Mamata Banerjee | బెంగాల్ ప్ర‌భుత్వాన్ని కూల్చేందుకు బీజేపీ రూ.1వేయి కోట్ల ఒప్పందం చేసుకుంది: సీఎం మ‌మ‌తా బెన‌ర్జీ

Mamata Banerjee | రాష్ట్రంలో అధికారంలో ఉన్న తృణ‌మూల్ కాంగ్రెస్ ప్రభుత్వాన్ని కూల్చేందుకు భార‌తీయ జ‌న‌తా పార్టీ రూ.1వేయి కోట్ల ఒప్పందం కుదుర్చుకుందని పశ్చిమ బెంగాల్ ముఖ్యమంత్రి మ‌మ‌తా బెన‌ర్జీ సంచలన ఆరోపణలు చేశారు. బాంకురా జిల్లాలోని ఒండాలో ఆదివారం జరిగిన ఎన్నికల సభలో ఆమె మాట్లాడారు. రాబోయే ఎన్నికల కోసం రాష్ట్రంలో నియమించిన కేంద్ర బలగాలు తనిఖీల పేరుతో మహిళలను అవమానిస్తున్నాయని ఆమె విమర్శించారు. ఎన్నికల ముందు ఓటర్లను లంచాలు ఇచ్చి ప్రభావితం చేయడానికి బీజేపీ ప్రయత్నిస్తోందని అన్నారు. ఓటర్ల జాబితాల ప్రత్యేక సవరణ ప్రక్రియ (SIR)ను దేశంలోనే అతిపెద్ద కుంభకోణంగా పేర్కొన్నారు.

పూర్బ బర్దమాన్ జిల్లాలోని ఖండఘోష్‌లో జరిగిన మరో సభలో మాట్లాడుతూ బీజేపీ అధికారంలోకి వస్తే ప్రజల వద్ద ఉన్న ప్రతి వ‌స్తువును లాక్కుంటుందని మ‌మ‌తా బెన‌ర్జీ ఆరోపించారు. బీజేపీ ఎన్నికల ముందు ఓటర్లకు లంచాలు ఇస్తుంద‌ని, కానీ ఎన్నికలు పూర్తయ్యాక తమ హామీలను మర్చిపోతుంద‌ని, దీన్ని బీహార్ ఎన్నికల్లో చూశామ‌ని ఆమె అన్నారు. ఎన్నికల ప్రక్రియను కూడా బీజేపీ ప్రభావితం చేసే ప్రయత్నం చేస్తుందని ఆరోపించిన మమతా బెనర్జీ, ప్రజలు అప్రమత్తంగా ఉండాలని పిలుపునిచ్చారు. వోటింగ్ యంత్రాలపై అప్రమత్తంగా ఉండాల‌ని, బీజేపీ నెమ్మదిగా ఓటింగ్, నెమ్మదిగా కౌంటింగ్ చేయాలనే ప్రణాళిక ర‌చించింద‌ని, వారి కుట్ర‌లను భగ్నం చేయాల‌ని ఆమె అన్నారు.

SIR ఇటీవలి కాలంలో దేశం చూసిన అతిపెద్ద స్కామ్ అని ఆమె మరోసారి పేర్కొన్నారు. అలాగే కేంద్రంలో ఉన్న బీజేపీ ప్రభుత్వం ఈ ఏడాదిలోనే కూలిపోతుందని ఆమె జోస్యం చెప్పారు. బీజేపీ ప్ర‌భుత్వం కూలిపోగానే వారు తెచ్చిన ప్రజావ్యతిరేక చట్టాలన్నింటినీ రద్దు చేస్తామ‌ని అన్నారు.