Tummidihetti Barrage Project | మహారాష్ట్ర ప్రయోజనాలే మా ప్రయారిటీ

• తుమ్మిడిహెట్టి ఎత్తు పెంపుపై మహారాష్ట్ర కీలక అడుగు
• జాయింట్ కమిటీ ఏర్పాటు
• సీఎం రేవంత్ భేటీలో ఏం జరిగింది?

Tummidihetti Barrage Project | త్రినేత్ర న్యూస్ : తెలంగాణ ప్రజలు, ఉత్తర తెలంగాణ రైతాంగం ఎంతో ఆశగా ఎదురుచూస్తున్న తుమ్మిడిహెట్టి బ్యారేజీ ప్రాజెక్టుపై కీలక పురోగతి లభించింది. సోమవారం ముంబై వేదికగా తెలంగాణ ముఖ్యమంత్రి ఎ. రేవంత్ రెడ్డి, నీటిపారుదల శాఖ మంత్రి ఎన్. ఉత్తమ్ కుమార్ రెడ్డిలతో కూడిన ప్రతినిధి బృందంతో మహారాష్ట్ర ప్రభుత్వం ఉన్నత స్థాయి సమావేశం నిర్వహించింది.

తెలంగాణ సీఎం చేసిన విజ్ఞప్తి మేరకు, తుమ్మిడిహెట్టి ప్రాజెక్టు ఎత్తు పెంపు, ఇతర సాంకేతిక సవాళ్లపై స్వతంత్రంగా సమగ్ర పరిశీలన జరిపేందుకు మహారాష్ట్ర సుముఖత వ్యక్తం చేసింది.

ఉమ్మడి కమిటీతో సాంకేతిక అంశాల అధ్యయనం

ఈ ప్రాజెక్టుపై లోతైన కసరత్తు చేసేందుకు రెండు రాష్ట్రాల ప్రభుత్వ ప్రధాన కార్యదర్శులు (CS), జలవనరుల శాఖ కార్యదర్శులతో ఒక ప్రత్యేక జాయింట్ కమిటీని ఏర్పాటు చేయాలని నిర్ణయించారు. ఈ కమిటీ క్షేత్రస్థాయిలో సాంకేతిక అంశాలను, మహారాష్ట్ర భూభాగంలో ఎదురయ్యే ముంపు ప్రాంతాల ప్రభావాన్ని క్షుణ్ణంగా అధ్యయనం చేయనుంది.

గతంలో ఇచ్చిన ఆమోదాల కంటే వాస్తవ ముంపు ప్రాంతం ఎక్కువగా ఉన్నట్లు తేలడంతో, ప్రస్తుతం తెలంగాణ ప్రభుత్వం ముందుకు తెచ్చిన కొత్త ప్రతిపాదనపై కూలంకషంగా సమీక్షించాల్సిన అవసరం ఉందని మహారాష్ట్ర స్పష్టం చేసింది.

ముఖ్యంగా అధ్యయనం చేయనున్న కీలక అంశాలు

• ప్రతిపాదిత సైట్ మార్పు (Site Change) వల్ల ముంపు ప్రాంతంలో వచ్చే మార్పులు.
• సమీపంలోని వన్యప్రాణుల అభయారణ్యం (Wildlife Sanctuary)పై పడే పర్యావరణ ప్రభావం.
• ప్రాజెక్టు కోసం మహారాష్ట్ర వైపు అవసరమయ్యే అదనపు భూసేకరణ వివరాలు.

తెలంగాణకు సహకారం.. అయితే మా ప్రయోజనాలే ముఖ్యం: మహారాష్ట్ర

పొరుగు రాష్ట్రాలతో పరస్పర సహకారం, సామరస్య పూర్వక చర్చల ద్వారా సమస్యలను పరిష్కరించుకోవడానికే తాము ఎల్లప్పుడూ ప్రాధాన్యత ఇస్తామని మహారాష్ట్ర ప్రభుత్వం పేర్కొంది. తెలంగాణకు పూర్తి సహకారం అందించేందుకు సిద్ధంగా ఉన్నప్పటికీ.. తమ రాష్ట్ర ప్రజల ప్రయోజనాలను, ముంపు బాధితుల హక్కులను కాపాడటానికే తమ మొదటి ప్రాధాన్యత ఉంటుందని కుండబద్దలు కొట్టింది.

నీటి కేటాయింపులు, చట్టబద్ధమైన అనుమతుల అంశాలు కేంద్ర జల సంఘం (CWC) పరిధిలోకి వస్తాయని, నివేదికలు సిద్ధమయ్యాక కేంద్రం ముందు వాస్తవాలను ఉంచుతామని తెలిపింది. సాంకేతిక అధ్యయనం, నిపుణుల అభిప్రాయాల సేకరణ తర్వాతే తుది నిర్ణయాలు ఉంటాయని స్పష్టం చేసింది. ఈ పరిణామంతో తుమ్మిడిహెట్టి ప్రాజెక్టుపై ఇరు రాష్ట్రాల మధ్య సంప్రదింపుల ప్రక్రియ సరికొత్త మలుపు తిరిగింది.