The Epstein Files | ఎప్‌స్టీన్ ఫైల్స్ సునామీ.. వెబ్‌సైట్‌లో 30 లక్షల పత్రాల బహిర్గతం.. ఎలాన్ మస్క్ నుంచి బిల్ గేట్స్ వరకు.. అందరి గుట్టు రట్టు

The Epstein Files | జెఫ్రీ ఎప్‌స్టీన్.. ఈ పేరు వింటేనే ప్రపంచ అగ్రరాజ్యాలలోని సంపన్నులు, రాజకీయ నేతలు భయపడే పరిస్థితి నెలకొంది. ఇటీవల అమెరికా డిపార్ట్‌మెంట్ ఆఫ్ జస్టిస్ (DOJ) చట్టబద్ధంగా విడుదల చేసిన 30.5 లక్షల పేజీల డాక్యుమెంట్లు, 1.8 లక్షల ఫోటోలు, 2,000 కు పైగా వీడియోలు ఇప్పుడు jmail.world ద్వారా అందరికీ అందుబాటులోకి వచ్చాయి. ఈ పత్రాలు వెలుగులోకి రావడంతో పదేళ్ల క్రితం జరిగిన నేరాలు, తెరవెనుక సాగిన చీకటి ఒప్పందాలు బయటపడుతున్నాయి. నిన్నటి వరకు గుప్తంగా ఉన్న సంచలన నిజాలు ఇప్పుడు ప్రపంచం ముందు బహిర్గతమవడంతో ఈ పరిణామం ప్రపంచవ్యాప్తంగా రాజకీయ, వ్యాపార, రాజకుటుంబ వర్గాల్లో పెను ప్రకంపనలు సృష్టిస్తోంది. ఈ మొత్తం సమాచారాన్ని jmail.world అనే వెబ్‌సైట్‌లో పబ్లిక్‌గా ఉంచడం వల్ల, సామాన్యుల నుంచి నిపుణుల వరకు ప్రతి ఒక్కరూ వీటిని పరిశీలించే అవకాశం కలిగింది. దీనివల్ల ఇన్నాళ్లూ అధికార బలంతో దాచిన నిజాలు ఒక్కొక్కటిగా బయటకు వస్తున్నాయి.

పబ్లిక్ డొమైన్‌లోకి చేరిన సంచలన నిజాలు

సాధారణంగా ఇలాంటి కీలక దస్త్రాలు ప్రభుత్వ కార్యాలయాలకే పరిమితం అవుతాయి. కానీ, పారదర్శకతను కోరుతూ ఈ ఫైల్స్ అన్నింటినీ ఆన్‌లైన్ వెబ్‌సైట్‌లో పొందుపరచడంతో, ప్రపంచవ్యాప్తంగా ఉన్న జర్నలిస్టులు, పరిశోధకులు వీటిని లోతుగా విశ్లేషిస్తున్నారు. ఇందులో కేవలం నేరాలకు సంబంధించిన అంశాలే కాకుండా, ఎప్‌స్టీన్‌తో సన్నిహితంగా ఉన్న ప్రముఖుల ఈమెయిల్ సంభాషణలు, ప్రైవేట్ డైరీలు కూడా ఉండటం గమనార్హం.

ఎలాన్ మస్క్ పేరుతో సంచలనం

ఈ కొత్తగా విడుదలైన ఫైల్స్‌లో టెస్లా అధినేత ఎలాన్ మస్క్ (Elon Musk) పేరు ఉండటం ఇప్పుడు హాట్ టాపిక్‌గా మారింది. ముఖ్యంగా ఎప్‌స్టీన్‌తో మస్క్‌కు ఉన్న పరిచయాలు, విమాన ప్రయాణాల వివరాలు (Flight Logs) ఈ పత్రాల్లో ఉన్నట్లు సమాచారం. అయితే, దీనిపై మస్క్ గతంలోనే స్పందిస్తూ.. తాను ఎప్పుడూ ఎప్‌స్టీన్‌‌ను కలవలేదని, తన పేరును అనవసరంగా ఈ కేసులోకి లాగుతున్నారని ఆగ్రహం వ్యక్తం చేశారు. కాకపోతే, తాజా డాక్యుమెంట్లలోని వివరాలు ఆయన వివరణకు భిన్నంగా ఉన్నాయా అనే కోణంలో నెటిజన్లు ఆన్‌లైన్‌లో చర్చలు జరుపుతున్నారు.

