Pawan Kalyan on Vijay | తమిళనాడు పరిస్థితులు వేరు, మనవి వేరు: విజయ్ పొలిటికల్ ఎంట్రీ పోలికలపై పవన్ కల్యాణ్ ఆసక్తికర వ్యాఖ్యలు

• తమిళనాడు రాజకీయాలకు, ఏపీ పరిస్థితులకు చాలా తేడా ఉందని స్పష్టం చేసిన పవన్ కల్యాణ్
• విజయ్ లాగా ఒంటరిగా ఎందుకు పోటీ చేయలేదని క్యాడర్ నుంచి పదే పదే ప్రశ్నలు వస్తున్నాయని వెల్లడి
• పదవుల కంటే సిద్ధాంతాలు, రాష్ట్ర భవిష్యత్తే తనకు ముఖ్యమని స్పష్టీకరణ
• చంద్రబాబు అరెస్ట్ తర్వాత రాష్ట్ర ప్రయోజనాల కోసమే టీడీపీ, బీజేపీలతో పొత్తు పెట్టుకున్నట్లు వివరణ

Pawan Kalyan on Vijay | త్రినేత్ర.న్యూస్ : మంగళగిరిలోని జనసేన పార్టీ ప్రధాన కార్యాలయంలో జరిగిన సమావేశంలో ఆంధ్రప్రదేశ్ డిప్యూటీ సీఎం, జనసేనాని పవన్ కల్యాణ్ ఆసక్తికర వ్యాఖ్యలు చేశారు. తమిళనాడులో దళపతి విజయ్ రాజకీయాల్లోకి ఎంట్రీ ఇచ్చిన కొద్ది కాలంలోనే సీఎం కావడం, ఏపీలో జనసేన మాత్రం పొత్తుల ద్వారా వెళ్లడంపై వస్తున్న పోలికలపై ఆయన స్పందించారు. రెండు రాష్ట్రాల రాజకీయ పరిస్థితులను ఒకే గాటన కట్టలేమని తేల్చి చెప్పారు.

ఒంటరిగా ఎందుకు వెళ్లలేదంటే

తమిళగ వెట్రి కజగం (TVK) పార్టీని స్థాపించిన విజయ్.. అనతికాలంలోనే ముఖ్యమంత్రి పీఠాన్ని అధిరోహించడాన్ని పవన్ ప్రస్తావించారు. "తమిళనాడులో విజయ్ సీఎం అవ్వడం చూసిన తర్వాత, మనమెందుకు ఏపీలో పొత్తు పెట్టుకున్నాం? స్వతంత్రంగా ఎందుకు పోటీ చేయలేదు? అని చాలా మంది నన్ను అడుగుతున్నారు. కానీ, తమిళనాడు పరిస్థితులు వేరు, ఆంధ్రప్రదేశ్ పరిస్థితులు వేరు," అని పవన్ వివరించారు.

పదవుల కంటే సిద్ధాంతమే ముఖ్యం

జనసేన పార్టీని కేవలం పదవులు, అధికారాల కోసం పెట్టలేదని ఆయన స్పష్టం చేశారు. "రాజకీయాలు సామాజిక మార్పును తీసుకురావాలన్న ఉద్దేశంతోనే నేను ఈ పార్టీని ప్రారంభించాను. ఎన్టీఆర్ రాజకీయ ప్రయాణాన్ని దగ్గరుండి చూశాను. అలాగే సిద్ధాంతాల కోసం ప్రాణత్యాగం చేసిన ఎంతో మంది యువతను నక్సలిజం సమయంలో చూశాను. ఆ అనుభవాలు నా ఆలోచనా విధానాన్ని తీవ్రంగా ప్రభావితం చేశాయి" అని పవన్ చెప్పుకొచ్చారు. తనకు పదవుల కంటే ఐడియాలజీకి (Ideology) కట్టుబడి ఉండటమే ముఖ్యమన్నారు.

ఆ నిర్ణయానికి కారణం అదే

2024 ఎన్నికల్లో జనసేన ఒంటరిగా పోటీ చేసి ఉండాల్సిందని ఇప్పటికీ క్యాడర్ (Cadre) బలంగా నమ్ముతోందని పవన్ అంగీకరించారు. "టీడీపీతో పొత్తు కంటే మనం ఒంటరిగా పోరాడాల్సిందని మీలో చాలా మంది భావిస్తున్నారు. ఆ మాట నాకు పదేపదే వినిపిస్తోంది" అని అన్నారు. అయితే, ఏపీ రాజకీయ స్థిరత్వాన్ని దృష్టిలో ఉంచుకుని "సుదీర్ఘ ఆలోచన" తర్వాతే టీడీపీ, బీజేపీలతో పొత్తు నిర్ణయం తీసుకున్నట్లు ఆయన సమర్థించుకున్నారు.

చంద్రబాబు అరెస్ట్ ఒక టర్నింగ్ పాయింట్

"మచిలీపట్నం సభకు సుమారు 10 లక్షల మంది వచ్చారు. ఒంటరిగా పోటీ చేసే సత్తా మాకు ఉంది. కానీ ఆ సమయంలో ఏపీ అత్యంత కీలక దశలో ఉంది," అని పవన్ గుర్తుచేశారు. 2023లో టీడీపీ అధినేత చంద్రబాబు నాయుడు అరెస్ట్ కావడం రాష్ట్ర రాజకీయాల్లో ఒక టర్నింగ్ పాయింట్ అని ఆయన పేర్కొన్నారు. "మా మధ్య కొన్ని విషయాల్లో భేదాభిప్రాయాలు ఉన్నప్పటికీ, మేం కలుస్తూనే ఉన్నాం. చంద్రబాబు లాంటి నాయకుడిని జైలులో పెట్టినప్పుడు, అది రాష్ట్రానికి ఒక క్లిష్ట సమయం," అని వివరించారు. రాష్ట్ర భవిష్యత్తు కోసం పొత్తులు (Alliances) అనివార్యమయ్యాయని, స్థిరత్వం ముందు రాజకీయ అహంకారానికి చోటు లేదని పవన్ తేల్చి చెప్పారు.

తమిళనాడులో విజయ్ సంచలనం

తమిళనాడు అసెంబ్లీ ఎన్నికల్లో TVK పార్టీ 108 సీట్లతో అతిపెద్ద పార్టీగా అవతరించిన సంగతి తెలిసిందే. చెన్నైలో జరిగిన గ్రాండ్ సెర్మనీలో విజయ్ ముఖ్యమంత్రిగా ప్రమాణ స్వీకారం చేశారు. సొంతంగా మెజారిటీ రానప్పటికీ, 144 మంది ఎమ్మెల్యేల మద్దతుతో ఆయన అసెంబ్లీలో విశ్వాస పరీక్షను సునాయాసంగా నెగ్గారు. నాటకీయ పరిణామాల మధ్య డీఎంకే, డీఎండీకే సభ్యులు వాకౌట్ చేయగా.. ఏఐఏడీఎంకే క్యాంప్‌లోని కొన్ని వర్గాలు కొత్త ప్రభుత్వానికి మద్దతు తెలపడం విశేషం. ఈ అద్భుత విజయ ప్రస్థానం నేపథ్యంలోనే పవన్ కల్యాణ్ చేసిన వ్యాఖ్యలు ప్రాధాన్యత సంతరించుకున్నాయి.