Supreme Court | కోర్టుల్లో గూండారాజ్ ఆమోద‌యోగ్యం కాదు : సుప్రీంకోర్టు

Supreme Court | ఢిల్లీ జిల్లాకోర్టులో న్యాయ‌వాది, అత‌ని క్ల‌యింట్‌పై జ‌రిగిన దాడి వ్య‌వ‌హారం సుప్రీంకోర్టు వ‌ర‌కు చేరింది. ఓ న్యాయ‌వాది త‌న పిటిష‌న్‌ను అత్య‌వ‌స‌రంగా విచార‌ణ కోసం జాబితా చేయాల‌ని కోరారు. కోర్టు హాల్‌లోనే త‌న‌తో పాటు క్ల‌యింట్‌పై దాడి జ‌రిగింద‌ని ధ‌ర్మాసంన దృష్టికి తీసుకెళ్లారు. ఈ నెల 7న ఢిల్లీలోని తీస్ హజారీ జిల్లా కోర్టులో అదనపు జిల్లా జడ్జి (ఏడీజే) హర్దీప్ సింగ్ పాల్ కోర్టు హాల్‌లో తనతో పాటు క్లయింట్‌పై దాడి జరిగిందని పేర్కొన్నారు. తన క్లయింట్ త‌ర‌ఫున వాదిస్తున్నప్పుడు, కొంద‌రు గూండాలు వారిపై దాడి చేశారు. దాడి చేసిన వారు కోర్టు గ‌ది త‌లుపును లోపలి నుంచి గడియ పెట్టారని న్యాయవాది కోర్టుకు తెలిపారు. ఆ సమయంలో న్యాయమూర్తి, కోర్టు సిబ్బంది సైతం అక్క‌డే ఉన్నార‌న్నారు.

నిందితుడికి మద్దతు ఇచ్చినందుకే తమపై కూడా దాడి చేశారని న్యాయవాది ఆరోపించారు. ఈ సంద‌ర్భంగా సీజేఐ జ‌స్టిస్ సూర్య‌కాంత్ నేతృత్వంలోని ధ‌ర్మాసనం ఈ ఘ‌ట‌న‌పై తీవ్రంగా స్పందించింది. ఈ ఘటన గురించి ఢిల్లీ హైకోర్టు ప్రధాన న్యాయమూర్తికి తెలియజేశారా? అని సీజేఐ ప్ర‌శ్నించారు. అధికారికంగా లేఖ‌ను రాస్తూ ఓ కాపీని త‌న వ‌ద్ద ఉంచుకోవాల‌ని సూచించింది. ఈ విషయంలో పోలీసులు జోక్యం చేసుకోకపోతే అది చట్ట ఉల్లంఘన అవుతుందని సీజేఐ పేర్కొన్నారు. ఈ ఘ‌ట‌న గూండారాజ్‌గా అభివ‌ర్ణించిన సీజేఐ.. దాడి ఘ‌ట‌న‌ను ఖండించారు. ఇలాంటి సంఘ‌ట‌న‌లు స‌హించ‌బోమ‌ని స్ప‌ష్టం చేసింది. ఈ విష‌యంపై మొద‌ట ఢిల్లీ హైకోర్టు ప్ర‌ధాన న్యాయ‌మూర్తికి ఫిర్యాదు చేయాల‌ని సూచించింది. కోర్టు ప్రాంగ‌ణంలో హింస‌కు తావు లేద‌ని కోర్టు స్ప‌ష్టం చేసింది.