AIIMS Bibinagar | బీబీనగర్ ఎయిమ్స్: కేవలం రూ.10 తో కార్పొరేట్ స్థాయి వైద్యం.. పేదలకు వరం

AIIMS Bibinagar | త్రినేత్ర.న్యూస్ : "ఆపరేషన్‌కు లక్షలు కావాలి" అనే మాట వింటేనే సామాన్యుల గుండె ఆగిపోతుంది. ఒక జబ్బు పేరు చెప్పి కార్పొరేట్ ఆసుపత్రులు నిలువు దోపిడీ చేస్తున్న ఈ రోజుల్లో.. ఒక పేద తండ్రి, ఒక మధ్యతరగతి కుటుంబం ఎక్కడికి వెళ్లాలి? ఈ కష్టాలకు చెక్ పెడుతూ, హైదరాబాద్ - యాదాద్రి మధ్య 200 ఎకరాల పచ్చని ప్రాంగణంలో, కేంద్ర ప్రభుత్వం సుమారు రూ.2000 కోట్లతో నిర్మించిన 'బీబీనగర్ ఎయిమ్స్' మనందరికీ అద్భుతమైన వైద్య సేవలు అందిస్తోంది. మీరు ఎందుకు ఈ ఆసుపత్రికి వెళ్లాలో తెలిపే వాస్తవాలు ఇవిగో.

డాక్టర్ ఫీజు కేవలం ఒక్క టీ ఖరీదు మాత్రమే

బయట కార్పొరేట్ ఆసుపత్రిలో ఏ స్పెషలిస్ట్ డాక్టర్‌ను కలవాలన్నా రూ.500 నుంచి రూ. 1500 వరకు ఓపీ (OPD) ఫీజు కట్టాలి. కానీ, ఎయిమ్స్‌లో జనరల్ ఫిజీషియన్, ఆర్థోపెడిక్, ఈఎన్టీ, డెర్మటాలజీ ఇలా ఏ డాక్టర్‌ను కలవాలన్నా రిజిస్ట్రేషన్ ఫీజు కేవలం రూ.10 నుంచి రూ.30 మాత్రమే. పైగా ఈ ఓపీ స్లిప్ 7 రోజుల పాటు వ్యాలిడిటీ ఉంటుంది.

టెస్టుల ఖర్చులు.. నీళ్ల కంటే చౌక

కార్పొరేట్ ఆసుపత్రుల్లో బిల్లు చూసి గుండె ఆగిపోయే పరిస్థితి ఇక్కడ ఉండదు. చాలా వరకు బేసిక్ ల్యాబ్ టెస్టులు ఉచితం లేదా రూ.10 నుంచి రూ.50 లోపే ఉంటాయి.

కంప్లీట్ బ్లడ్ పిక్చర్ (CBP): బయట రూ.800 ఉంటే, ఇక్కడ కేవలం రూ.15.

కిడ్నీ ఫంక్షన్ టెస్ట్ (KFT): బయట వేలల్లో ఉంటే, ఇక్కడ రూ.400.

లివర్ ఫంక్షన్ టెస్ట్ (LFT): కేవలం రూ.220.

ఎక్స్-రే (X-Ray): రూ.100 నుంచి రూ.300.

అల్ట్రాసౌండ్ (Ultrasound): రూ.200 నుంచి రూ.800.

CT స్కాన్: బయట చాలా ఖరీదు, కానీ ఎయిమ్స్‌లో రూ.1,000 నుంచి రూ.3,000 మాత్రమే.

యూరిన్ టెస్ట్, రాండమ్ బ్లడ్ షుగర్ వంటివి దాదాపు ఉచితం (రూ.0 నుంచి రూ.20).

