US-Israel-Iran War | రణరంగంగా పశ్చిమాసియా.. అమెరికాలో 9/11 తరహా దాడులకు కుట్ర

• అమెరికా-ఇజ్రాయెల్-ఇరాన్ యుద్ధం ఉద్ధృతం
• గల్ఫ్‌లో సీబీఎస్ఈ పరీక్షలు రద్దు

US-Israel-Iran War | త్రినేత్ర.న్యూస్ : గత నెల ఫిబ్రవరి 28 న ఇరాన్‌పై అమెరికా, ఇజ్రాయెల్ సంయుక్తంగా జరిపిన దాడుల్లో ఇరాన్ సుప్రీం లీడర్ అయతుల్లా అలీ ఖమేనీ మృతి చెందడంతో మొదలైన యుద్ధం రోజురోజుకూ తీవ్రమవుతోంది. ఇరాన్ ప్రతీకార దాడులతో మిడిల్ ఈస్ట్ అట్టుడుకుతోంది. ఇరాక్, లెబనాన్‌లతో పాటు ఇజ్రాయెల్‌లోని ప్రాంతాలపై ఇరాన్ క్షిపణులు, డ్రోన్లతో విరుచుకుపడుతోంది. మరోవైపు పశ్చిమ ఇరాన్‌లోని మౌలిక సదుపాయాలే లక్ష్యంగా ఇజ్రాయెల్ విస్తృతస్థాయి దాడులకు దిగుతోంది.

హార్ముజ్ జలసంధిపై ఆధిపత్య పోరు.. ట్రంప్ అలర్ట్

ప్రపంచ చమురు రవాణాలో అత్యంత కీలకమైన హార్ముజ్ జలసంధి గుండా రవాణాను అడ్డుకుంటామని ఇరాన్ కొత్త సుప్రీం లీడర్ మొజ్తబా ఖమేనీ సంకేతాలు ఇచ్చారు. దీనిపై అమెరికా అధ్యక్షుడు డొనాల్డ్ ట్రంప్ తీవ్రంగా స్పందించారు. బ్రిటన్, చైనా, ఫ్రాన్స్, జపాన్ వంటి మిత్రదేశాలు తమ యుద్ధ నౌకలను పంపి జలసంధిని రక్షించాలని ఆయన కోరారు. రవాణాకు అంతరాయం కలిగితే అమెరికా కఠిన చర్యలు తీసుకుంటుందని హెచ్చరించారు. ఈ ఉద్రిక్తతల కారణంగా ఇంధన ధరలు ఆకాశాన్ని తాకుతుండగా, గ్లోబల్ మార్కెట్లు కుప్పకూలుతున్నాయి. బహ్రెయిన్‌కు చెందిన దిగ్గజ అల్యూమినియం సంస్థ ఆల్బా తన ఉత్పత్తిలో 19 శాతాన్ని నిలిపివేసింది.

ఇరాన్ సంచలన ఆరోపణ: 9/11 తరహా కుట్ర

ఈ యుద్ధ వాతావరణంలో ఇరాన్ సుప్రీం నేషనల్ సెక్యూరిటీ కౌన్సిల్ కార్యదర్శి అలీ లారిజానీ సంచలన ఆరోపణలు చేశారు. వివాదాస్పద ఫైనాన్షియర్ జెఫ్రీ ఎప్‌స్టీన్ నెట్‌వర్క్‌కు చెందిన మిగిలిన సభ్యులు అమెరికాలో 9/11 తరహా దాడులకు కుట్ర పన్నుతున్నారని, ఆ దాడులు చేసి ఆ నెపాన్ని ఇరాన్‌పై నెట్టేందుకు ప్రయత్నిస్తున్నారని ఆయన ఎక్స్ వేదికగా ఆరోపించారు.

