Rahul Gandhi Ramlila Maidan Speech | జ్ఞానేశ్ కుమార్ జైలుకెళ్లడం ఖాయం.. తర్వాత మోదీ నీ వంతే!

• 2024 ఎన్నికలు చెల్లవు
• ఢిల్లీ రాంలీలా మైదాన్ వేదికగా రాహుల్ గాంధీ నిప్పులు

Rahul Gandhi Ramlila Maidan Speech | త్రినేత్ర న్యూస్ : దేశ రాజధానిలోని చారిత్రక రాంలీలా మైదాన్ వేదికగా లోక్‌సభ ప్రతిపక్ష నేత రాహుల్ గాంధీ కేంద్ర ప్రభుత్వంపై తీవ్రస్థాయిలో గర్జించారు. ఆదివారం జరిగిన ఇండియా (INDIA) కూటమి 'ఛలో ఢిల్లీ' మహా ర్యాలీలో ప్రసంగించిన ఆయన, చీఫ్ ఎలక్షన్ కమిషనర్ (CEC) జ్ఞానేశ్ కుమార్‌పై మునుపెన్నడూ లేని రీతిలో విరుచుకుపడ్డారు. దేశంలో ఓట్ల తొలగింపు సాధారణ అంశం కాదని, ఇది రాజ్యాంగ విరుద్ధమైన దేశద్రోహ చర్య అని మండిపడ్డారు. ఈసీ జ్ఞానేశ్ కుమార్‌ను పదవి నుంచి తొలగించి జైలుకు పంపడం ఖాయమని, ఆ తర్వాత ప్రధాని మోదీ, అమిత్ షాలు కూడా తప్పించుకోలేరని తీవ్ర స్వరంతో హెచ్చరించారు.

2024 ఎన్నికలు అక్రమం.. ఓట్ల చోరీ జరిగింది

2024 సార్వత్రిక ఎన్నికలు పారదర్శకంగా జరగలేదని రాహుల్ గాంధీ ఆరోపించారు. "2024 లోక్‌సభ ఎన్నికలు దొంగిలించబడ్డాయి. ఈవీఎంల ట్యాంపరింగ్, ఓటరు జాబితాల్లో పేర్లను తొలగించడం, అక్రమంగా చేర్చడం ద్వారా బీజేపీ గెలిచింది. 2024 ఎన్నికల తర్వాత దేశంలో ఏకంగా 15 శాతం మంది ఓటర్ల పేర్లను జాబితాల నుంచి తొలగించారు. మా కూటమికి, ఎన్డీయేకు మధ్య ఉన్న ఓట్ల తేడా కేవలం 3 శాతమే. ఈ లెక్కన 2024 ఎన్నికలు పూర్తిగా చట్టవిరుద్ధం" అని ఆయన పేర్కొన్నారు. ఈ గణాంకాలు స్వయంగా ఎన్నికల సంఘం డేటానే వెల్లడిస్తోందని గుర్తు చేశారు. మధ్యప్రదేశ్, హర్యానా, ఛత్తీస్‌గఢ్, మహారాష్ట్ర, కర్ణాటక ఎన్నికల్లో కూడా ఇలాంటి ఓట్ల దొంగతనాలు జరిగాయని ఆరోపించారు.

మోదీ ఎక్కడికీ పారిపోలేరు.. విచారణ తప్పదు: రాహుల్ వార్నింగ్

"ఈ రోజు దేశంలో యువత, రైతులు, కార్మికులకు దక్కాల్సిన హక్కులను లాక్కుని కేవలం ఇద్దరు ముగ్గురు పారిశ్రామికవేత్తల చేతుల్లో పెడుతున్నారు. విద్యా వ్యవస్థ నుంచి దర్యాప్తు సంస్థల దాకా అన్నింటినీ ఆర్ఎస్ఎస్ కంట్రోల్ చేస్తోంది. జ్ఞానేశ్ కుమార్ సహకారం లేకుండా మోదీ ప్రధాని కాలేరు, అమిత్ షా హోంమంత్రి కాలేరు" అని రాహుల్ ధ్వజమెత్తారు.

