US-Israel-Iran War | స్టాక్ మార్కెట్లను తప్పుదోవ పట్టించేందుకే ట్రంప్ ఫేక్ న్యూస్ ప్రచారం : ఇరాన్

ట్రంప్ వ్యాఖ్యలను కొట్టిపారేసిన ఇరాన్

అమెరికాతో ఎలాంటి చర్చలు జరుగలేదు

టెల్ అవీవ్‌పై ఇరాన్ క్షిపణి దాడులు

నిఘా కేంద్రాలపై ఇజ్రాయెల్ గురి

పెంటగాన్ చీఫ్ ఇచ్చిన సలహానే యుద్ధానికి కారణమన్న ట్రంప్

US-Israel-Iran War | త్రినేత్ర.న్యూస్ : పశ్చిమ ఆసియాలో రగులుతున్న యుద్ధం మరింత భీకర రూపం దాల్చుతోంది. ఇరాన్ సుప్రీం లీడర్ అలీ ఖమేనీ, ఇతర సీనియర్ కమాండర్ల హత్యతో మొదలైన అమెరికా-ఇజ్రాయెల్-ఇరాన్ యుద్ధం నేటికి 25వ రోజుకు చేరుకుంది. ఇరు దేశాలు పరస్పరం దాడులు చేసుకుంటూ విధ్వంసం సృష్టిస్తున్నాయి. ఒకపక్క శాంతి చర్చల పేరిట అమెరికా అధ్యక్షుడు డొనాల్డ్ ట్రంప్ ప్రకటనలు చేస్తుండగా, క్షేత్రస్థాయిలో పరిస్థితులు దారుణంగా ఉన్నాయి.

టెల్ అవీవ్‌పై ఇరాన్ క్షిపణుల వర్షం

మంగళవారం ఇరాన్ దళాలు ఇజ్రాయెల్ వాణిజ్య రాజధాని టెల్ అవీవ్‌పైకి భారీ ఎత్తున క్షిపణులను ప్రయోగించాయి. ఈ దాడులతో నగరంలో ఎయిర్ రైడ్ సైరన్లు మోగాయి. పలు బహుళ అంతస్తుల భవనాలకు భారీగా నష్టం వాటిల్లగా, రోడ్లపై వాహనాలు దగ్ధమయ్యాయి. ఈ ఘటనలో కనీసం ఆరుగురు గాయపడినట్లు ఇజ్రాయెల్ వెల్లడించింది.

ఐఆర్‌జీసీ కేంద్రాలే లక్ష్యంగా ఇజ్రాయెల్ ప్రతీకారం

ఇరాన్ దాడులకు ప్రతీకారంగా ఇజ్రాయెల్ ఫైటర్ జెట్లు టెహ్రాన్‌పై విరుచుకుపడ్డాయి. ఇస్లామిక్ రివల్యూషనరీ గార్డ్ కార్ప్స్ నిఘా విభాగానికి చెందిన కీలక కమాండ్ కేంద్రాలు, ఇరాన్ ఇంటెలిజెన్స్ మినిస్ట్రీ కార్యాలయాలను లక్ష్యంగా చేసుకున్నాయి. బాలిస్టిక్ క్షిపణి నిల్వ, ప్రయోగ కేంద్రాలతో సహా రాత్రికి రాత్రే దాదాపు 50కి పైగా లక్ష్యాలను ఛేదించినట్లు ఇజ్రాయెల్ సైన్యం ప్రకటించింది.

దాడుల నిలిపివేత.. హార్ముజ్ జలసంధిపై ట్రంప్ షరతులు

ప్రపంచ చమురు, గ్యాస్ సరఫరాలో 20 శాతం వాటా ఉన్న 'హార్ముజ్ జలసంధి'ని ఇరాన్ మూసివేయడంతో ప్రపంచవ్యాప్తంగా చమురు సంక్షోభం నెలకొన్నది. ఆ జలసంధిని వెంటనే తెరవాలని ట్రంప్ ఇరాన్‌ను డిమాండ్ చేశారు. దానికి ప్రతిఫలంగా ఇరాన్ విద్యుత్, ఇంధన మౌలిక సదుపాయాలపై దాడులను ఐదు రోజుల పాటు తాత్కాలికంగా నిలిపివేస్తున్నట్లు ప్రకటించారు.

