Donald Trump | చైనా ప్రెసిడెంట్ నన్ను చూడగానే పరుగెత్తుకుంటూ వచ్చి గట్టిగా హత్తుకుంటాడు : ట్రంప్

Donald Trump | ఓవైపు యుద్ధం ఎప్పుడు ముగుస్తుందా అని ప్రపంచమంతా వేయి కళ్లతో ఎదురు చూస్తోంది. మరోవైపు అమెరికా ప్రెసిడెంట్ డొనాల్డ్ ట్రంప్ తన ట్రుత్ సోషల్‌లో ఏదో ఒకటి పోస్ట్ చేస్తూ ప్రపంచాన్ని భయబ్రాంతులకు గురి చేస్తూనే ఉన్నారు. ఇరాన్‌కు అంత శక్తిమంతమైన, అత్యాధునికమైన ఆయుధాలు ఎక్కడివి. పవర్‌పుల్ డ్రోన్స్ ఎక్కడివి? భారీ లక్ష్యాన్ని ఛేదించే మిస్సైల్స్ ఎక్కడివి? వాళ్లకు చైనా పంపిస్తోంది కాబట్టే.. వాళ్లు యూఎస్‌, ఇజ్రాయెల్‌ని టార్గెట్ చేసుకొని దాడులు చేస్తున్నారంటూ అమెరికా, ఇజ్రాయెల్ ఆరోపణలు చేస్తున్న విషయం తెలిసిందే. ఈనేపథ్యంలో ట్రంప్ తాజాగా ట్రుత్ సోషల్‌లో ఓ పోస్ట్ పెట్టారు.

ఇప్పటి వరకు చైనా.. టెహ్రాన్‌కు భారీగా ఆయుధాలను సప్లై చేసింది కానీ.. ఇక నుంచి చేయదు. ఇక ఇరాన్‌కు ఆయుధాలు సప్లై చేయమని చైనా అంగీకరించింది. నిజానికి చైనా చాలా సంతోషంగా ఉంది. ఎందుకంటే నేను హార్ముజ్ జలసంధిని శాశ్వతంగా ఓపెన్ చేస్తున్నా. ఇక నుంచి హార్ముజ్ వద్ద ఎలాంటి సమస్య ఉండదు. దాన్ని నేను చైనా కోసం ఓపెన్ చేస్తున్నా. చైనాతో పాటు ప్రపంచ దేశాల కోసం కూడా ఓపెన్ చేస్తున్నా. ఇలాంటి పరిస్థితి మళ్లీ ఎప్పుడూ రాదు. వాళ్లు ఇరాన్‌కి వెపన్స్ పంపించమని చెప్పారు. నేను కొన్ని వారాల్లో చైనా వెళ్తున్నాను. అప్పుడు చైనా ప్రెసిడెంట్ జిన్‌పింగ్ నన్ను చూడగానే నా దగ్గరికి పరుగెత్తుకుంటూ వచ్చి నన్ను గట్టిగా కౌగిలించుకుంటాడు. మేము కలిసి పని చేస్తున్నాం. స్మార్ట్‌గా చేస్తున్నాం. అలా అని చెప్పి మేము అన్నీ మూసుకొని కూర్చోం. మా మీద దాడి చేయడానికి ప్రయత్నిస్తే మాకంటే ఎక్కువగా దాడి చేసేవాళ్లు ఎవ్వరూ లేరు. మేము ఫైటింగ్‌ విషయంలో ఎలా ఉంటామో ప్రపంచానికి తెలుసు.. అంటూ ట్రంప్ ట్రుత్ సోషల్‌లో రాసుకొచ్చారు. ట్రంప్ వ్యాఖ్యలపై చైనా ఎలా స్పందిస్తుందో వేచి చూడాలి మరి.