DMK Ex Minister Corruption Case | తమిళనాడులో ప్రకంపనలు: రూ.100 కోట్ల లంచం కేసులో డీఎంకే మాజీ మంత్రి అరెస్ట్.. 177 స్కూళ్లే టార్గెట్!

DMK Ex Minister Corruption Case | త్రినేత్ర న్యూస్ : తమిళనాడు రాజకీయాల్లో భారీ కుంభకోణం వెలుగుచూసింది. రాష్ట్రంలోని ప్రైవేట్ పాఠశాలలకు ప్రభుత్వ అనుమతులు, గుర్తింపులు ఇప్పిస్తామని చెప్పి ఏకంగా రూ.100 కోట్ల మేర ముడుపులు స్వీకరించారన్న తీవ్ర ఆరోపణలపై డీఎంకే సీనియర్ నేత, మాజీ విద్యాశాఖ మంత్రి అన్బిల్ మహేష్ పొయ్యమొళిని.. చెన్నై సెంట్రల్ క్రైమ్ బ్రాంచ్ (CCB) పోలీసులు సోమవారం అరెస్ట్ చేశారు.

ఈ వ్యవహారంలో మాజీ మంత్రి దాఖలు చేసిన ముందస్తు బెయిల్ పిటిషన్‌ను మద్రాస్ హైకోర్టు న్యాయమూర్తి జస్టిస్ వి.లక్ష్మీనారాయణన్ తిరస్కరించిన కాసేపటికే పోలీసులు ఆయన్ను అదుపులోకి తీసుకున్నారు. అన్బిల్ మహేష్‌పై అవినీతి నిరోధక చట్టం (Prevention of Corruption Act) సహా పలు తీవ్రమైన సెక్షన్ల కింద కేసులు నమోదు చేశారు.

అసలేం జరిగింది? కుంభకోణం ఎలా బయటపడింది?

తమిళనాడు ఫెడరేషన్ ఆఫ్ అసోసియేషన్స్ ఆఫ్ ప్రైవేట్ స్కూల్స్ కార్యదర్శి ఇళంగోవన్ ఇచ్చిన అధికారిక ఫిర్యాదుతో ఈ భారీ కుంభకోణం వెలుగులోకి వచ్చింది. ప్రైవేట్ విద్యాసంస్థలకు శాశ్వత గుర్తింపు, అప్‌గ్రేడేషన్, ప్లానింగ్ అప్రూవల్స్, ఫైర్ ఎన్‌వోసీల వంటి కీలక అనుమతులు ఇప్పిస్తామని నమ్మించి పెద్ద మొత్తంలో వసూళ్లకు పాల్పడ్డారని ఆయన ఫిర్యాదులో పేర్కొన్నారు.

Also Read | వెండి దీపాల‌పై క‌మ‌లం గుర్తు.. ధ‌నుష్ పొలిటిక‌ల్ ఎంట్రీ వెనుక బీజేపీ మ‌ద్ద‌తు..?

ఈ వ్యవహారంపై కూపీ లాగిన చెన్నై క్రైమ్ బ్రాంచ్ అధికారులకు విస్తుపోయే నిజాలు తెలిశాయి. రాష్ట్రవ్యాప్తంగా సుమారు 177 ప్రైవేట్ పాఠశాలల నుంచి వివిధ అసోసియేషన్ల ప్రతినిధుల ద్వారా ఏకంగా రూ.100 కోట్ల వరకు వసూలు చేసినట్లు గుర్తించారు. డిజిటల్ ఆధారాలు, సాక్షుల వాంగ్మూలాలను విశ్లేషించిన తర్వాతే ఈ మొత్తం నెట్‌వర్క్‌లో మాజీ మంత్రి పాత్ర ప్రత్యక్షంగా ఉన్నట్లు తేలడంతో ఆయనను నిందితుడిగా చేర్చారు.

రాజకీయ కక్షసాధింపేనన్న డీఎంకే

ఈ ఆరోపణలను మాజీ మంత్రి అన్బిల్ మహేష్ తీవ్రంగా ఖండించారు. తనపై నమోదైన ఎఫ్ఐఆర్‌ను రద్దు చేయాలని కోరుతూ ఆయన కోర్టును ఆశ్రయించారు. మరోవైపు, రాజకీయ ప్రత్యర్థులను అణచివేసేందుకు దర్యాప్తు సంస్థలను అధికార యంత్రాంగం దుర్వినియోగం చేస్తోందని డీఎంకే శ్రేణులు ఆరోపిస్తున్నాయి. కాగా, రాష్ట్రవ్యాప్తంగా ఉన్న విద్యాసంస్థల అనుమతుల్లో జరిగిన ఈ భారీ అక్రమాలపై ప్రభుత్వం దర్యాప్తును మరింత ముమ్మరం చేసింది.