బెంగళూరులో మానవత్వం మంటగలిసిందా? ఈ పరిస్థితి ఎవ్వరికీ రావొద్దు

అది పేరుకే మెట్రో సిటీ. పేరుకే సిలికాన్ సిటీ. కానీ, అక్కడ ఉన్న వాళ్లలో మానవత్వం మిస్సింగ్ అని ఈ ఘటనతో రుజువైంది. ఒక మహిళ కాపాడండి.. నా భర్తను రక్షించండి అని నడి రోడ్డు మీద వేడుకుంటున్నా ఏ ఒక్క వాహనం ఆగలేదు. పదుల సంఖ్యలో కార్లు, బైకులు, ఇతర వాహనాలు ఆమె వేడుకుంటున్నా పట్టించుకోకుండా, అక్కడ ఆగకుండా వెళ్లిపోయాయి. ఆసమయంలో వాహనదారులు చేసిన నిర్లక్ష్యం ఒక నిండు ప్రాణాన్ని తీసింది. ఈ అమానవీయ ఘటన ప్రస్తుతం సోషల్ మీడియాను షేక్ చేస్తోంది. మానవత్వం గురించి మరోసారి ఈ ఘటన చర్చకు దారి తీసింది. అసలేం జరిగింది? బెంగళూరుకు చెందిన వెంకటరామనన్ ఒక మెకానిక్. అర్ధరాత్రి ఆయనకు చాతిలో నొప్పి రావడంతో భార్యను తీసుకొని బైక్ మీద ఆసుపత్రికి వెళ్లాడు. కానీ.. ఆ ఆసుపత్రిలో డాక్టర్ డ్యూటీలో లేకపోవడంతో మరో ఆసుపత్రికి వెళ్లారు. అక్కడ డాక్టర్లు ఈసీజీ తీసి హార్ట్ ఎటాక్ అని చెప్పారు. కానీ ట్రీట్మెంట్ ఇక్కడ లేదని, మరో ఆసుపత్రికి వెళ్లాలని డాక్టర్లు సూచించారు. కానీ, ఎలాంటి ఎమర్జెన్సీ కేర్ ప్రొవైడ్ చేయలేదు. దీంతో అంబులెన్స్కి కాల్ చేశారు. అయినా ఎవ్వరూ రాలేదు. దీంతో మరో ఆసుపత్రికి వెళ్దామని బైక్పై వెళ్తుండగా అదుపుతప్పి కిందపడ్డారు. దీంతో వెంకటరామనన్ భార్య రూపకు కొన్ని గాయాలు కాగా, వెంకటరామనన్ కింద పడి అలాగే ఉండిపోయాడు. చాతిలో నొప్పి ఎక్కువైంది. దీంతో ఏం చేయాలో తెలియని రూప రోడ్డు మీద ఎవరైనా వాహనం ఆపుతారేమోనని రెండు చేతులు జోడించి ఆ రూట్ నుంచి వెళ్లే వాహనాలను ఆపాలంటూ కోరింది. కానీ, ఏ ఒక్క వాహనం ఆగలేదు. ఇంతలో శ్వాస సంబంధ సమస్య ఎక్కువ కావడంతో వెంటకరామనన్కు ఊపిరి అందడం లేదు. ఇంతలో అటువైపు నడుచుకుంటూ వెళ్తున్న ఓ వ్యక్తి వీళ్లను చూసి అతడు కూడా వాహనాలు ఆపడానికి ప్రయత్నించాడు. కానీ, ఎవ్వరూ ఆపలేదు. కొన్ని నిమిషాల తర్వాత ఓ కారు ఆగింది. అంతలోనే వెంకటరామనన్ స్పృహ కోల్పోయాడు. వెంటనే ఆ కారులో అతడిని ఎక్కించుకొని దగ్గర్లోని ఆసుపత్రికి తరలించారు. అప్పటికే వెంకటరామనన్ మృతి చెందినట్లు డాక్టర్లు నిర్ధారించారు. ఆ రోడ్డు పక్కనే ఉన్న ఓ బిల్డింగ్ సీసీటీవీ ఫుటేజ్లో ఈ ఘటన రికార్డయింది. ఇంత జరిగినా, చివరకు తన భర్త కళ్లను రూప దానం చేసేందుకు సిద్ధమైంది. వెంటనే ఎవరైనా స్పందించి ఉంటే నా భర్త ఇప్పుడు బతికి ఉండేవాడు. అతడికి బతకాలని ఉంది. చేతులు జోడించినా ఒక్కరూ ఆగలేదు.. అంటూ రూప వాపోయింది. మానవత్వం నశించింది.. అయినా నా భర్త కళ్లను నేను దానం చేశాను అని రూప తెలిపింది. వెంకటరామనన్కి ఇద్దరు పిల్లలు ఉన్నారు. ఇప్పుడు వాళ్ల పరిస్థితి ఏంటి? భార్య, పిల్లలను వదిలి వెళ్లిపోయాడు.. వాళ్లను ఎవరు పోషించాలి అంటూ వెంకటరామనన్ తల్లి బోరున విలపించింది. (Photos and Video Courtesy - NDTV)