Teenmar Mallanna vs Birla Ilaiah | సొంత పార్టీ బీఫామ్‌పై గెలిచే దమ్ముందా? తీన్మార్ మల్లన్నకు బీర్ల ఐలయ్య ఓపెన్ చాలెంజ్!

• తెలంగాణ కాంగ్రెస్‌లో ముదిరిన వివాదం
• ఎమ్మెల్సీ తీన్మార్ మల్లన్నపై ప్రభుత్వ విప్ బీర్ల ఐలయ్య ఫైర్
• సొంత పార్టీ బీఫామ్‌పై (B-form) పోటీ చేసి కనీసం డిపాజిట్ తెచ్చుకోవాలని సవాల్
• మల్లన్నకు డిపాజిట్ వస్తే తాను ఆలేరు నుంచి భవిష్యత్తులో పోటీ చేయనని స్పష్టీకరణ
• బీసీ ముసుగులో ఉంటూ, బీసీలనే అణగదొక్కుతున్నారని తీవ్రస్థాయిలో విమర్శలు

Teenmar Mallanna vs Birla Ilaiah | త్రినేత్ర.న్యూస్ : తెలంగాణ కాంగ్రెస్ (Telangana Congress) పార్టీలో అంతర్గత విమర్శలు తారాస్థాయికి చేరుకున్నాయి. సొంత పార్టీ నేతలపైనే తరచూ వివాదాస్పద వ్యాఖ్యలు చేస్తున్న ఎమ్మెల్సీ తీన్మార్ మల్లన్నపై (MLC Teenmar Mallanna) ప్రభుత్వ విప్ బీర్ల ఐలయ్య తీవ్రస్థాయిలో విరుచుకుపడ్డారు. కాంగ్రెస్ పార్టీ పెట్టిన బిక్షతో గెలిచి, ఇప్పుడు అదే పార్టీపై నిందలేస్తున్నావంటూ ఆయన మండిపడ్డారు. మల్లన్నను 'బీసీ ద్రోహి' గా అభివర్ణించిన ఐలయ్య.. ఆయనకు దమ్ముంటే తన సొంత పార్టీ బీఫామ్‌ మీద పోటీ చేయాలని ఒక ఓపెన్ చాలెంజ్ (Open Challenge) విసిరారు.

కాంగ్రెస్ బిక్షతో గెలిచి అహంకారమా?

తీన్మార్ మల్లన్న తీరుపై బీర్ల ఐలయ్య తీవ్ర స్థాయిలో ధ్వజమెత్తారు. "పేరు, ఊరు, పార్టీ మార్చుకున్న చరిత్ర మల్లన్నది. కాంగ్రెస్ పార్టీ ఇచ్చిన బీఫామ్ (B-form) వల్లే నువ్వు ఎమ్మెల్సీగా గెలిచావు. కానీ, గెలిపించిన పార్టీపైనే విమర్శలు చేస్తూ విర్రవీగుతున్నావు. నీకు నిజంగా దమ్ముంటే, నువ్వు మగాడివైతే.. నీ సొంత పార్టీ బీఫామ్‌ మీద పోటీ చేసి గెలువు. కనీసం నీకు డిపాజిట్ (Deposit) వచ్చినా నేను ఆలేరు నియోజకవర్గం నుంచి మళ్లీ పోటీ చేయను" అని ఐలయ్య సవాల్ చేశారు.

బీసీ ముసుగులో ద్రోహం

మల్లన్న తనని తాను గొప్ప బీసీ నాయకుడిగా చెప్పుకుంటూ బీసీలనే అణగదొక్కుతున్నారని ఐలయ్య ఆరోపించారు. ఎదుటి కులాలను దూషించే సంస్కారం లేని వ్యక్తి అని విమర్శించారు. "బీసీ బిడ్డలపై నీ బలుపు, అహంకారపు మాటలు ఏంటి? నీకు దమ్ముంటే నల్గొండ, మునుగోడులో మీటింగ్ (Meeting) పెట్టు, ప్రజలు నీకు తగిన బుద్ధి చెబుతారు" అని హెచ్చరించారు. రాబోయే ఎమ్మెల్సీ ఎన్నికల్లో ఆయన వేసుకున్న బీసీ ముసుగు పూర్తిగా తొలగిపోవడం ఖాయమని, ఆయన నడ్డి విరగడం తథ్యమని బిర్ల ఐలయ్య తీవ్ర వ్యాఖ్యలు చేశారు.