Jailbreak | ఫిట్స్ నాట‌కం.. జైలు నుంచి 17 మంది ఖైదీలు పరార్‌

Jailbreak | త్రినేత న్యూస్‌: మూర్ఛ వ‌స్తున్న‌ట్లు నాట‌కం ఆడిన ఖైదీలు ఆడి సినీ ఫ‌క్కీలో జైలు నుంచి (Jailbreak) త‌ప్పించుకున్నారు. సోమ‌వారం అర్ధ‌రాత్రి త‌మిళ‌నాడులోని తేని జిల్లా స‌బ్‌జైలులో (Theni sub-jail) జ‌రిగిన ఈ ఘ‌ట‌న క‌ల‌కలం సృష్టిస్తున్న‌ది. జైలులోని ఓ గ‌దిలో 17 మంది ఖైదీలు ఉన్నారు. వారిలో ఒక‌రికి ఆరోగ్యం బాగోలేద‌ని స‌మాచారం అంద‌డంతో జైలు సిబ్బంది ఆ గ‌దికి వెళ్లారు. ప్లాన్‌లో భాగంగా ఓ ఖైదీ ఫిట్స్ (Seizure) వ‌చ్చిన‌ట్లు న‌టించగా.. మిగిలిన‌వారు సిబ్బందిపై దాడిచేసి అక్క‌డి నుంచి పారిపోయారు (Inmates Escape).

అప్ర‌మ‌త్త‌మైన జిల్లా పోలీసు యంత్రాంగం తేని నుంచి దిండిగల్‌ వరకు హైఅలర్ట్‌ ప్రకటించారు. ప‌రారైన ఖైదీల కోసం 16 బృందాలుగా విడిపోయి గాలింపు చర్యలు చేపట్టారు. దాదాపు 16 ప్రదేశాల్లో చెక్‌పోస్టులు ఏర్పాటు చేశారు. ఈ క్ర‌మంలో పరారైన ఖైదీల్లో ఒకరిని తిరిగి అరెస్ట్‌ చేశారు. మిగిలిన‌వారి కోసం ముమ్మ‌రంగా గాలిస్తున్నారు.

సిబ్బంది దాడి చేసిన ఖైదీలు అక్క‌డి నుంచి పారిపోయిన‌ట్లు సౌత్‌జోన్‌ ఐజీ విజయేంద్ర బిడారీ తెలిపారు. గాయ‌ప‌డిన‌వారిని చికిత్స నిమిత్తం ద‌వాఖాన‌కు త‌ర‌లించామ‌ని వెల్ల‌డించారు. జైలు వెనుక అటవీ ప్రాంతంలోకి వారు వెళ్లినట్లు అనుమానిస్తున్నామ‌ని చెప్పారు. ముందు జాగ్ర‌త్త‌గా జిల్లాలో 16 చోట్ల చెక్‌పోస్టులను ఏర్పాటు చేసిన‌ట్లు దిండిగ‌ల్ జిల్లా ఎస్పీ ఎస్. జ‌య‌కుమార్ చెప్పారు. దిండిగ‌ల్‌-తేని ర‌హ‌దారిపై వాహ‌నాల‌ను ముమ్మ‌రంగా త‌నిఖీ చేస్తున్నామ‌న్నారు.