H-1B Visa Interviews | హెచ్1బీ వీసా ఇంటర్వ్యూ కోసం వెయిట్ చేస్తున్న ఇండియన్స్‌కి మరో షాక్

H-1B Visa Interviews | యూఎస్ ప్రెసిడెంట్ డొనాల్డ్ ట్రంప్ భారత్ మీద తన ప్రతాపాన్ని మళ్లీ చూపించాడు. ఇప్పటికే హెచ్1బీ వీసా కోసం జరిగే ఇంటర్వ్యూలను వాయిదా వేసిన యూఎస్ ఎంబసీ అధికారులు, తాజాగా ఆ వాయిదాను మరింత పెంచారు. దీంతో హెచ్1బీ వీసా ఇంటర్వ్యూ కోసం ఎదురు చూస్తున్న అభ్యర్థుల్లో ఆందోళన ఇంకాస్త పెరిగింది. యూఎస్ హెచ్1బీ, హెచ్4 వీసా ఇంటర్వ్యూల కోసం వేల అభ్యర్థులు ఎదురు చూస్తున్నారు. ఇప్పటికే ఇంటర్వ్యూ షెడ్యూల్ అయి బయోమెట్రిక్ కూడా పూర్తయ్యాక డిసెంబర్ 15 నుంచి షెడ్యూల్ అయిన ఇంటర్వ్యూలు అన్నీ రద్దు అయినట్లు యూఎస్ ఎంబసీ ప్రకటించింది. వీసా ఇంటర్వ్యూల కోసం కొత్త రూల్స్ వచ్చాయని, సోషల్ మీడియా వెట్టింగ్ చేయడంలో టైమ్ పడుతున్నందున ఇంటర్వ్యూలను వచ్చే సంవత్సరం ఫిబ్రవరి లేదా మార్చిలో నిర్వహిస్తామని అభ్యర్థులకు ఈమెయిల్స్ ద్వారా వెల్లడించింది. ఇప్పుడు మళ్లీ ఇంటర్వ్యూలను అక్టోబర్ 2026 కి వాయిదా వేస్తున్నట్టు ప్రకటించారు. జనవరి 2026 లో వీసా ఇంటర్వ్యూ షెడ్యూల్ అయిన అభ్యర్థులకు కూడా అక్టోబర్ 2026 కి ఇంటర్వ్యూ రీషెడ్యూల్ అయినట్లుగా మెయిల్స్ వచ్చినట్లు తెలుస్తోంది. జనవరి, ఫిబ్రవరి 2026 లో ఇంటర్వ్యూలు షెడ్యూల్ అయిన అభ్యర్థులు యూఎస్ నుంచి రావద్దని, టికెట్స్ బుక్ చేసుకొని ఉంటే క్యాన్సిల్ చేసుకోవాలని ఇమ్మిగ్రేషన్ లాయర్లు సూచిస్తున్నారు. కొందరైతే ఇప్పటికే యూఎస్ నుంచి ఇండియా వచ్చి ఇంటర్వ్యూలు కాక ఇక్కడే వెయిట్ చేస్తున్నవాళ్లూ ఉన్నారు. ఎందుకు మాటిమాటికి ఇంటర్వ్యూలు వాయిదా వేస్తున్నారు? మాటిమాటికి ఇంటర్వ్యూలను వాయిదా వేయడం వెనుక యూఎస్ వీసాలో వచ్చిన కొత్త రూల్సే అంటున్నారు. హెచ్1బీ వీసా తీసుకునే క్యాండిడేట్ల ఇంటర్వ్యూకు ముందే వాళ్ల సోషల్ మీడియా ప్రొఫైల్స్ని యూఎస్ ఎంబసీ అధికారులు చెక్ చేస్తారు. వాళ్ల సోషల్ మీడియా ప్రొఫైల్స్ అన్నీ క్షుణ్ణంగా తనిఖీ చేశాక వాళ్లకు ఓకే అనిపిస్తేనే ఆ ప్రొఫైల్ని ఇంటర్వ్యూకి ఎంపిక చేస్తారు. ఈ ప్రక్రియ పూర్తి చేయడానికి అధికారులకు చాలా సమయం తీసుకుంటున్నందున ఇంటర్వ్యూలను వాయిదా వేయక తప్పడం లేదని ఎంబసీ అధికారులు చెబుతున్నారు.