రెస్పాండ్ అవుతున్న ప్రముఖులు - బయటపడుతున్న సంబంధాలు

ఈ ఫైల్స్‌లో తమ పేర్లు లేదా ఫోటోలు ఉన్నట్లు గుర్తించిన పలువురు ప్రముఖులు ఇప్పుడు ఒక్కొక్కరుగా స్పందిస్తున్నారు.

ప్రిన్స్ ఆండ్రూ (Prince Andrew): ఎప్‌స్టీన్‌తో అత్యంత సన్నిహిత సంబంధాలు కలిగినట్లు పత్రాలు స్పష్టం చేస్తున్నాయి. తాజాగా బయటకు వచ్చిన కొన్ని ఫోటోల్లో ఆయన ఒక గుర్తుతెలియని మహిళతో ఉన్న దృశ్యాలు రాజకుటుంబానికి పెద్ద తలవంపుగా మారాయి.

బిల్ గేట్స్ (Bill Gates): ఎప్‌స్టీన్‌తో తాను గడిపిన ప్రతి నిమిషానికి చింతిస్తున్నానని బిల్ గేట్స్ తాజాగా పేర్కొన్నారు. రష్యన్ అమ్మాయిల విషయంలో ఎప్‌స్టీన్ చేసిన ఆరోపణలను ఆయన తీవ్రంగా ఖండించారు.

పీటర్ మాండెల్సన్ (Peter Mandelson): బ్రిటన్ మాజీ రాయబారి అయిన మాండెల్సన్‌కు సంబంధించిన బ్యాంక్ ఖాతాల్లోకి ఎప్‌స్టీన్ భారీగా నిధులు బదిలీ చేసినట్లు ఆధారాలు లభించాయి. దీనిపై ఇప్పుడు లండన్ పోలీసులు దర్యాప్తు ప్రారంభించారు.

డోనాల్డ్ ట్రంప్ అండ్ క్లింటన్స్: ఈ కేసులో యూఎస్ ప్రస్తుత అధ్యక్షుడు, మాజీ అధ్యక్షుల పేర్లు కూడా ప్రస్తావనకు రావడంతో, యూఎస్ కాంగ్రెస్ దీనిపై విచారణను మరింత వేగవంతం చేసింది.

బాధితుల ఆవేదన

ఈ ఫైల్స్ విడుదలైనప్పటికీ, బాధితులు ఇంకా న్యాయం కోసం పోరాడుతూనే ఉన్నారు. "మాకు కావలసింది కేవలం ఈ పత్రాలు మాత్రమే కాదు, బాధ్యులపై కఠిన చర్యలు తీసుకోవాలి" అని బాధితులు డిమాండ్ చేస్తున్నారు. అయితే, అమెరికా డిపార్ట్‌మెంట్ ఆఫ్ జస్టిస్ పొరపాటున కొంతమంది బాధితుల పేర్లను దాచకుండా విడుదల చేయడంపై సర్వత్రా విమర్శలు వ్యక్తమవుతున్నాయి.

రాబోయే రోజుల్లో ఏం జరగబోతోంది?

ప్రస్తుతం ఆన్‌లైన్‌లో ఉన్న సమాచారం కేవలం మంచుకొండ కొన మాత్రమేనని, రాబోయే రోజుల్లో మరిన్ని సంచలనాలు బయటకు వస్తాయని భావిస్తున్నారు. ఎప్‌స్టీన్ చనిపోయినప్పటికీ, ఆయన సాగించిన ఈ చీకటి సామ్రాజ్యంలో భాగస్వాములైన వారందరికీ ఇప్పుడు చట్టపరమైన చిక్కులు తప్పేలా లేవు.