కాంగ్రెస్ (TMC) సంచలన నిర్ణయం తీసుకుంది. పార్టీకి వ్యతిరేకంగా వెళ్లి నేషనలిస్ట్ సిటిజన్స్ పార్టీ ఆఫ్ ఇండియా (NCPI)లో చేరిన 20 మంది లోక్‌సభ సభ్యులపై (రెబల్ ఎంపీలు) అనర్హత వేటు వేయించేందుకు సుప్రీంకోర్టు (Supreme Court) గడప తొక్కేందుకు సిద్ధమవుతోంది. లోక్‌సభ స్పీకర్ కార్యాలయం నుంచి ఈ విషయంపై ఎలాంటి నిర్ణయం వెలువడకపోవడంతో త్వరలోనే అత్యున్నత న్యాయస్థానంలో 'డిస్‌క్వాలిఫికేషన్ పిటిషన్' దాఖలు చేయనున్నట్లు పార్టీ వర్గాలు తెలిపాయి.

స్పీకర్ జాప్యంపై అసహనం

పెండింగ్‌లో ఉన్న అనర్హత పిటిషన్ల విషయంలో టీఎంసీకి, లోక్‌సభ స్పీకర్ కార్యాలయానికి మధ్య తీవ్ర ఘర్షణ వాతావరణం నెలకొంది. స్పీకర్ ఓం బిర్లా నిర్ణయం కోసం ఇక ఎంతమాత్రం ఎదురుచూడకూడదని, మరింత జాప్యం జరిగితే తమ కేసు దెబ్బతింటుందని టీఎంసీ భావిస్తోంది. ఈ క్రమంలోనే పార్టీ లోక్‌సభ పక్ష నేత, జనరల్ సెక్రటరీ అభిషేక్ బెనర్జీ స్పీకర్ ఓం బిర్లాను కలిసి వీలైనంత త్వరగా నిర్ణయం తీసుకోవాలని కోరారు. చట్టప్రకారం, న్యాయస్థానాల మార్గదర్శకాల ప్రకారం నిర్ణీత వ్యవధిలో చర్యలు తీసుకోకపోతే సుప్రీంకోర్టును ఆశ్రయిస్తామని ఆయన హెచ్చరించారు. ఫిరాయింపుల ఫిర్యాదుల పరిష్కారానికి ఉన్న మూడు నెలల గడువును టీఎంసీ ఈ సందర్భంగా గుర్తుచేస్తోంది.

అభిషేక్ బెనర్జీ ఏమన్నారంటే?

"జూన్‌లోనే ఆ 20 మంది ఎంపీలందరిపై విడివిడిగా అనర్హత పిటిషన్లు (Disqualification petitions) దాఖలు చేశాం. అప్పుడే స్పీకర్ దృష్టికి ఈ విషయాన్ని తీసుకెళ్లాను. దాదాపు రెండు నెలలు గడుస్తున్నా.. సరైన స్పందన లేదు" అని పార్లమెంట్ బయట అభిషేక్ బెనర్జీ మీడియాతో అన్నారు. స్పీకర్ చట్టప్రకారం నిర్ణయం తీసుకోకపోతే.. అత్యున్నత న్యాయస్థానం జోక్యాన్ని కోరడం తప్ప తమకు వేరే దారి లేదని ఆయన స్పష్టం చేశారు.

రెబల్ ఎంపీలు ఎందుకు జారుకున్నారు?

సీనియర్ నేత కాకోలి ఘోష్ దస్తిదార్‌తో సహా 20 మంది ఎంపీలు టీఎంసీ నుంచి విడిపోయి.. హౌరా కేంద్రంగా పనిచేసే చిన్న పార్టీ అయిన NCPIలో విలీనం (Merger) అయినట్లు ప్రకటించారు. టీఎంసీకి ఉన్న మొత్తం 28 మంది లోక్‌సభ ఎంపీల్లో తమకే మూడింట రెండొంతుల మెజారిటీ ఉందని వారు వాదిస్తున్నారు. వీరంతా ఇప్పటికే ఎన్డీయే (NDA) సమావేశాలకు హాజరవుతూ ప్రధాని మోదీకి మద్దతు తెలుపుతున్నారు. అయితే, పార్టీ రికార్డుల్లో మాత్రం వీరు ఇప్పటికీ టీఎంసీ సభ్యులుగానే ఉన్నారు.

వేరే పార్టీలో చేరడం ద్వారా వారు స్వచ్ఛందంగా టీఎంసీ సభ్యత్వాన్ని వదులుకున్నారని.. యాంటీ-డిఫెక్షన్ లా (Anti-defection law) కింద వారికి ఎలాంటి రక్షణ ఉండదని టీఎంసీ వాదిస్తోంది. జూన్ 19న వీరిపై 20 వేర్వేరు పిటిషన్లను స్పీకర్‌కు అందించింది.

సీట్ల కేటాయింపుపై తీవ్ర వివాదం

రెబల్ ఎంపీలకు లోక్‌సభలో సీట్ల కేటాయింపు, వారి గుర్తింపు పట్ల కూడా వివాదం నడుస్తోంది. "రెబల్ ఎంపీలను NCPIగా గుర్తిస్తే ఆ నిర్ణయాన్ని అధికారికంగా ప్రకటించాలి. కానీ వారికి గుర్తింపు ఇవ్వకుండానే, మాకు కేటాయించిన మాట్లాడే సమయం (Speaking time) నుంచి వారి సమయాన్ని ఎలా కట్ చేస్తారు?" అని అభిషేక్ బెనర్జీ ప్రశ్నించారు.

జులై 18న లోక్‌సభ సెక్రటేరియట్ ఈ ఎంపీల సీటు నంబర్లను మారుస్తూ ఓ సర్క్యులర్ జారీ చేయగా.. అదే రోజు టీఎంసీని సింగిల్ పార్లమెంటరీ పార్టీగా గుర్తిస్తూ మరో సర్క్యులర్ రావడం గమనార్హం. రెబల్స్ గ్రూప్.. సుదీప్ బందోపాధ్యాయను తమ ఫ్లోర్ లీడర్‌గా, కాకోలి ఘోష్‌ను చీఫ్ విప్‌గా ఎంచుకుంది. జులై 19న జరిగిన అఖిలపక్ష సమావేశానికి NCPIకి ప్రత్యేక ఆహ్వానం పంపడంతో ప్రతిపక్షాలు వాకౌట్ చేసిన సంగతి తెలిసిందే.