అయినప్పటికీ, ట్రంప్ ప్రకటనకు ఒక్కరోజు ముందే సెంట్రల్ ఇరాన్‌లోని ఇస్ఫహాన్‌లోని గ్యాస్ సదుపాయాలు, ఖొర్రంషహర్ పవర్ ప్లాంట్ గ్యాస్ పైప్‌లైన్‌లపై ఇజ్రాయెల్-అమెరికా దాడులు జరిగాయని ఇరాన్ మీడియా తెలిపింది.

చర్చలన్నీ ఫేక్ న్యూస్: ఇరాన్

అమెరికా ప్రతినిధులు, ఇరాన్ నాయకులతో "అత్యంత గౌరవప్రదమైన" చర్చలు జరుపుతున్నారని ట్రంప్ తెలిపారు. పాకిస్థాన్‌లోని ఇస్లామాబాద్‌లో అమెరికా ఉపాధ్యక్షుడు జేడీ వాన్స్, జారెడ్ కుష్నర్ ఇరాన్ అధికారులతో ఈ వారంలో సమావేశం కావచ్చని ఊహాగానాలు వినిపిస్తున్నాయి.

అయితే, ట్రంప్ వ్యాఖ్యలను ఇరాన్ కొట్టిపారేసింది. అమెరికాతో ఎలాంటి చర్చలు జరగలేదని ఇరాన్ పార్లమెంట్ స్పీకర్ మొహమ్మద్ బాకర్ ఖలీబాఫ్ స్పష్టం చేశారు. మార్కెట్లను మభ్యపెట్టి తప్పుదోవ పట్టించడానికే ట్రంప్ ఇలాంటి 'ఫేక్ న్యూస్' ప్రచారం చేస్తున్నారని ఆయన మండిపడ్డారు. మరోవైపు, ఈ యుద్ధానికి పెంటగాన్ చీఫ్ పీట్ హెగ్‌సెత్ ఇచ్చిన సలహాయే కారణమని ట్రంప్ పరోక్షంగా వ్యాఖ్యానించడం గమనార్హం.

ప్రపంచ మార్కెట్లపై తీవ్ర ప్రభావం.. భారతీయుల భద్రతపై మోదీ భరోసా

ఈ యుద్ధం కారణంగా ప్రపంచ ఆర్థిక వ్యవస్థ కుదేలవుతోంది. బ్రెంట్ క్రూడ్ ఆయిల్ ధర బ్యారెల్‌కు 100 డాలర్ల పైకి చేరింది. చమురు ధరల ప్రభావంతో భారత రూపాయి విలువ డాలర్‌తో పోలిస్తే రికార్డు స్థాయిలో 93.94కి పడిపోయింది. మిడిల్ ఈస్ట్‌లో డ్రోన్ దాడుల కారణంగా బహ్రెయిన్‌లోని అమెజాన్ సేవలకు అంతరాయం ఏర్పడింది.

ఇప్పటివరకు జరిగిన దాడుల్లో ఇరాన్‌లో 1,443 మందికి పైగా, ఇజ్రాయెల్‌లో 16 మంది మరణించినట్లు అంచనా. ఈ ఆందోళనకర పరిస్థితుల మధ్య పశ్చిమ ఆసియాలో ఉన్న భారతీయుల భద్రతకు సంబంధించి భారత ప్రధాని నరేంద్ర మోదీ పార్లమెంటులో కీలక ప్రకటన చేశారు. అక్కడ నివసిస్తున్న భారతీయులందరినీ సురక్షితంగా కాపాడుకునేందుకు ప్రభుత్వం అన్ని రకాల చర్యలు తీసుకుంటుందని ఆయన దేశ ప్రజలకు భరోసా ఇచ్చారు.