Virosh Wedding Jewellery | పెళ్లిలో విరోష్ ధరించింది ప్యూర్ గోల్డే.. రాయల్ వెడ్డింగ్ జ్యువెలరీ అది.. తయారీకి ఎన్ని నెలలు పట్టిందో తెలుసా?

Virosh Wedding Jewellery | ఫిబ్రవరి 26న తెలుగు, కొడవా సంప్రదాయాల ప్రకారం ఒక్కటైన విజయ్ దేవరకొండ, రష్మిక మందన్నల వివాహ వేడుకలో అందరి దృష్టిని విశేషంగా ఆకర్షించిన అంశం.. వారు ధరించిన ఆభరణాలు. అవి కూడా హెవీ గోల్డ్. నేటి తరం ఫాలో అవుతున్న సింపుల్ అండ్ మినిమలిస్ట్ ట్రెండ్‌కు భిన్నంగా, విజయ్, రష్మిక ఇద్దరూ ప్రముఖ డిజైనర్ అనామికా ఖన్నా డిజైన్ చేసిన సంప్రదాయ వివాహ దుస్తులకు తగ్గట్టుగా భారీ బంగారు (Heavy Gold) ఆభరణాలను ధరించారు. శ్రీ జ్యువెలర్స్ (SHREE Jewellers) రూపొందించిన ఈ వధూవరుల ఆభరణాల సెట్‌లను తయారు చేయడానికి ఏకంగా పది నెలల సమయం పట్టింది. ట్రెండ్ కంటే హెరిటేజ్ గోల్డ్ క్రాఫ్ట్స్‌మెన్‌షిప్‌పైనే (హస్తకళ) వీరు ఎక్కువ దృష్టి పెట్టారు.

అదే వారి ప్రధాన కోరిక..

ఈ సందర్భంగా శ్రీ జ్యువెలర్స్ మేనేజింగ్ డైరెక్టర్లు అభిషేక్ అగర్వాల్, కౌశిక్ కుమార్ ఓ జాతీయ మీడియాతో మాట్లాడుతూ.. విరోష్ తమకు ఇచ్చిన బ్రీఫ్ గురించి వివరించారు. "వారు కేవలం ట్రెండీగా ఉండే ఆభరణాలు కాకుండా, తమ మూలాలకు దగ్గరగా, సాంస్కృతికంగా కనెక్ట్ అయ్యే శాశ్వతమైన డిజైన్లను కోరుకున్నారు. దక్షిణ భారత సంప్రదాయాలను గౌరవిస్తూనే, వారి వ్యక్తిత్వాన్ని ప్రతిబింబించేలా ఈ ఆభరణాలు ఉండాలని వారు భావించారు" అని తెలిపారు. రష్మిక లుక్ అమ్మవారిని తలపించేలా, విజయ్ లుక్ మహారాజును పోలి ఉండేలా ఈ ఆభరణాలను డిజైన్ చేశారు.

రష్మిక మందన్న వివాహ ఆభరణాల ప్రత్యేకతలు

పెళ్లి వేడుక కోసం రష్మిక దక్షిణ భారత శిల్పకళా వైభవాన్ని ఉట్టిపడేలా పూర్తి బంగారు ఆభరణాలను ధరించింది. ఇందులో హై-రిలీఫ్ నక్షి వర్క్, రవ్వ గ్రాన్యులేషన్‌తో మాస్టర్ ఆర్టిసన్స్ స్వయంగా చేతితో చెక్కిన అద్భుతమైన డిజైన్లు ఉన్నాయి. ఆమె ధరించిన చోకర్, సంప్రదాయ హారం, బాసికం, జుంకాలు, జడ బిళ్ల, చంపసరాలు, హాత్‌ఫూల్ (చేతి ఆభరణం), మాటీ, ముక్కుపుడక, గాజులు, వంకీ, నడుము బెల్ట్ (వడ్డాణం), పట్టీలు.. ఇలా అన్నీ పురాతన మ్యాటే పాలిష్‌తో మెరిసిపోయాయి.

తన ఆభరణాలు చాలా నీట్‌గా, స్పష్టమైన డిజైన్‌తో ఉండాలని రష్మిక పట్టుబట్టారట. ముఖ్యంగా ఆమె ధరించిన సన్నని వడ్డాణం, లక్ష్మీదేవి హారం అత్యంత ఆకర్షణీయంగా నిలిచాయి. లక్ష్మీదేవి మోటిఫ్ శ్రేయస్సు, దయ, బలం, విలువలని సూచిస్తుందని డిజైనర్లు తెలిపారు.

విజయ్ దేవరకొండ రాయల్ లుక్ (Royal Regalia)

రష్మిక డిజైన్లు దైవత్వాన్ని ప్రతిబింబిస్తే, విజయ్ ఆభరణాలు బలమైన మహారాజు రాజసాన్ని గుర్తుచేశాయి. అతని ఆభరణాలలో జ్ఞానానికి ప్రతీక అయిన ఏనుగు, చురుకుదనానికి ప్రతీక అయిన పులి ఆకృతులు, సాంప్రదాయ పూల డిజైన్లు అద్భుతంగా ఇమిడిపోయాయి. లేయర్డ్ హారాలు, బాసికం, కఫ్స్, ఆర్మ్‌లెట్ (వంకీ), నడుము బెల్ట్, చెవిపోగులు ధరించి విజయ్ రాయల్ లుక్‌లో అదరగొట్టాడు. పెళ్లికొడుకులు సింపుల్ గా ఉండాలనే ట్రెండ్‌ను బ్రేక్ చేస్తూ, విజయ్ ఈ హెవీ ఆభరణాలతో సరికొత్త ట్రెండ్ సృష్టించాడు.

ఆభరణాల తయారీలో రష్మిక, విజయ్ భాగస్వామ్యం

ఈ ఆభరణాల రూపకల్పనలో విజయ్, రష్మిక ఇద్దరూ దగ్గరుండి శ్రద్ధ తీసుకున్నారు. ఒకరి ఆభరణాల డిజైన్ల విషయంలో మరొకరు పూర్తిగా ఇన్వాల్వ్ అయ్యారు. ముఖ్యంగా బాసికం వంటి సంప్రదాయ అంశాలు ఇద్దరికీ ఒకేలా, అర్థవంతంగా ఉండేలా జాగ్రత్తపడ్డారు. కాన్సెప్ట్ డెవలప్‌మెంట్ నుంచి ప్రొడక్షన్, ట్రయల్స్ వరకు ఈ మొత్తం ప్రక్రియకు దాదాపు 10 నెలల సమయం పట్టింది.

ఎంత బిజీ షెడ్యూల్ ఉన్నప్పటికీ రష్మిక ట్రయల్స్‌కు హాజరవుతూ చాలా ఓపికగా, ఎంతో మర్యాదగా సహకరించిందని డిజైనర్లు ప్రశంసించారు. ఈ జంట ఎంచుకున్న ఈ ఆభరణాలు రాబోయే పెళ్లిళ్ల సీజన్‌లో కచ్చితంగా గొప్ప ట్రెండ్ సెటర్స్‌గా నిలుస్తాయని ఫ్యాషన్ పండితులు భావిస్తున్నారు.