Godavari Pushkaralu 2027 | గోదావరి పుష్కరాలు 2027: పనుల్లో అలసత్వం వద్దు.. ధర్మపురిలో రూ.226 కోట్లతో మాస్టర్ ప్లాన్

• అధికారులకు మంత్రి అడ్లూరి ఆదేశాలు

Godavari Pushkaralu 2027 | త్రినేత్ర న్యూస్ : తెలంగాణలో అత్యంత ప్రతిష్టాత్మకంగా జరగనున్న గోదావరి పుష్కరాలు-2027 ఏర్పాట్లపై రాష్ట్ర ప్రభుత్వం దృష్టి సారించింది. పుష్కరాల సందర్భంగా పుణ్యక్షేత్రాలకు తరలివచ్చే లక్షలాది మంది భక్తులకు ఎలాంటి అసౌకర్యం కలగకుండా శాశ్వత, తాత్కాలిక అభివృద్ధి పనులను యుద్ధప్రాతిపదికన పూర్తి చేయాలని రాష్ట్ర సంక్షేమ శాఖ మంత్రి అడ్లూరి లక్ష్మణ్ కుమార్ అధికారులను ఆదేశించారు. నిర్మాణ పనుల్లో నాణ్యతా ప్రమాణాలు పాటించాలని, నిర్దేశిత గడువులోగా ప్రతి పని పూర్తి కావాలని తేల్చిచెప్పారు.

డాక్టర్ బీఆర్ అంబేడ్కర్ రాష్ట్ర సచివాలయంలోని తన ఛాంబర్‌లో జగిత్యాల జిల్లా ధర్మపురితో పాటు ఇతర ప్రాంతాల్లో చేపడుతున్న పుష్కరాల అభివృద్ధి పనులపై మంత్రి శుక్రవారం విస్తృత సమీక్ష నిర్వహించారు. ఈ సమావేశంలో దేవాదాయ శాఖ డైరెక్టర్, కమిషనర్ ఎం. హనుమంతరావు, జగిత్యాల కలెక్టర్ బి. సత్యప్రసాద్‌తో పాటు ఆర్‌అండ్‌బీ, పంచాయతీరాజ్, ఇరిగేషన్ శాఖల ఉన్నతాధికారులు పాల్గొన్నారు.

ధర్మపురి క్షేత్రానికి భారీ కేటాయింపులు

గోదావరి పుష్కరాల నిర్వహణ కోసం తెలంగాణ ప్రభుత్వం రాష్ట్రవ్యాప్తంగా దాదాపు రూ.1,000 కోట్ల నిధులు కేటాయించింది. ఇందులో భాగంగా ప్రముఖ పుణ్యక్షేత్రమైన ధర్మపురి ప్రాంతానికే సుమారు రూ.226 కోట్ల వ్యయంతో పనులు చేపట్టేందుకు సమగ్ర ప్రణాళిక సిద్ధం చేశారు. భక్తుల రద్దీని తట్టుకునేలా ఇక్కడ సుమారు 470 మీటర్ల మేర సరికొత్త స్నాన ఘాట్లను నిర్మించనున్నారు. రోడ్ల విస్తరణ, భారీ వాహనాల పార్కింగ్ స్థలాలు, లైటింగ్, డ్రైనేజీ వ్యవస్థలను ఆధునీకరించనున్నారు.

శాఖల మధ్య సమన్వయం తప్పనిసరి

ఇరిగేషన్, రోడ్లు-భవనాలు (ఆర్‌అండ్‌బీ), పంచాయతీరాజ్, దేవాదాయ శాఖల అధికారులు సమన్వయంతో పనిచేయాలని మంత్రి లక్ష్మణ్ కుమార్ సూచించారు. ఒక శాఖ తవ్వకాలు లేదా పనుల వల్ల మరో శాఖకు అంతరాయం కలగకుండా చూసుకోవాలన్నారు. ప్రతి విభాగానికి సంబంధించి పనుల పురోగతి, అంచనా వ్యయం, పూర్తి చేసే డెడ్‌లైన్లతో కూడిన కార్యాచరణ నివేదికను రూపొందించాలని స్పష్టం చేశారు. అధికారులు క్షేత్రస్థాయిలో ఆకస్మిక తనిఖీలు చేపట్టి నాణ్యతను పరిశీలించాలని ఆదేశించారు.

భక్తుల భద్రత, పారిశుద్ధ్యానికే తొలి ప్రాధాన్యం

మహిళలు, వృద్ధులు, దివ్యాంగులు సురక్షితంగా పుణ్యస్నానాలు ఆచరించేలా ప్రత్యేక ఎంట్రీ, ఎగ్జిట్ మార్గాలు, బట్టలు మార్చుకునే గదులు, అత్యవసర వైద్య శిబిరాలు, నిరంతర అంబులెన్స్ సేవలను అందుబాటులో ఉంచాలని మంత్రి ఆదేశించారు. గోదావరి నది కలుషితం కాకుండా పటిష్టమైన పారిశుద్ధ్య నిర్వహణ చేపట్టాలని, ట్రాఫిక్ సమస్యలు తలెత్తకుండా పోలీసు యంత్రాంగంతో కలిసి పార్కింగ్ ప్రణాళిక సిద్ధం చేయాలని నిర్దేశించారు.

2027 జూన్ 26 నుంచి జూలై 7 వరకు గోదావరి పుష్కరాలు జరగనున్నాయి. పొరుగు రాష్ట్రాలైన ఆంధ్రప్రదేశ్, మహారాష్ట్ర, కర్ణాటకల నుంచి కూడా భారీగా భక్తులు వచ్చే అవకాశం ఉన్నందున, ఎక్కడా చిన్న లోపం కూడా లేకుండా పనులను వేగవంతం చేయాలని మంత్రి యంత్రాంగాన్ని అప్రమత్తం చేశారు.