"మోదీ ఎక్కడికీ వెళ్లలేరు. జ్ఞానేష్ కుమార్‌ను జైలుకు పంపిన తర్వాత తదుపరి మా టార్గెట్ మీరే. దేశంలోని ప్రజల గొంతుకను దొంగిలించేవారిని మేము ఎట్టిపరిస్థితుల్లో వదిలిపెట్టబోము. రాజ్యాంగాన్ని నాశనం చేయనివ్వం" అని స్పష్టం చేశారు. పరమశివుడి పెళ్లి ఊరేగింపులో (శివ్‌జీ కీ బరాత్) అందరికీ ఎలాగైతే ఆహ్వానం ఉంటుందో.. కుల, మత వివక్ష లేకుండా అందరికీ సమాన హక్కులు ఉండే భారతదేశమే తమ లక్ష్యమని రాహుల్ అభివర్ణించారు.

దొంగతనంతో గద్దెనెక్కిన ప్రభుత్వాలు: మల్లికార్జున్ ఖర్గే

కాంగ్రెస్ అధ్యక్షుడు మల్లికార్జున్ ఖర్గే మాట్లాడుతూ కేంద్రంలోని బీజేపీ ప్రభుత్వంపై నిప్పులు చెరిగారు. "ప్రజలు బీజేపీని ఎన్నుకోలేదు.. వాళ్లకు వాళ్లే దొంగతనంగా ఎన్నుకుంటున్నారు. కేంద్రంలోని మోదీ సర్కార్‌తో పాటు మహారాష్ట్ర, బిహార్, ఉత్తరప్రదేశ్ ప్రభుత్వాలన్నీ ఓట్ల చోరీతో ఏర్పడినవే. ఈ ఓట్ల దొంగలను అధికారంలోంచి దింపినప్పుడే దేశంలో ప్రజాస్వామ్యం నిలబడుతుంది" అని ఖర్గే పిలుపునిచ్చారు.

కాంగ్రెస్ తీరుపై బీజేపీ ఎదురుదాడి.. మంత్రుల ఫైర్

రాహుల్ గాంధీ వ్యాఖ్యలపై బీజేపీ నేతలు తీవ్ర ఆగ్రహం వ్యక్తం చేశారు. కేంద్ర మాజీ మంత్రి ధర్మేంద్ర ప్రధాన్ హర్యానాలోని ఫరీదాబాద్‌లో ‘లోక్‌తంత్ర బచావో, అరాజక్త హఠావో’ పేరిట పాదయాత్ర నిర్వహించి మాట్లాడారు. ప్రజాస్వామ్య వ్యవస్థలపై రాహుల్ గాంధీ, కాంగ్రెస్‌కు విశ్వాసం లేకుండా పోయిందని, దేశంలో అరాజకం సృష్టించేందుకే కాంగ్రెస్ యత్నిస్తోందని విమర్శించారు.

మరోవైపు కేంద్ర మంత్రి గజేంద్ర సింగ్ షెకావత్ గోవాలో మీడియా సమావేశంలో మాట్లాడుతూ కాంగ్రెస్ వైఖరిని తప్పుబట్టారు. ఓటరు జాబితాల ప్రత్యేక సమగ్ర సవరణ (SIR) అనేది రాజ్యాంగబద్ధమైన ప్రక్రియ అని స్పష్టం చేశారు. గత రెండు దశాబ్దాల్లో 40 కోట్ల మంది ప్రజలు వలస వెళ్లారని, దాదాపు 20 కోట్ల మంది మరణించారని పేర్కొన్నారు. ఎస్ఐఆర్ ప్రక్రియలో భాగంగా 2.8 కోట్ల మంది మరణించిన వారి పేర్లతో సహా మొత్తం 13 కోట్ల బోగస్ లేదా డూప్లికేట్ ఎంట్రీలను తొలగించి, 1.9 కోట్ల కొత్త ఓటర్లను చేర్చినట్లు వివరించారు. స్వచ్ఛమైన ఓటరు జాబితాలను రూపొందిస్తుంటే రాజకీయ ప్రయోజనాల కోసం కాంగ్రెస్ గగ్గోలు పెడుతోందని ఆయన మండిపడ్డారు.

#WATCH | INDIA bloc mega rally | Delhi: Lok Sabha LoP Rahul Gandhi says, "Listen to me. What I say always turns out to be true, doesn't it? I am telling every citizen and every youth of India: Gyanesh Kumar will be removed from the post of Chief Election Commissioner. Gyanesh Kumar will go to jail."

"Without Gyanesh Kumar, neither Narendra Modi would have become Prime Minister nor Amit Shah would have become Home Minister."

"The farmer is not getting his rights. The youth are not getting employment. The labourer is not getting his rights, and the entire wealth has gone into the hands of two or three people. We do not want such an India, and we will not accept such an India."

(Source: ANI/Congress)

— ANI (@ANI) November 1, 2026