Supreme Court | రాజ‌కీయ పార్టీల ఉచితాల‌ను నిషేధించండి.. పిటిష‌న్‌ను కొట్టేసిన సుప్రీంకోర్టు..!

Supreme Court | ఎన్నికల ముందు రాజకీయ పార్టీలు ఉచిత హామీలు (freebies) ఇవ్వడాన్ని నిషేధించాలని కోరుతూ దాఖలైన పిటిషన్‌ను సుప్రీంకోర్టు సోమ‌వారం కొట్టివేసింది. ఈ అంశానికి సంబంధించిన మరికొన్ని పిటిషన్లు ఇప్పటికే కోర్టులో పెండింగ్‌లో ఉన్నాయని పేర్కొంది. మ‌ళ్లీ కొత్త‌గా పిటిషన్‌ను విచారించాల్సిన అవసరం లేదని స్పష్టం చేసింది. పిటిషనర్ తన వాదనలో ఎన్నికల ముందు ప్రభుత్వ నిధులను ఉపయోగించి రాజకీయ పార్టీలు ఉచిత హామీలు ఇవ్వడం సరైంది కాదని, ఇది అవినీతి పరిధిలోకి వస్తుందని పేర్కొన్నారు. ఇలాంటి హామీలు ఓటర్లను ప్రభావితం చేస్తాయని, ఎన్నికల ప్రక్రియ న్యాయసమ్మతతపై ప్రశ్నలు లేవనెత్తుతాయని ఆయన అభిప్రాయం వ్య‌క్తం చేశారు.

అలాగే, రాజకీయ పార్టీలు ఇలాంటి హామీలను ఇవ్వకుండా ఎన్నికల కమిషన్‌కు స్పష్టమైన ఆదేశాలు ఇవ్వాలని పిటిషన్‌లో కోరారు. ఈ నిబంధనలను ఉల్లంఘించే పార్టీలపై చర్యలు తీసుకోవాలని కూడా విజ్ఞప్తి చేశారు. ఉచిత హామీలకు అవసరమైన నిధులు ఎక్కడి నుంచి వస్తాయో ఎన్నికల మేనిఫెస్టోలో స్పష్టంగా పేర్కొనాలని సూచించారు. ఈ హామీలపై భారత కంప్ట్రోలర్ అండ్ ఆడిటర్ జనరల్ (CAG) ద్వారా ఆడిట్ చేయించాలని పిటిషనర్ కోరారు. ప్రభుత్వ వనరుల దుర్వినియోగం జరగకుండా, ఆర్థిక పారదర్శకత ఉండేలా చూడాలన్నారు. అయితే, సుప్రీంకోర్టు ఈ పిటిషన్‌ను విచారించడానికి నిరాకరించింది. ఇదే అంశంపై ఇప్పటికే పలు కేసులు పెండింగ్‌లో ఉన్నాయ‌ని, మ‌ళ్లీ వేరుగా విచారించాల్సిన అవ‌స‌రం లేద‌ని తేల్చి చెప్పింది.