Blending Petrol | పెట్రోల్‌ కోసం చెరకు ఇథనాల్‌ కొనుగోళ్లకు బ్రేక్‌.. కేంద్రం కీలక నిర్ణయం!

Blending Petrol | దేశీయంగా చక్కెర లభ్యతను కాపాడేందుకు కేంద్ర ప్రభుత్వం కీలక నిర్ణయం తీసుకుంది. 2026–27 సరఫరా సంవత్సరానికి పెట్రోల్‌లో కలిపేందుకు చెరకు ఉత్పత్తుల నుంచి తయారయ్యే ఇథనాల్‌ను కొనుగోలు చేయడం తాత్కాలికంగా నిలిపివేసింది. ఇందులో భాగంగా చెరకు రసం, చక్కెర సిరప్‌, బి-హెవీ మొలాసిస్‌ నుంచి తయారయ్యే ఇథనాల్‌ను చమురు మార్కెటింగ్‌ సంస్థలు తాజాగా జారీ చేసిన టెండర్‌లో చేర్చలేదు. దేశంలో చక్కెర లభ్యత తగ్గడం, ధరలు పెరిగే ప్రమాదం నేపథ్యంలో ఈ నిర్ణయం ప్రాధాన్యం సంతరించుకుంది. పెట్రోల్‌లో 20 శాతం ఇథనాల్‌ కలపాలనే లక్ష్యంతో ప్రభుత్వ రంగ చమురు మార్కెటింగ్‌ సంస్థలు కొనుగోళ్లకు సిద్ధమయ్యాయి. భారత్‌ పెట్రోలియం కార్పొరేషన్‌ లిమిటెడ్‌ (బీపీసీఎల్‌) అక్టోబర్‌ 16న సుమారు 1,100 కోట్ల లీటర్ల ఇథనాల్‌ కొనుగోలుకు టెండర్‌ జారీ చేసింది. నవంబర్‌ నుంచి ప్రారంభమయ్యే 2026–27 సరఫరా సంవత్సరానికి ఈ కొనుగోళ్లు చేపట్టనున్నారు. అయితే, ఈసారి చెరకు ఉత్పత్తుల నుంచి తయారయ్యే ఇథనాల్‌కు టెండర్‌లో అవకాశం కల్పించలేదు.

మక్కజొన్న ఇథనాల్‌కు అవకాశం

తాజా టెండర్‌లో మక్కజొన్న, విరిగిన బియ్యం, భారత ఆహార సంస్థ (ఎఫ్‌సీఐ) కొనుగోలు చేసిన మిగులు బియ్యం, సి-హెవీ మొలాసిస్‌ నుంచి తయారయ్యే ఇథనాల్‌ సరఫరాకు అవకాశం కల్పించారు. మరోవైపు, మక్కజొన్న ఇథనాల్‌కు ఇచ్చే ప్రోత్సాహక ధరను లీటరుకు రూ.71.86 నుంచి రూ.68.86కు తగ్గించారు. ముడి చమురు దిగుమతులపై ఆధారపడటాన్ని తగ్గించడం, వాహన కాలుష్యాన్ని నియంత్రించడం లక్ష్యంగా పెట్రోల్‌లో ఇథనాల్‌ కలుపుతున్నారు. ఇందుకోసం చెరకు ఉత్పత్తులతో పాటు ధాన్యాల నుంచి తయారయ్యే ఇథనాల్‌ను వినియోగిస్తున్నారు. తాజా నిర్ణయంతో 2026–27 సరఫరా సంవత్సరానికి చెరకు ఆధారిత ఇథనాల్‌ కొనుగోళ్లకు బదులుగా టెండర్‌లో అనుమతించిన ఇతర ముడిసరుకుల నుంచి తయారయ్యే ఇథనాల్‌ సరఫరాకు అవకాశం ఉంటుంది. మహారాష్ట్ర, కర్ణాటక వంటి ప్రధాన చెరకు ఉత్పత్తి రాష్ట్రాల్లో వర్షపాతం తక్కువగా ఉండటంతో చక్కెర ఉత్పత్తి తగ్గే ప్రమాదం ఉంది. దీంతో దేశీయంగా చక్కెర లభ్యత తగ్గి ధరలు పెరిగే అవకాశం ఉందన్న ఆందోళనలు వ్యక్తమవుతున్నాయి. ఈ నేపథ్యంలో చక్కెర సరఫరాను కాపాడేందుకు చెరకు ఉత్పత్తుల నుంచి తయారయ్యే ఇథనాల్‌ కొనుగోళ్లను తాజా టెండర్‌ నుంచి మినహాయించారు.