Keralam | కేర‌ళంలో స‌రికొత్త అధ్యాయం.. మూడు స్థానాల్లో గెలిచి చ‌రిత్ర సృష్టించిన బీజేపీ..!

Keralam | కేరళం రాజకీయాల్లో కొత్త అధ్యాయం ప్రారంభమైంది. ఈ ఎన్నికల్లో బీజేపీ మూడు స్థానాల్లో విజయం సాధించి చరిత్ర సృష్టించింది. రాష్ట్ర బీజేపీ అధ్యక్షుడు రాజీవ్ చంద్రశేఖర్ రాజధాని తిరువనంతపురంలోని నేమోం నియోజకవర్గం నుంచి 4,978 ఓట్ల మెజారిటీతో విజయం సాధించారు. కొల్లం జిల్లాలోని చాతన్నూర్ నియోజకవర్గంలో బీజేపీ అభ్యర్థి బీబీ గోపకుమార్ 4,398 ఓట్ల తేడాతో గెలుపొందారు. అలాగే, కాజకుట్టం నియోజకవర్గంలో వీ మురళీధరన్ స్వల్పమైన 428 ఓట్ల మెజారిటీతో గెలుపొందారు.

ఈ ఫలితాలతో కేరళం అసెంబ్లీలోకి తొలిసారిగా మూడు ఎమ్మెల్యేలు ప్ర‌వేశించ‌నున్నారు. ఈ సంద‌ర్భంగా పార్టీ ప్ర‌ధాన కార్యాల‌యంలో రాజీవ్ చంద్రశేఖర్ మాట్లాడుతూ కాంగ్రెస్, సీపీఎం పార్టీలు చేసిన వ్యాఖ్యలకు ప్రజలు గట్టి సమాధానం ఇచ్చారని అన్నారు. బీజేపీ ఖాతా కూడా తెరవదని చెప్పిన వారందరికీ ప్రజలు స్పష్టమైన సమాధానం ఇచ్చార‌న్నారు. నేమోం, చాతన్నూర్, కాజకుట్టం ప్రజలు త‌మ పక్షాన తీర్పు ఇచ్చార‌న్నారు. ఈ ఎన్నికలను “సీపీఎం వ్యతిరేక ఓటింగ్”గా అభివర్ణించిన ఆయన.. అవినీతి ఆరోపణలు, శబరిమల అంశం వంటి విషయాలపై ప్రజల్లో అసంతృప్తి పెరిగిందని, అదే ఫలితాల్లో ప్రతిఫలించిందని తెలిపారు.

నేమోం నియోజకవర్గం బీజేపీకి ప్రతిష్టాత్మకంగా మారింది. 2016లో ఇక్కడి నుంచి ఓ రాజగోపాల్ గెలువ‌డంతో కేరళ అసెంబ్లీ ఎన్నిక‌ల్లో బీజేపీకి తొలి విజ‌యం ద‌క్కింది. 2021లో ఈ సీటు కోల్పోయిన పార్టీ ఈసారి రాష్ట్ర అధ్యక్షుడిని బరిలోకి దించి మళ్లీ గెలుచుకుంది. చాతన్నూర్ నియోజకవర్గంలో కూడా బీజేపీ క్రమంగా తన ఓటు శాతం పెంచుకుంటూ వచ్చింది. గత ఎన్నికలతో పోలిస్తే ఈసారి సాధించిన విజయం ఆ ప్రాంతంలో పార్టీ బ‌ల‌ప‌డింద‌న్న దానికి సంకేతంగా భావిస్తున్నారు. దశాబ్దాలుగా కేరళ రాజకీయాలు ఎల్డీఎఫ్, యూడీఎఫ్ మధ్యే పరిమితమయ్యాయి. బీజేపీ మూడో ప్రత్యామ్నాయంగా ఎదిగేందుకు చాలా కాలంగా ప్రయత్నిస్తున్నప్పటికీ పెద్ద‌గా విజ‌యం సాధించ‌లేక‌పోయింది.

అయితే ఇటీవలి కాలంలో పరిస్థితి మారుతోంది. 2024 లోక్‌సభ ఎన్నికల్లో సురేష్ గోపి విజయం, 2025 స్థానిక సంస్థల ఎన్నికల్లో తిరువనంతపురం కార్పొరేషన్‌లో సాధించిన విజయాలు పార్టీకి ఊపునిచ్చాయి. ఇప్పుడు అసెంబ్లీ ఎన్నికల్లో మూడు స్థానాలు గెలుచుకోవడం ద్వారా బీజేపీ రాష్ట్ర రాజకీయాల్లో తన ముద్ర వేసినట్లు విశ్లేషకులు అభిప్రాయపడుతున్నారు. ఈ ఫలితాలతో బీజేపీ ఇకపై కేవలం ఓటు చీల్చే పార్టీ కాకుండా, స్పష్టమైన రాజకీయ ప్రత్యామ్నాయ శ‌క్తిగా మారింద‌ని భావిస్తున్నారు.