Neet Row | నీట్ మంటలు.. జెన్ జి ఉద్యమం… విపక్షాల రాజకీయ దాడి

ధర్మేంద్ర ప్రధాన్ రాజీనామాపై ఎన్డీయే మౌనం వెనుక అసలు రహస్యం! ఇదే

Neet Row | జాతీయ అర్హత సాధన ప్రవేశ పరీక్ష (NEET) అక్రమాలు, ప్రశ్నాపత్రాల లీకేజీ వ్యవహారం దేశవ్యాప్తంగా మిలియన్ల మంది విద్యార్థులు, పోరాట సంఘాలను తీవ్ర ఆగ్రహానికి గురిచేసింది. "విద్యాశాఖ మంత్రి తక్షణమే రాజీనామా చేయాలి" అంటూ విపక్షాలు పార్లమెంట్ భవనం నుంచి వీధుల వరకు హోరెత్తించాయి. అయితే, ఇంతటి తీవ్ర నిరసనలు వెల్లువెత్తుతున్నా ఎన్డీయే (NDA) అగ్రనాయకత్వం మాత్రం ధర్మేంద్ర ప్రధాన్ రాజీనామా విషయంలో తీవ్ర మౌనం పాటిస్తూ, ఆయనకు కొండంత అండగా నిలుస్తోంది. పైకి సాధారణ విమర్శలుగా కనిపిస్తున్న ఈ వ్యవహారం వెనుక అత్యంత వ్యూహాత్మకమైన "కమల రాజకీయం", ఒడిశా రాష్ట్ర సమీకరణాలు దాగి ఉన్నాయి. ఆ అసలు రహస్యాలు ఏంటో చూద్దాం:

1. తమిళ అధికారిని ఓడించిన 'ఒడియా ఆత్మగౌరవ' నినాదం

ఈ వివాదాన్ని అర్థం చేసుకోవాలంటే ఒడిశా ఎన్నికల నేపథ్యాన్ని పరిశీలించాలి. 24 ఏళ్ల నవీన్ పట్నాయక్ (BJD) సుదీర్ఘ పాలనకు చరమగీతం పాడటానికి బిజెపి వాడిన అతిపెద్ద ఆయుధం: "ఒడియా అస్మిత" (ఒడియా ఆత్మగౌరవం). పట్నాయక్ నీడగా మారిన తమిళనాడుకు చెందిన మాజీ ఐఏఎస్ అధికారి వి.కె. పాండియన్ చేతుల్లోకి పాలన వెళ్లిపోయిందని బిజెపి బలంగా ప్రచారం చేసింది. ఈ 'తమిళ వ్యతిరేక - ప్రాంతీయ ఆత్మగౌరవ' సెంటిమెంట్‌కు అసలైన సూత్రధారి ధర్మేంద్ర ప్రధానే. తమిళ అధికారి ప్రభావాన్ని దెబ్బతీసి, ఒడిశాలో బిజెపికి తొలిసారి చారిత్రాత్మక విజయాన్ని కట్టబెట్టిన అగ్రనేత ఆయనే.

2. పీఠం గిరిజనుడికి.. రిమోట్ ప్రధాన్ చేతికి!

రాష్ట్రంలో గెలిచిన వెంటనే ధర్మేంద్ర ప్రధాన్ సీఎం అవుతారని భావించినప్పటికీ, బిజెపి అధిష్ఠానం ఒక పెద్ద మాస్టర్ స్ట్రోక్ వేసింది.ఒడిశాలో 22 శాతానికి పైగా ఉన్న గిరిజనులను ఆకట్టుకునేందుకు, సాధారణ గిరిజన (సంతాల్ తెగ) నేత మోహన్ చరణ్ మాఝీని ముఖ్యమంత్రిని చేసింది. సీఎం మాఝీకి పరిపాలనా అనుభవం తక్కువ కావడంతో, ఢిల్లీలో సీనియర్ మంత్రిగా ఉన్న ధర్మేంద్ర ప్రధానే కేంద్ర-రాష్ట్ర ప్రభుత్వాల మధ్య వారధిగా, నూతన ప్రభుత్వానికి "మార్గదర్శి"గా వ్యవహరిస్తున్నారన్నది కమలం పార్టీలోనే గుసగుసలు ఉన్నాయి.

