Abhijeet Dipke CJP | జ్ఞానేష్ కుమార్ కోసం సొంత దేశ ప్రజలపైనే యుద్ధం చేస్తున్నారు

• ప్రధాని మోదీ, అమిత్ షాలపై సీజేపీ నేత అభిజీత్ దిప్కే తీవ్ర విమర్శలు

Abhijeet Dipke CJP | త్రినేత్ర న్యూస్ : చీఫ్ ఎలక్షన్ కమిషనర్ (CEC) జ్ఞానేష్ కుమార్‌ను కాపాడుకోవడం కోసమే ప్రధాని నరేంద్ర మోదీ, కేంద్ర హోంమంత్రి అమిత్ షా తమ సొంత దేశ ప్రజలపై 'యుద్ధం' ప్రకటిస్తున్నారని 'కాక్రోచ్ జనతా పార్టీ' (CJP) కీలక నేత అభిజీత్ దిప్కే తీవ్ర ఆరోపణలు చేశారు. సీఈసీ రాజీనామా డిమాండ్ చేస్తూ నిరసనలు తెలుపుతున్న యువకులు, ప్రతిపక్ష నేతలను అక్రమంగా నిర్బంధించడాన్ని ఆయన తప్పుబట్టారు.

సీజేపీ నేతలు సౌరవ్ దాస్, అశుతోష్ రంకాలు జ్యుడీషియల్ కస్టడీలో భాగంగా తీహార్ జైలుకు వెళ్లిన మరుసటి రోజు అభిజీత్ దిప్కే మీడియాతో మాట్లాడారు. కేవలం ఒక్క వ్యక్తిని కాపాడటం కోసమే దేశంలో ఇంతటి అణచివేత సాగుతోందని ఆయన ఆగ్రహం వ్యక్తం చేశారు.

'ఒక్క జ్ఞానేష్ కుమార్ కోసం ఇంత అణచివేతా?'

ఈ సందర్భంగా అభిజీత్ దిప్కే మాట్లాడుతూ.. "ఈ దేశంలోని యువత, వివిధ సంఘాలు రోడ్ల మీదకు వచ్చి పోరాడుతున్నాయి. వారిని రోడ్లపై ఈడ్చుకెళ్తున్నారు. నేహాను ఈడ్చారు, అయేషాను ఈడ్చేశారు, విలాజ్‌ను, ఈషాను బలవంతంగా అడ్డుకున్నారు. ఎవరి కోసం? కేవలం ఒక్క జ్ఞానేష్ కుమార్‌ను కాపాడటం కోసమేనా?" అంటూ ప్రశ్నించారు.

అంతేకాకుండా, సీఈసీ తీరును వ్యతిరేకిస్తూ నిరసన తెలిపిన లోక్‌సభ ప్రతిపక్ష నేతతో పాటు.. మమతా బెనర్జీ, అరవింద్ కేజ్రీవాల్ వంటి ప్రముఖ రాజకీయ నాయకులను సైతం పోలీసులు నిర్బంధించారని ఆయన గుర్తుచేశారు. అక్టోబర్ 10న నిరసనలకు పిలుపునిచ్చిన సమయంలో రైలు సర్వీసులు సైతం నిలిపివేశారని, ఈ చర్యలన్నీ ఎవరి ప్రయోజనాల కోసం అంటూ ఆయన కేంద్ర ప్రభుత్వాన్ని నిలదీశారు.

తీహార్ జైలుకు సీజేపీ నేతలు.. అసలేం జరిగింది?

మంగళవారం ఉదయం పోలీసు బారికేడ్లను దాటుకుని జంతర్ మంతర్లోకి దూసుకెళ్లిన సీజేపీ నేతలు సౌరవ్ దాస్, అశుతోష్ రంకా, అజింక్య షిండేలు సీఈసీ జ్ఞానేష్ కుమార్ వెంటనే రాజీనామా చేయాలంటూ నినాదాలు చేశారు.

విధుల్లో ఉన్న ప్రభుత్వ అధికారులను అడ్డుకున్నారనే ఆరోపణలతో పోలీసులు వీరిని అదుపులోకి తీసుకున్నారు. ఆ తర్వాత కోర్టులో హాజరుపరచగా.. సౌరవ్ దాస్, అశుతోష్ రంకాలకు జ్యుడీషియల్ కస్టడీ విధించడంతో వారిని తీహార్ జైలుకు తరలించారు. మరో నిరసనకారుడు అజింక్య షిండేను వ్యక్తిగత పూచీకత్తుపై విడుదల చేసినట్లు సీజేపీ లీగల్ టీమ్ హెడ్ రత్నా సింగ్ సోషల్ మీడియా వేదికగా వెల్లడించారు. ఎన్నికల సంఘం పనితీరును ప్రశ్నిస్తూ యువజన సంఘాలు చేపట్టిన ఈ ఆందోళనలు దేశవ్యాప్తంగా తీవ్ర చర్చనీయాంశంగా మారాయి.