Imran Khan Leave India Notice | అక్టోబర్ 28లోగా భారత్ విడిచి వెళ్లిపోవాలి: బాలీవుడ్ నటుడు ఇమ్రాన్ ఖాన్‌కు ముంబై పోలీసుల నోటీసులు

Imran Khan Leave India Notice | త్రినేత్ర న్యూస్ : బాలీవుడ్ సూపర్ స్టార్ ఆమిర్ ఖాన్ మేనల్లుడు, ప్రముఖ నటుడు ఇమ్రాన్ ఖాన్‌కు ముంబై పోలీసులు ఊహించని షాక్ ఇచ్చారు. ఈ నెల (అక్టోబర్) 28వ తేదీలోగా భారత్ విడిచి వెళ్లిపోవాలని ఆయనకు అధికారికంగా నోటీసులు జారీ చేశారు. ఇటీవల ముంబైలో 'కాక్రోచ్ జనతా పార్టీ' (CJP) నిర్వహించిన నిరసన కార్యక్రమంలో పాల్గొన్నందుకే పోలీసులు ఈ కఠిన నిర్ణయం తీసుకున్నారు.

అసలు వివాదం ఏంటి? ఏ చట్టం కింద చర్యలు తీసుకున్నారు?

ఇమ్రాన్ ఖాన్‌కు పూర్తిస్థాయి భారత పౌరసత్వం లేదు. ఆయనకు అమెరికా సిటిజన్‌షిప్ (US Citizenship) తో పాటు కేవలం 'ఓవర్సీస్ సిటిజన్ ఆఫ్ ఇండియా' (OCI) కార్డు మాత్రమే ఉంది. నిబంధనల ప్రకారం ఓసీఐ కార్డు ఉన్న విదేశీ పౌరులు భారత్‌లో రాజకీయ ఆందోళనల్లో పాల్గొనకూడదు.

భారత పౌరుడు కాకపోయినా సరే ఈ నిరసనలో పాల్గొన్నందుకుగాను 'ఇమ్మిగ్రేషన్ అండ్ ఫారినర్స్ యాక్ట్, 2025' (Immigration and Foreigners Act, 2025) లోని నిబంధనల ప్రకారం ఆయనపై చర్యలు తీసుకున్నట్లు ముంబై పోలీసులు వెల్లడించారు. ఈ చట్టంలోని సెక్షన్ 7 ప్రకారం.. విదేశీయుల రాకపోకలను నియంత్రించే లేదా వారిని దేశం విడిచి వెళ్లమని ఆదేశించే అధికారం కేంద్ర ప్రభుత్వానికి ఉంటుంది. అంతకుముందు, ఇమ్రాన్ ఖాన్ వీసా, ఓసీఐ నిబంధనలను ఉల్లంఘించి చట్టవిరుద్ధమైన రాజకీయ ఆందోళనలో పాల్గొన్నారని, ఆయనపై కేసు నమోదు చేయాలని బీజేపీ నేత కిరీట్ సోమయ ముంబై పోలీసులకు ఫిర్యాదు చేశారు.

ఆగస్ట్ క్రాంతి మైదాన్‌లో అసలేం జరిగింది?

అక్టోబర్ 10న ముంబైలోని ఆగస్ట్ క్రాంతి మైదాన్‌లో చీఫ్ ఎలక్షన్ కమిషనర్ (CEC) జ్ఞానేష్ కుమార్‌కు వ్యతిరేకంగా CJP ఆధ్వర్యంలో నిరసన జరిగింది. ఈ కార్యక్రమానికి ఇమ్రాన్ ఖాన్ తన పార్ట్‌నర్, నటి లేఖా వాషింగ్టన్, కజిన్ జైన్ మేరీ ఖాన్‌తో కలిసి హాజరయ్యారు. ఆ సమయంలో పోలీసులు వీరి ముగ్గురితో పాటు సుమారు 400 మందిని అదుపులోకి తీసుకుని, ఆ తర్వాత విడుదల చేశారు.

ఈ నిరసనలో మహాత్మా గాంధీ మునిమనవడు తుషార్ గాంధీ నేతృత్వంలోని 'హమ్ భారత్ కే లోగ్' సంస్థ సభ్యులు, సీపీఐ(ఎం) కార్యకర్తలు కూడా పాల్గొన్నారు.

పోలీస్ వ్యాన్ నుంచి ఇమ్రాన్ ఖాన్ సెల్ఫీ వైరల్

పోలీసులు తనను అదుపులోకి తీసుకున్న సమయంలో ఇమ్రాన్ ఖాన్ పోలీస్ వ్యాన్ లోపల కూర్చుని ఒక సెల్ఫీ తీసుకున్నారు. "నేను ఒక డ్రైవ్‌కు వెళ్తున్నట్లున్నాను" (Apparently I'm going for a drive) అనే క్యాప్షన్‌తో ఆ ఫోటోను సోషల్ మీడియాలో పోస్ట్ చేయగా అది వైరల్ అయింది. మరో వీడియోలో ఆయన పోలీసులకు 'జై హింద్' చెబుతూ కనిపించారు.

"మమ్మల్ని ఎందుకు ఇక్కడికి తీసుకొచ్చారో నిజంగా నాకు తెలియదు. రోడ్డు మీద ఉన్న మమ్మల్ని వ్యాన్‌లలో కూర్చోబెట్టి దాదాపు రెండు గంటల పాటు సిటీ అంతా తిప్పి ఆ తర్వాత వదిలేశారు" అని ఇమ్రాన్ ఖాన్ మరో వీడియో క్లిప్‌లో పేర్కొన్నారు.

'ముంబై పౌరుడిగానే అక్కడికి వెళ్లాను'

ఈ ఘటనపై మీడియాతో మాట్లాడిన ఇమ్రాన్ ఖాన్.. తాను ఎలాంటి డిమాండ్లతో అక్కడికి రాలేదని చెప్పారు. "ఈ నగరంలో నివసించే ఒక సాధారణ ముంబై పౌరుడిగా మాత్రమే నేను ఇక్కడికి వచ్చాను. ప్రజల రాకపోకలను ఎందుకు అడ్డుకుంటున్నారు? వారి గొంతును ఎందుకు నొక్కేస్తున్నారు? అనేది చూడటానికే నేను ఇక్కడికి వచ్చాను" అని వివరణ ఇచ్చారు. అయితే, సాంకేతికంగా ఆయన అమెరికా పౌరుడు కావడంతో ఇప్పుడు దేశం విడిచి వెళ్లాల్సిన పరిస్థితి ఏర్పడింది.

Today I wrote & spoke to Gamdevi Police Station Mumbai that FIR filed against Foreign Citizen Actor #ImranKhan is INCOMPLETE

I will visit Gamdevi Police Station tomorrow 12 October afternoon at 12.30pm

Imran Khan should be charged for taking part in illegal political agitation, violation of OCI Provisions, VISA conditions.... Foreign Citizen don't have similar rights as Indian Citizens

— Kirit Somaiya (@KiritSomaiya) October 11, 2026