సర్జరీలు సైతం అతి తక్కువ ధరకే

ఇన్‌పేషెంట్ (IPD) అడ్మిషన్ ఫీజు కేవలం రూ.25. జనరల్ వార్డులో రోజుకు రూ.35 మాత్రమే ఛార్జ్ చేస్తారు. ప్రైవేట్ ఆసుపత్రుల్లో లక్షలు ఖర్చయ్యే మేజర్ సర్జరీలకు ఇక్కడ సుమారు రూ.1,000 నుంచి రూ.2,000 లోపే ఖర్చవుతుంది. ఐసీయూ (ICU) బెడ్ కూడా రోజుకు సుమారు రూ.1,000 కే లభిస్తుంది.

ఫైవ్ స్టార్ హోటల్‌ను తలపించే సౌకర్యాలు

200 ఎకరాల్లో గాలి, వెలుతురు, పరిశుభ్రతతో ఈ ఆసుపత్రి ఉంటుంది. క్యాంటీన్‌లో వేడి వేడి అన్నం, కూర, పప్పు, పెరుగుతో కూడిన మీల్స్ కేవలం రూ.75 కే లభిస్తుంది. ప్రస్తుతం 220 పడకలతో ఐపీడీ (IPD) సేవలు, ఎమర్జెన్సీ సేవలు (24/7) అందుబాటులో ఉన్నాయి. 2026 జూన్ నాటికి 750 పడకల పూర్తి స్థాయి క్యాంపస్ సిద్ధం కానుంది. ప్రతిరోజూ సుమారు 1,800 మంది రోగులు ఇక్కడ చికిత్స పొందుతున్నారు.

ఎలా వెళ్లాలి? (రవాణా సౌకర్యాలు)

ఉప్పల్ నుంచి బీబీనగర్‌కు ఆర్టీసీ బస్సులో పురుషులకు ఛార్జీ రూ.50.

వరంగల్ బస్ స్టాండ్ నుంచి నేరుగా బీబీనగర్ ఎయిమ్స్‌కు బస్సులు ఉన్నాయి (ఛార్జీ సుమారు రూ.150).

ఉదయం 7 గంటలకు వెళితే మధ్యాహ్నం 2 గంటలకల్లా పనులన్నీ ముగించుకుని ఇంటికి చేరుకోవచ్చు.

ఆసుపత్రి వేళలు, బుకింగ్ వివరాలు

ఓపీడీ (OPD) టైమింగ్స్: సోమవారం నుంచి శుక్రవారం వరకు ఉదయం 9:00 - మధ్యాహ్నం 1:00. శనివారం ఉదయం 9:00 - మధ్యాహ్నం 1:30.

రిజిస్ట్రేషన్ టైమింగ్స్: ఉదయం 7:00 గంటల నుంచి 11:00 గంటల వరకు.

అడ్రస్: ఎయిమ్స్ హాస్పిటల్, బీబీనగర్, హైదరాబాద్.

ఆన్‌లైన్ బుకింగ్: రద్దీ ఎక్కువగా ఉంటుంది కాబట్టి ORS పోర్టల్ (ORS Portal) ద్వారా ముందుగానే అపాయింట్‌మెంట్ బుక్ చేసుకోవడం ఉత్తమం. (వెబ్‌సైట్: aiimsbibinagar.edu.in)

సంప్రదించాల్సిన నంబర్లు (ఉదయం 9 - సాయంత్రం 5): 08685-293300, 08685-295050.

ఇది కేంద్ర ప్రభుత్వ ఆసుపత్రి అని చులకన చేయకండి. ఇది మన కోసం కట్టిన ప్రపంచ స్థాయి హాస్పిటల్. ఆధార్ కార్డు ఉంటే చాలు, దేశంలో ఎక్కడి వారైనా ఇక్కడ వైద్యం పొందవచ్చు. అప్పుల ఊబిలో కూరుకుపోతున్న ఎంతోమందికి ఈ సమాచారం ఉపయోగపడుతుంది. మీ బంధువులు, స్నేహితులకు ఈ విషయాన్ని తప్పక తెలియజేయండి.