MLC Election Results 2026 | రూలింగ్ పార్టీలకు ‘ఎమ్మెల్సీ’ షాక్.. చదువుకున్న ఓటర్ల ఆగ్రహం

• అధికార పక్షాలకు ఎమ్మెల్సీ 'షాక్ ట్రీట్‌మెంట్'
• కర్ణాటకలో కాంగ్రెస్‌కు జీరో
• 4 స్థానాల్లోనూ ఎన్డీయే క్లీన్‌స్వీప్
• మహారాష్ట్ర, యూపీల్లో బీజేపీ కూటమికి దెబ్బ
• మహారాష్ట్రలో 'మహాయుతి'కి షాక్
• ఆర్ఎస్ఎస్ అడ్డా, ఫడ్నవీస్ కంచుకోట నాగ్‌పూర్‌లో కాంగ్రెస్ జెండా
• మోదీ ఇలాకా వారణాసిలో అఖిలేష్ పార్టీ జోరు
• బిహార్‌లో 30 ఏళ్ల బీజేపీ స్థానాన్ని లాక్కున్న ఆర్జేడీ
• నిరుద్యోగం, ఉద్యోగ సమస్యలపై బ్యాలెట్ పేపర్లతో సర్కార్లకు గట్టి హెచ్చరిక

త్రినేత్ర న్యూస్ : నాలుగు రాష్ట్రాల్లోని 28 శాసనమండలి స్థానాలకు జరిగిన ఎన్నికల ఫలితాలు ఆయా రాష్ట్రాల అధికార పార్టీలకు భారీ షాక్ ఇచ్చాయి. ఏ రాష్ట్రంలో ఎవరు అధికారంలో ఉంటే ఆ పార్టీని అక్కడి విద్యావంతులు, ఉపాధ్యాయులు తీవ్రంగా తిరస్కరించడం ఈ తీర్పులో స్పష్టంగా కనిపించింది. మొత్తం 28 స్థానాల్లో బీజేపీ నేతృత్వంలోని ఎన్డీయే 16 సీట్లు సాధించి సంఖ్యాపరంగా పైచేయి సాధించినప్పటికీ.. సొంత కంచుకోటల్లో ఎదురైన పరాజయాలు అధికార పక్షాల వైఫల్యాలను ఎత్తిచూపాయి. కర్ణాటకలో అధికారంలో ఉన్న కాంగ్రెస్‌ను ఓటర్లు ఖాతా కూడా తెరవనీయకుండా జీరోకే పరిమితం చేయగా.. మహారాష్ట్ర, ఉత్తరప్రదేశ్, బిహార్‌లలో ఎన్డీయే అధికార కూటములకు అత్యంత కీలకమైన స్థానాల్లో చేదు అనుభవం ఎదురైంది.

కర్ణాటకలో అధికార పగ్గాలు చేతిలో ఉన్నప్పటికీ కాంగ్రెస్ పార్టీ నాలుగు స్థానాల్లోనూ తుడిచిపెట్టుకుపోవడం ఆ పార్టీకి రాజకీయంగా కోలుకోలేని దెబ్బ. బెంగళూరు, నార్త్-ఈస్ట్, వెస్ట్, సౌత్-ఈస్ట్ స్థానాల్లో బీజేపీ-జేడీఎస్ కూటమి క్లీన్‌స్వీప్ చేసి డీకే శివకుమార్ ప్రభుత్వానికి గట్టి చెంపపెట్టు ఇచ్చింది. మరోవైపు మహారాష్ట్రలో సీఎం దేవేంద్ర ఫడ్నవీస్, కేంద్ర మంత్రి నితిన్ గడ్కరీ స్వస్థలం, ఆర్ఎస్ఎస్ కేంద్ర కార్యాలయం ఉన్న నాగ్‌పూర్ పట్టభద్రుల స్థానంలో కాంగ్రెస్ సిట్టింగ్ సీటును నిలబెట్టుకుని అధికార 'మహాయుతి' కూటమికి షాక్ ఇచ్చింది. ఇక్కడ మొత్తం 5 స్థానాల్లో విపక్ష మహా వికాస్ అఘాడీ 3 స్థానాలు గెలుచుకోగా, అధికార కూటమి కేవలం 2 సీట్లకే పరిమితమైంది. అటు ఉత్తరప్రదేశ్‌లో ప్రధాని నరేంద్ర మోదీ లోక్‌సభ నియోజకవర్గమైన వారణాసిలో సమాజ్‌వాదీ పార్టీ టీచర్స్, గ్రాడ్యుయేట్స్ స్థానాలను కైవసం చేసుకుని యోగి సర్కారుకు బిగ్ ట్విస్ట్ ఇచ్చింది. ఇక బిహార్‌లో దాదాపు మూడు దశాబ్దాలుగా బీజేపీ చేతిలో ఉన్న పట్నా టీచర్స్ స్థానాన్ని ఆర్జేడీ కైవసం చేసుకుని అధికార కూటమికి దిమ్మతిరిగే ఝలక్ ఇచ్చింది.

ఎందుకు తిరగబడ్డారు? ఓటర్ల మైండ్‌సెట్ ఇదే

ఈ ఎన్నికల్లో ఓటు హక్కు వినియోగించుకున్నది సాధారణ ప్రజలు కాదు.. సమాజంలో మార్పును శాసించే విద్యావంతులైన పట్టభద్రులు, ఉపాధ్యాయులు. రాష్ట్రాల్లో అధికారంలో ఉన్న ప్రభుత్వాలు తమ సమస్యలను పరిష్కరించడంలో పూర్తిగా విఫలమయ్యాయన్న ఆగ్రహమే ఈ ఫలితాల్లో ప్రతిబింబించింది. కర్ణాటకలో గ్యారెంటీ పథకాలపై పెట్టిన దృష్టి విద్యా రంగం, ఉపాధి కల్పనపై పెట్టలేదన్న అసంతృప్తి పట్టభద్రుల్లో వ్యక్తమైంది. యూపీ, మహారాష్ట్ర, బిహార్‌లలో పెరుగుతున్న నిరుద్యోగం, పాత పెన్షన్ స్కీమ్ పునరుద్ధరణపై పాలకుల అలసత్వం, నియామక పరీక్షల పేపర్ లీకేజీలు, టీచర్ల సర్వీస్ సమస్యలపై ప్రభుత్వాల ఉదాసీన వైఖరిని విద్యావంతులు తీవ్రంగా పరిగణించారు. సాధారణ ఎన్నికల్లో ఈవీఎంలపై అనుమానాలు వ్యక్తం చేసే నేతలకు.. బ్యాలెట్ పేపర్లతో జరిగిన ఈ ఎన్నికల్లో అధికార వ్యతిరేకతే ప్రధాన అస్త్రంగా మారి సర్కార్లను చావుదెబ్బ కొట్టింది. రానున్న అసెంబ్లీ ఎన్నికలకు ఈ ఫలితాలు అధికార పార్టీలకు స్పష్టమైన వేక్‌అప్ కాల్‌గా నిలిచాయి.