Goat Milk | పిల్లలకు మేకపాలు మంచివేనా? వైద్యుల కీలక హెచ్చరిక..

Goat Milk | తరతరాలుగా మేకపాలను సహజమైన పోషకాహారంగా చాలా మంది భావిస్తుంటారు. చాలా కుటుంబాల్లో తల్లిపాలు ఇవ్వడం కష్టమైనప్పుడు లేదా సాధ్యం కానప్పుడు మేకపాలను సంప్రదాయ ప్రత్యామ్నాయంగా ఉపయోగించే ఆచారం ఇప్పటికీ ఉంది. ఆవుపాలతో పోలిస్తే మేకపాలు సులభంగా జీర్ణమవుతాయని భావించడం వల్ల కొంతమంది తల్లిదండ్రులు నవజాత శిశువులకు కూడా ఇవి సురక్షితమని అనుకుంటారు. అయితే శిశువుల విషయంలో సహజమైంది అంటే తప్పనిసరిగా సురక్షితమైనది కాదని పిల్లల వైద్యులు హెచ్చరిస్తున్నారు. పుట్టిన తర్వాత తొలి నెలల్లో నవజాత శిశువులకు అత్యంత ప్రత్యేకమైన పోషక అవసరాలు ఉంటాయని, సాధారణ మేకపాలు ఆ అవసరాలను తీర్చలేవని నిపుణులు చెబుతున్నారు. యుక్త వ‌య‌స్సు పిల్లలు, పెద్దలకు మేకపాలు పోషకాహారంగా ఉపయోగపడినా, ఎలాంటి మార్పులు చేయని మేకపాలను నవజాత శిశువులకు ఇవ్వడం వల్ల పోషక లోపాలు, ఇతర ఆరోగ్య సమస్యలు వచ్చే ప్రమాదం ఉంటుందని వారు స్పష్టం చేస్తున్నారు.

కీల‌క పోష‌కాలు ల‌భించ‌వు..

డాక్ట‌ర్ గీతా గ‌త్వాలా తెలిపిన ప్రకారం సాధారణ మేకపాలను తల్లిపాలు లేదా శిశువుల కోసం ప్రత్యేకంగా తయారు చేసిన ఇన్ఫెంట్ ఫార్ములాకు ప్రత్యామ్నాయంగా ఎప్పుడూ ఉపయోగించకూడదు. నవజాత శిశువులు, చిన్నారులకు మేకపాలు సరైన పోషకాహారం కాదని, వారి పోషక అవసరాలు చాలా ప్రత్యేకంగా ఉంటాయని ఆమె పేర్కొన్నారు. మేకపాల‌ల్లో ప్రోటీన్, కాల్షియం, ఇతర ముఖ్యమైన పోషకాలు ఉన్నప్పటికీ, వాటి మొత్తం పోషక కూర్పు నవజాత శిశువుల అవసరాలకు అనుగుణంగా ఉండదు. మేకపాల‌ల్లో ప్రోటీన్, ఖనిజాల పరిమాణం ఎక్కువగా ఉండటం వల్ల వైద్యులు హై రీనల్ సొల్యూట్ లోడ్ అని పిలిచే పరిస్థితి ఏర్పడుతుంది. దీంతో ఇంకా పూర్తిగా అభివృద్ధి చెందని శిశువు మూత్రపిండాలు వాటిని ప్రాసెస్ చేయడానికి ఎక్కువ శ్రమపడాల్సి వస్తుంది. అదే సమయంలో శిశువులకు అత్యంత అవసరమైన కొన్ని కీలక పోషకాలు మేకపాల‌ల్లో సహజంగానే తక్కువగా ఉంటాయి. ముఖ్యంగా ఫోలేట్ (విటమిన్ బి9), విటమిన్ బి12 వంటి పోషకాలు మేకపాల‌ల్లో సరిపడా ఉండవు. ఇవి శిశువుల మెదడు అభివృద్ధి, ఎర్ర రక్తకణాల ఉత్పత్తికి ఎంతో అవసరం. ఈ కారణంగా మేకపాలు మాత్రమే తాగుతున్న చిన్నారుల్లో తీవ్రమైన పోషక లోపాలు ఏర్పడే అవకాశం ఉంటుందని వైద్యులు హెచ్చరిస్తున్నారు.

తీవ్ర‌మైన స‌మ‌స్యలు వ‌చ్చే అవ‌కాశం..

మార్పులు చేయని మేకపాలను మాత్రమే శిశువులకు ఇవ్వడం వల్ల మెగాలోబ్లాస్టిక్ అనీమియా వంటి తీవ్రమైన రక్తహీనత సమస్యలు వస్తాయి. ఫోలేట్ లేదా విటమిన్ బి12 లోపం కారణంగా ఈ పరిస్థితి ఏర్పడుతుంది. అలాంటి పిల్లల్లో ఎదుగుదల మందగించడం, బలహీనత, అలసట, అభివృద్ధిలో ఆలస్యం, రక్తహీనత వంటి సమస్యలు కనిపిస్తాయి. ముఖ్యంగా జీవితంలోని తొలి ఏడాదిలో శిశువులు వేగంగా ఎదుగుతారు కాబట్టి, స్వల్పకాలిక పోషక లోపాలు కూడా దీర్ఘకాలిక ప్రభావాలు చూపే అవకాశం ఉంటుంది. ప్రపంచవ్యాప్తంగా ఆరోగ్య నిపుణులు ఇప్పటికీ తల్లిపాలనే శిశువులకు అత్యుత్తమ ఆహారంగా సిఫారసు చేస్తున్నారు. డాక్టర్ గీతా గత్వాలా తెలిపిన ప్రకారం శిశువుల పోషణకు తల్లిపాలే జీవశాస్త్రపరంగా ఉత్తమ ప్రమాణం. తల్లిపాలు ఇవ్వడం సాధ్యం కానప్పుడు వైద్యుల సలహాతో మాత్రమే శాస్త్రీయంగా రూపొందించిన ఇన్ఫెంట్ ఫార్ములాను ఉపయోగించాలి. ప్ర‌పంచ ఆరోగ్య సంస్థ‌, అమెరిక‌న్ అకాడ‌మీ ఆఫ్ పీడియాట్రిక్స్ కూడా సాధ్యమైనంత వరకు తొలి ఆరు నెలలు పూర్తిగా తల్లిపాలే ఇవ్వాలని సూచిస్తున్నాయి.