3. ప్రధాన్‌ను తప్పిస్తే జరిగే రాజకీయ నష్టం

ఇంతటి వ్యూహాత్మక నేపథ్యం ఉన్న నేతను విద్యాశాఖ నుంచి తప్పిస్తే బిజెపికి అనేక రాజకీయ చిక్కులు ఎదురవుతాయి: తమిళ అధికారిని తరిమికొట్టి "ఒడియా ఆత్మగౌరవాన్ని" నిలబెట్టామని చెప్పిన బిజెపి, ఇప్పుడు ఢిల్లీలోని విపక్షాల ఒత్తిడికి తలొగ్గి ఒడిశాకు చెందిన తమ సొంత నేతను పదవి నుంచి తొలగిస్తే, అది ఒడిశా ప్రజల్లోకి ప్రతికూల సంకేతాన్ని తీసుకెళ్తుంది.ప్రధాని మోదీ నేతృత్వంలోని ఎన్డీయే సర్కార్ ఎప్పుడూ విపక్షాల డిమాండ్లకు భయపడి మంత్రుల చేత రాజీనామాలు చేయించిన దాఖలాలు లేవు. ఇప్పుడు ప్రధాన్ రాజీనామా చేస్తే, అది ప్రతిపక్షాల విజయంగా ప్రచారంలోకి వస్తుందని కమలనాధులు భావిస్తున్నారు. నీట్ వ్యవహారాన్ని ఒక వ్యక్తిగత వైఫల్యంగా కాకుండా, నేషనల్ టెస్టింగ్ ఏజెన్సీ (NTA) వ్యవస్థలోని లోపంగా చూపించడంలో ప్రభుత్వం సఫలమైంది. తద్వారా విచారణను సీబీఐ (CBI)కి అప్పగించి, మంత్రిని సురక్షితంగా కాపాడుకుంటూ వస్తున్నారు.

పదవి నుండి తప్పించే విషయంలో వ్యూహాత్మక మౌనం

బాహ్య ప్రపంచానికి నీట్ అనేది కేవలం లక్షలాది మంది విద్యార్థుల భవిష్యత్తు మరియు విద్యావ్యవస్థ సమస్యగా కనిపిస్తున్నప్పటికీ.. ఎన్డీయే పాలకులకు మాత్రం అది తూర్పు భారతదేశంలో సాధించిన అతిపెద్ద రాజకీయ విజయాన్ని, ఒడిశాలో నూతన ప్రభుత్వాన్ని కాపాడుకునే ప్రక్రియ. అందుకే, బయట విపక్షాల నిరసనలు, విద్యార్థుల ఆందోళనలు ఎంత హోరెత్తుతున్నా.. ఎన్డీయే పాలకులు మాత్రం ధర్మేంద్ర ప్రధాన్ రాజీనామా అనే మాటపై పెదవి విప్పకుండా మౌనంగానే ఆయనకు మద్దతు తెలుపుతున్నారు. అయితే ఉద్యమం తీవ్రతరం అయ్యే కొద్ది మంత్రి రాజీనామా విషయంలో ఏదో ఒక నిర్ణయాన్ని ఎన్డీఏ పాలకులు తీసుకోకపోతే రాజకీయంగా దేశ వ్యాప్తంగా ఇబ్బందులు తప్పవని మాత్రం తెలుస్తోంది. అయితే ఈ సమస్యను కమలనాథులు ఎలా పరిష్కరిస్తారో వేచిచూడాల్సిందే.

- వై సుధాక‌ర్ రావు, జ‌ర్న‌లిస్ట్‌