Maharashtra Family Suicide | కన్నీళ్లు పెట్టిస్తున్న ‘షేరూ’ కథ: లోయలో పడి కుటుంబం చనిపోయినా.. 3 రోజులుగా వారి కోసమే ఎదురుచూపులు

• విషాద ఘట్టం
• మూగజీవి నిరీక్షణ
• కన్నీటి కలయిక
• రెస్క్యూ ఆపరేషన్

Maharashtra Family Suicide | త్రినేత్ర.న్యూస్ : మహారాష్ట్రలోని ఛత్రపతి శంభాజీనగర్ జిల్లా తిస్‌గావ్ ప్రాంతంలో ఇటీవల తీవ్ర విషాదం చోటుచేసుకున్న విషయం తెలిసిందే. ఒక స్మార్ట్‌ఫోన్ (iPhone) ఆశ.. ఒకే కుటుంబంలోని ముగ్గురిని బలితీసుకుంది. అయితే, ఈ విషాదం వెనుక అందరి హృదయాలను కలచివేసే మరో సంఘటన ఉంది. తన యజమానులు తిరిగి రారని తెలియని ఒక పెంపుడు కుక్క (Pet dog).. ఏకంగా మూడు రోజుల పాటు వాళ్ల కోసం ఆకలిదప్పులు మర్చిపోయి ఎదురుచూసింది.

అసలేం జరిగిందంటే..

18 ఏళ్ల కునాల్ చంద్‌గుడే అనే యువకుడు తనకు కొత్త ఐఫోన్ కొనివ్వాలని తండ్రిని అడిగాడు. ఆర్థిక ఇబ్బందుల వల్ల ఆయన నిరాకరించడంతో తీవ్ర మనస్తాపానికి గురైన కునాల్.. ఆత్మహత్య చేసుకునేందుకు దగ్గర్లోని ఒక కొండపైకి వెళ్లాడు. అతడిని వారించడానికి తల్లిదండ్రులు, పోలీసులు, ఫైర్ బ్రిగేడ్ సిబ్బంది దాదాపు 3 గంటల పాటు శ్రమించారు.

కానీ, ఎవరి మాట వినకుండా మధ్యాహ్నం 1 గంట ప్రాంతంలో కునాల్ కిందకు దూకేశాడు. అతడిని పట్టుకునే క్రమంలో తండ్రి బ్యాలెన్స్ తప్పి కిందపడిపోగా.. కళ్లెదురుగా జరుగుతున్న దారుణాన్ని చూసి తట్టుకోలేక తల్లి సంగీత కూడా కొండపైనుంచి దూకేసింది. ఈ ఘటనలో ముగ్గురూ ప్రాణాలు వదిలారు.

షేరూ కన్నీటి నిరీక్షణ

కుటుంబ సభ్యులు మరణించిన విషయం తెలియని వారి పెంపుడు కుక్క 'షేరూ'.. మూడు రోజుల పాటు ఆ ఇంట్లోనే ఒంటరిగా ఉండిపోయింది. చుట్టుపక్కల వారు కొంత ఆహారం, నీళ్లు పెట్టినప్పటికీ, తన వాళ్ళు రాకపోవడంతో అది తీవ్ర నిరాశకు గురైంది. రోజుల తరబడి నిరీక్షించడంతో షేరూ పరిస్థితి రోజురోజుకూ క్షీణించింది.

తాతయ్యను చూడగానే ఎమోషనల్..

విషయం తెలిసి కునాల్ తాతయ్య (తండ్రి వాళ్ళ నాన్న) ఆ ఇంటికి చేరుకున్నారు. ఆయనను చూడగానే షేరూ ఒక్కసారిగా ఎమోషనల్ అయిపోయి ఆయనను గట్టిగా హత్తుకుంది. తాతయ్య ఆ మూగజీవిని ఓదార్చి తన చేతులతో ఆహారం తినిపించారు. ఆ దృశ్యం అక్కడున్న వారి కంటతడి పెట్టించింది.

సురక్షితంగా రెస్క్యూ

సమాచారం అందుకున్న 'పెట్ లవర్స్ అసోసియేషన్' (Pet Lovers Association) సభ్యులు అక్కడికి చేరుకుని షేరూను సురక్షితంగా రెస్క్యూ (Rescue) చేశారు. తాతయ్య సాయంతో షేరూను రెస్క్యూ వ్యాన్ ఎక్కించారు. బరువెక్కిన హృదయంతో.. కన్నీటితో తాతయ్య ఆ కుక్కకు వీడ్కోలు పలికారు.

ప్రస్తుతం షేరూను మున్సిపల్ కార్పొరేషన్ షెల్టర్ హోమ్‌లో ఉంచినట్లు అసోసియేషన్ ప్రతినిధి బరెల్ సాంచీస్ తెలిపారు. ఎవరైనా జంతు ప్రేమికులు లేదా దయగల వారు ముందుకొచ్చి షేరూను దత్తత తీసుకుని దానికి ఒక శాశ్వత నివాసం కల్పించాలని వారు విజ్ఞప్తి చేస్తున్నారు.

Pet dog Sheroo was rescued from house in Maharashtra after waiting three days for his family following a tragedy. Upon his arrival, the dog emotionally clung to the deceased owner's grandfather, who comforted and hand-fed him. pet lovers association rescued Sheroo moved him pic.twitter.com/NvI54RRVb0

— Its Viral (@ooky2v) August 24, 2026