Supreme Court | సుప్రీంకోర్టు ఆగ్రహం.. కేరళ కాంగ్రెస్ నేతలకు నోటీసులు!

• సీజేఐ జస్టిస్ సూర్యకాంత్‌పై సోషల్ మీడియా పోస్టు వివాదం..
• కోర్టు ధిక్కరణ చర్యలు ఎందుకు తీసుకోకూడదో వివరణ ఇవ్వాలని ఆదేశం..
• క్షమాపణపై ధర్మాసనం కీలక వ్యాఖ్యలు

Supreme Court | భారత ప్రధాన న్యాయమూర్తి (సీజేఐ) జస్టిస్ సూర్యకాంత్‌పై సోషల్ మీడియాలో చేసిన వ్యాఖ్యల‌తో కేరళ కాంగ్రెస్ చిక్కుల్లో ప‌డింది. పార్టీ అధికారిక ఎక్స్‌ ఖాతాలో చేసిన అభ్యంతరకర పోస్టుపై సుప్రీంకోర్టు తీవ్రంగా స్పందించింది. ఈ వ్యవహారంలో కేరళ ప్రదేశ్ కాంగ్రెస్ కమిటీ (కేపీసీసీ) అధ్యక్షుడు, కార్యదర్శి సహా పార్టీ ముఖ్య నేతలకు నోటీసులు జారీ చేసింది. కోర్టు ధిక్కరణ చర్యలు ఎందుకు ప్రారంభించకూడదో వివరణ ఇవ్వాలని ఆదేశించింది.

క్షమాపణ చెప్పినా తప్పించుకోలేరు..

న్యాయవాది వినీత్ జిందాల్ దాఖలు చేసిన పిటిషన్‌పై శుక్రవారం జస్టిస్ అరవింద్ కుమార్, జస్టిస్ విపుల్ ఎం పంచోలి నేతృత్వంలోని ధర్మాసనం విచారణ చేపట్టింది. కేరళ కాంగ్రెస్ అధికారిక ఎక్స్ అకౌంట్‌లో సీజేఐపై చేసిన పోస్టును కోర్టు దృష్టికి తీసుకెళ్లారు. విచారణ సందర్భంగా కాంగ్రెస్ తరఫు న్యాయవాది స్పందిస్తూ.. పార్టీ నాయకత్వం అనుమతి లేకుండానే ఓ కార్యకర్త ఆ పోస్టు చేసినట్లు తెలిపారు. అనంతరం దాన్ని తొలగించామని, బేషరతుగా క్షమాపణ కూడా చెప్పినట్లు కోర్టుకు వివరించారు. దీనిపై జస్టిస్ అరవింద్ కుమార్ కీలక వ్యాఖ్యలు చేశారు. క్షమాపణ అనేది కేవలం కలం నుంచి వచ్చిందా? లేక హృదయం నుంచి వచ్చిందా? అన్నది పరిశీలిస్తామని వ్యాఖ్యానించారు. క్షమాపణ చెప్పినంత మాత్రాన వ్యవహారాన్ని తేలిగ్గా తీసుకోలేమన్న సంకేతాలిచ్చారు.

రాజ్యాంగమే సర్వోన్నతం..

ఈ సందర్భంగా ధర్మాసనం న్యాయవ్యవస్థ స్వతంత్రత, రాజ్యాంగ ఔన్నత్యంపై కీలక వ్యాఖ్యలు చేసింది. రాజ్యాంగమే సర్వోన్నతమని, ఏ వ్యక్తి లేదా రాజకీయ సంస్థ దాని కంటే గొప్పది కాదని స్పష్టం చేసింది. న్యాయవ్యవస్థ స్వతంత్రత అనేది రాజకీయ అవసరాలకు అనుగుణంగా మారే అంశం కాదని పేర్కొంది. కోర్టు తీర్పులను విమర్శించే హక్కు ప్రతి ఒక్కరికీ ఉందని, అయితే భావప్రకటనా స్వేచ్ఛ పేరుతో న్యాయప్రక్రియను భయపెట్టడం, ప్రభావితం చేయడం సరికాదని ధర్మాసనం స్పష్టం చేసింది. న్యాయస్థానాల అధికారం రాజకీయ మద్దతుపై కాకుండా చట్టబద్ధ పాలనపై ఆధారపడి ఉంటుందని పేర్కొంది. న్యాయవ్యవస్థ ప్రతిష్ట‌ను దెబ్బతీసే ప్రయత్నాలను గట్టిగా ఎదుర్కోవాల్సి ఉంటుందని వ్యాఖ్యానించింది.

అసలేం జరిగింది?

గ‌త అక్టోబర్ 12న కేరళ కాంగ్రెస్ అధికారిక ఎక్స్ ఖాతాలో సీజేఐ జస్టిస్ సూర్యకాంత్‌ను ఉద్దేశించి ఓ పోస్టు చేశారు. 'శాంతిభద్రతలు మీ పరిధిలో లేకపోతే రాజీనామా చేయండి. ఆ బాధ్యతలను సమర్థంగా నిర్వహించగల మరొకరిని నియమిస్తాం' అనే అర్థం వచ్చేలా వ్యాఖ్యలు చేశారు. ఈ పోస్టుపై తీవ్ర విమర్శలు వెల్లువెత్తడంతో దాన్ని తొలగించారు. అయితే, పార్టీ నాయకత్వానికి తెలియకుండా, వారి అనుమతి లేకుండానే ఓ కార్యకర్త ఈ పోస్టు చేసినట్లు కాంగ్రెస్ వివరణ ఇచ్చింది. సంబంధిత వ్యక్తిని బాధ్యతల నుంచి తొలగించడంతోపాటు బేషరతుగా క్షమాపణ చెప్పినట్లు తెలిపింది.

ఆర్టికల్ 129పై సుప్రీం దృష్టి

ఈ వ్యవహారంలో కేరళ ప్రదేశ్ కాంగ్రెస్ కమిటీ అధ్యక్షుడు, కార్యదర్శి సహా పార్టీ కార్యవర్గ సభ్యులందరికీ కోర్టు ధిక్కరణ చట్టం-1971 కింద నోటీసులు జారీ చేయాలని ధర్మాసనం ఆదేశించింది. వ్యక్తిగతంగా కోర్టుకు హాజరు కావాల్సిన అవసరం లేదని స్పష్టం చేసింది. అందుబాటులో ఉన్న ఆధారాలను పరిశీలించిన అనంతరం రాజ్యాంగంలోని ఆర్టికల్ 129 కింద సుప్రీంకోర్టుకు ఉన్న అధికారాలను వినియోగించాలా? లేదా? అన్నది నిర్ణయిస్తామని పేర్కొంది.