త్రినేత్ర News Logo
DIGITAL-NEWS

Kalyan Banerjee Chhath Puja Remarks | పశ్చిమ బెంగాల్ బెంగాలీలదా, లేక బీహారీలదా?

హౌరా స్టేషన్‌లో ఛట్ పూజ ఏర్పాట్లపై టీఎంసీ ఎంపీ కల్యాణ్ బెనర్జీ చేసిన వ్యాఖ్యలు బెంగాల్ రాజకీయాల్లో దుమారం రేపాయి. సీఎం సువేందు అధికారి దీనికి గట్టి కౌంటర్ ఇచ్చారు.

J

National | Published On Nov 16, 2026, 5.52 pm IST

Kalyan Banerjee Chhath Puja Remarks | పశ్చిమ బెంగాల్ బెంగాలీలదా, లేక బీహారీలదా?

సంక్షిప్త సారాంశం

హౌరా రైల్వే స్టేషన్‌లో ఛట్ పూజ అలంకరణలపై టీఎంసీ ఎంపీ కల్యాణ్ బెనర్జీ చేసిన వ్యాఖ్యలు పశ్చిమ బెంగాల్‌లో రాజకీయ దుమారం రేపాయి. బెంగాలీల కంటే బీహారీల పండుగలకే ప్రాధాన్యత ఇస్తున్నారని.. సొంత రాష్ట్రంలో బెంగాలీలు రెండో తరగతి పౌరులుగా మారారని ఆయన ఆరోపించారు. దీనిపై మంత్రి ఇంద్రనీల్ ఖాన్ స్పందిస్తూ.. టీఎంసీ విభజన రాజకీయాలకు పాల్పడుతోందని మండిపడ్డారు. ఛట్ పూజ అనేది సనాతన సంప్రదాయ పండుగ అని.. దుర్గాపూజ, దీపావళి తరహాలోనే దీనికి కూడా ఏర్పాట్లు చేశామని ముఖ్యమంత్రి సువేందు అధికారి స్పష్టం చేశారు.

Advertisement
  • ఛట్ పూజ ఏర్పాట్లపై రాజకీయ రగడ
  • టీఎంసీ ఎంపీ వ్యాఖ్యలపై సీఎం సువేందు అధికారి స్ట్రాంగ్ కౌంటర్

Kalyan Banerjee Chhath Puja Remarks | త్రినేత్ర న్యూస్ : పశ్చిమ బెంగాల్‌లో ఛట్ పూజ (Chhath Puja) ఏర్పాట్ల చుట్టూ తీవ్ర రాజకీయ దుమారం చెలరేగింది. హౌరా రైల్వే స్టేషన్‌లో ప్రభుత్వం చేసిన ఛట్ పూజ అలంకరణలపై తృణమూల్ కాంగ్రెస్ (టీఎంసీ) ఎంపీ కల్యాణ్ బెనర్జీ చేసిన వివాదాస్పద వ్యాఖ్యలు రాష్ట్ర రాజకీయాల్లో అగ్గి రాజేశాయి. బెంగాలీయేతర పండుగలకు అధిక ప్రాధాన్యత ఇస్తూ స్థానిక సంస్కృతిని దెబ్బతీస్తున్నారని ఆయన ఆరోపించగా, అధికార పక్షం నుంచి అంతే స్థాయిలో కౌంటర్ ఎదురైంది.

మీడియాతో మాట్లాడిన కల్యాణ్ బెనర్జీ.. దుర్గాపూజకు కూడా చేయనంత స్థాయిలో ఛట్ పూజకు ఏర్పాట్లు చేశారంటూ విమర్శించారు. "పశ్చిమ బెంగాల్ బెంగాలీలదా? లేక అక్రమంగా చొరబడిన బీహారీలదా? అసలు బెంగాల్‌లో ఇంకా బెంగాలీలు ఉన్నారా?" అంటూ ఆయన ఘాటుగా ప్రశ్నించారు. రాష్ట్రంలో బెంగాలీలు ‘సెకండ్ కేటగిరీ సిటిజన్స్’ (రెండో తరగతి పౌరులు)గా మారిపోయారని, ఇదే పరిస్థితి మరో ఐదేళ్లు కొనసాగితే బెంగాలీల అస్తిత్వమే కనుమరుగయ్యే ప్రమాదం ఉందని ఆయన ఆందోళన వ్యక్తం చేశారు.

ఎంపీ కల్యాణ్ బెనర్జీ వ్యాఖ్యలపై పశ్చిమ బెంగాల్ మంత్రి ఇంద్రనీల్ ఖాన్ తీవ్రంగా స్పందించారు. టీఎంసీ కావాలనే ‘డివైజివ్ పాలిటిక్స్’ (విభజన రాజకీయాలు) చేస్తోందని ఆయన మండిపడ్డారు. గతంలో దుర్గాపూజ నిమజ్జనం, కాళీమాత విగ్రహాన్ని ప్రిజన్ వ్యాన్‌లో తరలించడం, బెంగాలీ భాషా ఉపాధ్యాయుల నియామకాలపై జరిగిన నిరసనలను గుర్తుచేస్తూ.. బెంగాలీ సంస్కృతి గురించి మాట్లాడే నైతిక హక్కు టీఎంసీకి లేదని విమర్శించారు. అన్ని వర్గాల ప్రజలకు తమ పండుగలను జరుపుకునే హక్కు ఉందని, అందుకు అవసరమైన సదుపాయాలు కల్పించడం ప్రభుత్వ బాధ్యత అని ఇంద్రనీల్ ఖాన్ స్పష్టం చేశారు.

మరోవైపు, ముఖ్యమంత్రి సువేందు అధికారి కూడా ఛట్ పూజ ఏర్పాట్లను సమర్థించుకున్నారు. ఛఠ్ పూజ అనేది సనాతన సంప్రదాయంలో భాగమని, అది కేవలం హిందీ మాట్లాడే వారికో లేదా బీహార్ ప్రజలకో మాత్రమే పరిమితమైన పండుగ కాదని ఆయన పేర్కొన్నారు. రాష్ట్రంలో దుర్గాపూజ, కాళీపూజ, దీపావళి పండుగలకు ఏ విధంగానైతే ప్రభుత్వం ఏర్పాట్లు చేస్తుందో, ఛట్ పూజకు కూడా అదే స్థాయిలో సదుపాయాలు కల్పించామని సీఎం వివరించారు.

నాలుగు రోజుల పాటు అత్యంత భక్తిశ్రద్ధలతో జరిగే ఛట్ మహాపర్వంలో భాగంగా చివరి రోజు దేశవ్యాప్తంగా భక్తులు ఉదయించే సూర్యుడికి అర్ఘ్యం సమర్పించి ప్రత్యేక పూజలు నిర్వహించారు. ఈ పవిత్ర సందర్భాన్ని పురస్కరించుకుని ప్రధానమంత్రి నరేంద్ర మోదీ కూడా దేశ ప్రజలకు, భక్తులకు ఛట్ పూజ శుభాకాంక్షలు తెలియజేశారు.

Advertisement
Advertisement