సుల‌భంగా జీర్ణ‌మ‌వుతాయా..

మేకపాల‌ల్లోని కొవ్వు కణాలు ఆవుపాలతో పోలిస్తే చిన్నవిగా ఉండటంతో అవి సులభంగా జీర్ణమవుతాయని చాలామంది భావిస్తారు. అయితే కొవ్వు నిర్మాణంలో కొంత తేడా ఉన్నప్పటికీ, అది నవజాత శిశువులకు అవసరమైన పూర్తి పోషకాహారంగా మేకపాలను మార్చదని నిపుణులు స్పష్టం చేస్తున్నారు. జీర్ణశక్తి మాత్రమే సరిపోదని, శిశువుల ఎదుగుదలకు అవసరమైన కీలక పోషకాల లోపాన్ని అది భర్తీ చేయలేదని వారు చెబుతున్నారు. ఆవుపాల అలెర్జీ ఉన్న పిల్లలకు మేకపాలు సురక్షితమని కూడా చాలామంది అనుకుంటారు. కానీ ఇది కూడా అపోహేనని వైద్యులు చెబుతున్నారు. మేకపాల‌ల్లోని ప్రోటీన్లు, ఆవుపాల‌ల్లోని ప్రోటీన్లకు చాలా దగ్గరగా ఉంటాయి. అందువల్ల ఆవుపాల ప్రోటీన్‌కు అలెర్జీ ఉన్న అనేక మంది పిల్లలకు మేకపాల వల్ల కూడా అలెర్జీ వచ్చే అవకాశం ఉంటుంది. కాబట్టి పాల అలెర్జీ అనుమానం ఉన్నప్పుడు వైద్యుల సలహా లేకుండా మేకపాలకు మారకూడదని నిపుణులు సూచిస్తున్నారు.

ఏ వ‌య‌స్సులో మేక పాల‌ను ఇవ్వ‌వ‌చ్చు..

శిశువుల దశ ముగిసిన తర్వాత, పిల్లలు వివిధ రకాల ఆహారం తీసుకునే వయసుకు వచ్చినప్పుడు, వారి పోషక అవసరాలు ఇతర ఆహారాల ద్వారా కూడా తీరుతున్న సమయంలో మేకపాలను సమతుల్య ఆహారంలో భాగంగా చేర్చవచ్చు. అయితే నవజాత శిశువుల దశలో లేదా తొలి నెలల్లో తల్లిపాలు లేదా ఇన్ఫెంట్ ఫార్ములాకు ప్రత్యామ్నాయంగా మేకపాలను ఎట్టి పరిస్థితుల్లోనూ ఉపయోగించకూడదు. బిడ్డ ఆహారంలో జంతు పాలను ప్రవేశపెట్టే ముందు తప్పనిసరిగా పిల్లల వైద్యుడిని సంప్రదించాలని నిపుణులు సూచిస్తున్నారు. మేకపాలు యుక్త వ‌య‌స్సు పిల్లలు, పెద్దలకు పోషకాహారంగా ఉపయోగపడినా, నవజాత శిశువులకు మాత్రం ఇది సురక్షితమైన, సంపూర్ణ పోషకాహారం కాదు. సహజమైన ఆహారం అనే పేరుతో దీనిని శిశువులకు ఇవ్వడం వల్ల అవసరమైన కీలక పోషకాలు అందకపోవడంతోపాటు, అభివృద్ధి చెందుతున్న మూత్రపిండాలపై అదనపు ఒత్తిడి పడుతుంది. తొలి ఆరు నెలల్లో తల్లిపాలే ఉత్తమమైన ఆహారం కాగా, అవి అందుబాటులో లేని పరిస్థితుల్లో శాస్త్రీయంగా రూపొందించిన ఇన్ఫెంట్ ఫార్ములానే సరైన ప్రత్యామ్నాయమని వైద్యులు స్పష్టం చేస్తున్నారు.

శిశువుల పోష‌కావ‌స‌రాల‌కు స‌రిపోవాలి..

డాక్టర్ గీతా గత్వాలా చెప్పిన ప్ర‌కారం, నియోనాటాలజీ వైద్యశాస్త్రంలో ఒక ఆహారం సహజమైనదా కాదా అన్నది ముఖ్యం కాదు, అది అభివృద్ధి చెందుతున్న శిశువు శరీర అవసరాలకు అనుకూలంగా ఉందా లేదా అన్నదే అత్యంత ముఖ్యమైన విషయం. మంచి ఉద్దేశంతో చేసిన ఆహార మార్పులు కూడా, ముఖ్యంగా జీవితంలోని తొలి ఏడాది, నవజాత శిశు దశలో, తీవ్రమైన పోషక సమస్యలకు దారితీస్తాయి. అందువల్ల శిశువుల ఆహారానికి సంబంధించిన నిర్ణయాల‌ను సంప్రదాయాల ఆధారంగా కాకుండా, శాస్త్రీయ ఆధారాలపై తీసుకోవాలని ఆమె సూచించారు.