Namasthe Telangana First Batch Reunion | 16 ఏళ్ల తర్వాత నమస్తే తెలంగాణ తొలి బ్యాచ్ ఆత్మీయ కలయిక: అవమానాలు దాటి చరిత్ర సృష్టించాం

Namasthe Telangana First Batch Reunion | త్రినేత్ర న్యూస్ : తెలంగాణ మలిదశ ఉద్యమ గళాన్ని గల్లీ నుంచి ఢిల్లీ దాకా వినిపించిన 'నమస్తే తెలంగాణ' దినపత్రిక తొలి తరం జర్నలిస్టులు 16 ఏళ్ల తర్వాత ఒకే వేదికపైకి వచ్చారు. 2010లో ప్రారంభమైన మొదటి బ్యాచ్‌కు చెందిన జర్నలిస్టుల ఆత్మీయ సమ్మేళనం ఆదివారం హైదరాబాద్‌లోని ఉస్మానియా యూనివర్సిటీ గెస్ట్ హౌస్‌లో ఉద్వేగభరిత వాతావరణంలో జరిగింది. ఈ సందర్భంగా జర్నలిస్ట్ దేవపూజ శ్రీకాంత్ రచించిన 'తెలంగాణ చరిత్ర' పుస్తకాన్ని ప్రముఖ సీనియర్ పాత్రికేయులు ఆవిష్కరించారు.

ఈ సమ్మేళనానికి తెలంగాణ మీడియా అకాడెమీ మాజీ చైర్మన్ అల్లం నారాయణ, ప్రభాత ఉదయం ఎడిటర్ కట్టా శేఖర్ రెడ్డి, దిశ ఎడిటర్ డి. మార్కండేయ, త్రినేత్ర ఎడిటర్ ఎస్. చిరంజీవి ప్రసాద్ రావు, జిందగీ మాజీ ఇన్‌ఛార్జ్ సరస్వతి రమ ముఖ్య అతిథులుగా హాజరై నాటి జ్ఞాపకాలను పంచుకున్నారు.

అవమానాలను దాటి మీడియా సత్తా చాటాం: అల్లం నారాయణ

సమావేశంలో అల్లం నారాయణ ప్రసంగిస్తూ.. ఉమ్మడి రాష్ట్రంలో ఆంధ్రా పత్రికల ఆధిపత్యం నడుస్తున్న కాలంలో తెలంగాణ ప్రాంతానికి జరుగుతున్న అన్యాయాన్ని ఎండగట్టేందుకు నమస్తే తెలంగాణ అనివార్యమైందన్నారు. "తెలంగాణ వారికి మీడియా నడపడం చేతకాదని అవమానించిన సమాజానికి మేమేంటో నిరూపించి చూపించాం. గ్రామీణ ప్రాంత జర్నలిస్టులు క్షేత్రస్థాయి పోరాటాలను వెలుగులోకి తెచ్చి ఉద్యమానికి ఊపిరిలూదారు. నాడు కేసీఆర్ పత్రిక అవసరాన్ని గుర్తించారు.. ఎన్నో సవాళ్లు, ఒడిదుడుకులను తట్టుకుని నమస్తే తెలంగాణ ప్రజల గొంతుకగా నిలిచింది" అని ఆయన గుర్తు చేసుకున్నారు.

నేర్చుకున్న ప్రతి అక్షరం భవిష్యత్తుకు పునాది: కట్టా శేఖర్ రెడ్డి

ప్రభాత ఉదయం ఎడిటర్ కట్టా శేఖర్ రెడ్డి మాట్లాడుతూ.. జర్నలిజంలో నేర్చుకున్న అనుభవం జీవితంలో ఎక్కడైనా అక్కరకొస్తుందన్నారు. నాటి మొదటి బ్యాచ్‌లో శిక్షణ పొందిన వారు తక్కువ వేతనాలతోనైనా ఒక ఆశయం కోసం, ఉద్యమం కోసం పనిచేశారని చెప్పారు. 16 ఏళ్ల ప్రస్థానంలో నేడు ప్రభుత్వ ఉద్యోగాలు, మీడియా ఉన్నత హోదాల్లో స్థిరపడిన మిత్రులు మళ్లీ ఇలా కలవడం ఆనాటి తొలి రోజుల ఉత్సాహాన్ని గుర్తుచేసిందని ఆనందం వ్యక్తం చేశారు.

మారుతున్న ట్రెండ్‌కు అనుగుణంగా అప్‌డేట్ కావాలి: మార్కండేయ

దిశ ఎడిటర్ డి. మార్కండేయ మాట్లాడుతూ.. మీడియా రంగం శరవేగంగా మారుతోందని, జర్నలిస్టులు కొత్త స్కిల్స్ నేర్చుకుంటూ నిరంతరం అప్‌డేట్ కావాలని పిలుపునిచ్చారు. పనిచేసే సంస్థల లక్ష్యాలకు అనుగుణంగా ఉంటూనే, సొంత భావజాలానికి, సమాజ హితానికి కొంత సమయాన్ని కేటాయించాలని సూచించారు.

ఈ కార్యక్రమంలో పూర్వ ఎడిటర్లు, సీనియర్ జర్నలిస్టుల పాత్రికేయ ప్రస్థానాన్ని ప్రతిబింబించే ప్రత్యేక వీడియో ప్రదర్శన అందరినీ ఆకట్టుకుంది. కార్యక్రమంలో నమస్తే తెలంగాణ తొలి బ్యాచ్ జర్నలిస్టులు దేవరపోగు రవీందర్, అజయ్ కుమార్ సేగూరి, మహేందర్ రెడ్డి, సత్యప్రసాద్ రెడ్డి,  సుంకరి గణేశ్, అతికం రాజు, బండారి రాజు, పుట్టా రమేష్, దెంచినాల రాజు, తోట నాగరాజు, సిరందాస్ ప్రవీణ్ కుమార్, కుర్ర గంగాధర్, రామకృష్ణ, రాజేందర్, మల్లయ్య, శ్రీనివాసులు, సంగమేశ్వర్, బోజయ్య, సాంబమూర్తి, చీఫ్ డిజైనర్ భాను తదితరులు పాల్గొని నాటి జ్ఞాపకాలను పంచుకున్నారు.