భారతీయులపై యుద్ధ ప్రభావం: పరీక్షలు రద్దు, విమానాలు కుదింపు

గల్ఫ్ దేశాల్లో నెలకొన్న అస్థిర పరిస్థితుల కారణంగా ప్రవాస భారతీయులపై తీవ్ర ప్రభావం పడుతోంది. బహ్రెయిన్, ఇరాన్, కువైట్, ఒమన్, ఖతార్, సౌదీ అరేబియా, యూఏఈలలో మార్చి 16 నుంచి ఏప్రిల్ 10 వరకు జరగాల్సిన 12వ తరగతి సీబీఎస్ఈ బోర్డు పరీక్షలను రద్దు చేస్తున్నట్లు విద్యాశాఖ ప్రకటించింది. ఫలితాల వెల్లడిపై విడిగా మార్గదర్శకాలు ఇస్తామని తెలిపింది. చిక్కుకుపోయిన భారతీయులను స్వదేశానికి చేర్చేందుకు స్పైస్‌జెట్ యూఏఈ నుంచి ప్రత్యేక విమానాలను నడుపుతోంది. ఫుజైరా నుంచి ఢిల్లీ, ముంబైలకు.. దుబాయ్ నుంచి పుణెకు విమానాలు ఆపరేట్ చేస్తోంది. దుబాయ్ సహా దోహా, కువైట్, బహ్రెయిన్, దమ్మామ్ తదితర గల్ఫ్ నగరాలకు మార్చి 28 వరకు విమాన సర్వీసులను నిలిపివేస్తున్నట్లు ఇండిగో ప్రకటించింది. ఖతార్ ఎయిర్‌వేస్ మాత్రం పరిమిత సంఖ్యలో విమానాలను పునరుద్ధరించింది.

ఇరాన్‌లో ఆపార ప్రాణనష్టం.. 200కు పైగా నగరాలపై దాడులు

ఇజ్రాయెల్ బలగాలు ఇరాన్‌పై ముప్పేట దాడి చేస్తున్నాయి. యుద్ధం మొదలైనప్పటి నుంచి రాజధాని టెహ్రాన్, ఇస్ఫహాన్ సహా 200కు పైగా నగరాలపై ఇజ్రాయెల్ బాంబుల వర్షం కురిపించింది. ఈ దాడుల్లో కనీసం 202 మంది చిన్నారులు, 223 మంది మహిళలు మరణించారని ఇరాన్ ఆరోగ్య మంత్రిత్వ శాఖ వెల్లడించింది. దేశవ్యాప్తంగా 153 ఆరోగ్య కేంద్రాలు, ఆస్పత్రులు ధ్వంసమయ్యాయి. అదే సమయంలో, దక్షిణ లెబనాన్‌లోని సిడాన్‌లో ఇజ్రాయెల్ జరిపిన దాడిలో అగ్రశ్రేణి హమాస్ కమాండర్ విసామ్ తహా హతమయ్యాడు. సైనిక స్థావరాల సమాచారాన్ని ఇజ్రాయెల్‌కు చేరవేస్తున్నారన్న ఆరోపణలపై 20 మందిని ఇరాన్ అధికారులు అరెస్టు చేశారు.

ఉక్రెయిన్ ఆందోళన

పశ్చిమాసియా పరిణామాలపై ఉక్రెయిన్ అధ్యక్షుడు జెలెన్‌స్కీ ఆందోళన వ్యక్తం చేశారు. అమెరికా దృష్టి ఇరాన్ యుద్ధం వైపు మళ్లితే, రష్యాపై పోరాడుతున్న తమకు మద్దతు తగ్గుతుందని ఆయన అభిప్రాయపడ్డారు. ఇరాన్ డ్రోన్ దాడులను సమర్థవంతంగా ఎదుర్కోవడంపై ఇజ్రాయెల్ ప్రధాని నెతన్యాహు.. జెలెన్‌స్కీతో ఫోన్‌లో చర్చించేందుకు సిద్ధమవుతున్నారు. మరోవైపు దుబాయ్, కువైట్, సౌదీ అరేబియాలలో ఇరాన్ జరిపిన డ్రోన్ దాడులను ఆయా దేశాల రక్షణ వ్యవస్థలు సమర్థవంతంగా తిప్పికొట్టాయి.