Strait of Hormuz | హార్ముజ్ జలసంధికి విదేశీ యుద్ధనౌకలు.. ఇరాన్‌కు డొనాల్డ్ ట్రంప్ మరో స్ట్రాంగ్ వార్నింగ్!

Strait of Hormuz | త్రినేత్ర.న్యూస్ : అమెరికా-ఇరాన్ మధ్య జరుగుతున్న యుద్ధంలో కీలక పరిణామం చోటుచేసుకుంది. ప్రపంచ వాణిజ్యానికి, చమురు రవాణాకు అత్యంత కీలకమైన 'హార్ముజ్ జలసంధి' (Strait of Hormuz) ని మూసివేసేందుకు ఇరాన్ చేస్తున్న ప్రయత్నాలను తిప్పికొట్టేందుకు అమెరికా అధ్యక్షుడు డొనాల్డ్ ట్రంప్ సన్నద్ధమయ్యారు. ఈ జలసంధిని సురక్షితంగా ఉంచేందుకు అమెరికాతో పాటు ప్రపంచంలోని ఇతర దేశాలు కూడా తమ యుద్ధనౌకలను మోహరించనున్నాయని ఆయన ప్రకటించారు. తన సోషల్ మీడియా ప్లాట్‌ఫామ్ 'ట్రూత్ సోషల్' (Truth Social) వేదికగా ట్రంప్ ఇరాన్‌కు మరోసారి తీవ్ర హెచ్చరికలు జారీ చేశారు.

Strait of Hormuz | 'ఇరాన్ సైనిక శక్తిని 100 శాతం ధ్వంసం చేశాం'

ఈ సందర్భంగా డొనాల్డ్ ట్రంప్ సంచలన వ్యాఖ్యలు చేశారు. "మేము ఇప్పటికే ఇరాన్ సైనిక సామర్థ్యాన్ని 100 శాతం ధ్వంసం చేశాం. వాళ్లు ఎంతలా ఓడిపోయినప్పటికీ, ఈ జలమార్గంలో డ్రోన్లు పంపడం, సముద్రంలో మందుపాతరలు (మైన్స్) పేర్చడం లేదా దగ్గరి రేంజ్ క్షిపణులను ప్రయోగించడం లాంటివి చేయడం వారికి చాలా సులువు. అలాంటి చిన్నపాటి ముప్పులు ఇంకా పొంచి ఉన్నాయి," అని ఆయన తన పోస్ట్‌లో పేర్కొన్నారు.

ఆ దేశాలు కూడా కలిసి రావాలి

హార్ముజ్ జలసంధి మూసివేత వల్ల ప్రభావితమవుతున్న దేశాలు అమెరికాతో కలిసి రావాలని ట్రంప్ పిలుపునిచ్చారు. "చైనా, ఫ్రాన్స్, జపాన్, దక్షిణ కొరియా, బ్రిటన్ తదితర దేశాలు కూడా ఈ జలసంధి ప్రాంతానికి తమ నౌకలను పంపుతాయని ఆశిస్తున్నాను. పూర్తిగా నాశనమైన ఒక దేశం (ఇరాన్) వల్ల ఈ జలసంధికి ఇకపై ఎలాంటి ముప్పు ఉండకూడదు," అని ఆయన స్పష్టం చేశారు.

ఇరాన్ తీరప్రాంతంపై దాడులు కొనసాగుతాయి

సముద్ర మార్గంలో వాణిజ్య నౌకలకు భద్రత కల్పించడంతో పాటు, అవసరమైతే ఇరాన్ తీరప్రాంతంపై బాంబు దాడులు కొనసాగిస్తామని అమెరికా అధ్యక్షుడు హెచ్చరించారు. "అమెరికా బలగాలు ఇరాన్ తీర ప్రాంతంపై బాంబులతో విరుచుకుపడతాయి. నీళ్లలో కనిపించే ఇరాన్ పడవలు, నౌకలను ఎప్పటికప్పుడు కాల్చివేస్తూనే ఉంటాం. ఏదో ఒక రకంగా, అతి త్వరలోనే హార్ముజ్ జలసంధిని పూర్తిగా తెరిపిస్తాం. దానిని సురక్షితంగా, స్వేచ్ఛగా మారుస్తాం!" అని ట్రంప్ తన పోస్ట్‌లో కుండబద్దలు కొట్టారు.

ప్రపంచంలోనే అత్యంత ముఖ్యమైన సముద్ర మార్గాల్లో ఒకటైన హార్ముజ్ జలసంధిని రక్షించడం ద్వారా గ్లోబల్ షిప్పింగ్‌కు ఎలాంటి విఘాతం కలగకుండా చూడాలన్నదే తమ లక్ష్యమని ట్రంప్ స్పష్టం చేశారు. ఈ పరిణామాలతో మధ్యప్రాచ్యంలో టెన్షన్ మరింత పెరిగింది.