Andrew | ఎప్‌స్టీన్ ఫైల్స్ కేసులో కీల‌క ప‌రిణామం.. కింగ్ చార్లెస్ సోద‌రుడు ఆండ్రూ అరెస్ట్‌

Andrew | ప్ర‌పంచ రాజ‌కీయాల‌ను కుదిపేస్తోన్న అమెరికా ఫైనాన్షియ‌ర్ జెఫ్రీ ఎప్‌స్టీన్‌ (Jeffrey Epstein) సెక్స్ కుంభ‌కోణం కేసు (Epstein Files)లో తాజాగా కీల‌క ప‌రిణామం చోటు చేసుకుంది. జెఫ్రీతో బ్రిట‌న్ రాజు చార్లెస్ (King Charles) సోద‌రుడు, మాజీ యువ‌రాజు ఆండ్రూ (Andrew)కి సంబంధాలు ఉన్న‌ట్లు ఇటీవ‌లే బ‌య‌ట‌ప‌డిన విష‌యం తెలిసిందే. ఈ వివాదం వేళ ఆండ్రూని తాజాగా పోలీసులు అరెస్ట్ చేసిన‌ట్లు (Andrew Arrested) తెలిసింది. థేమ్స్ వ్యాలీ పోలీసులు ఆండ్రూని అదుపులోకి తీసుకున్న‌ట్లు అంత‌ర్జాతీయ మీడియా నివేదిస్తోంది. ప్ర‌స్తుతం అత‌ను పోలీసుల క‌స్ట‌డీలో ఉన్న‌ట్లు స‌మాచారం.

కాగా, ఎప్‌స్టీన్ సెక్స్ కుంభ‌కోణానికి సంబంధించి విడుద‌లైన ఫైల్స్‌లో అమెరికా అధ్యక్షుడు డొనాల్డ్‌ ట్రంప్‌ (Donald Trump) సహా, మాజీ అధ్యక్షులు, రాజకీయ, వ్యాపార వేత్తలు కూడా ఉన్నట్లు ఇటీవలే వార్తలు వచ్చిన విషయం తెలిసిందే. ఈ కేసు పత్రాల్లో బ్రిటన్‌ యువరాజు ఆండ్రూ (Prince Andrew) పేరు కూడా బయటకొచ్చింది. అమెరికాకు చెందిన వర్జినియా  గిఫ్రే అనే బాధితురాలు ఆండ్రూపై లైంగిక ఆరోపణలు చేసింది.

తనను 2019 లో సెక్స్‌ కోసం బ్రిటన్‌ యువరాజు ఆండ్రూకు అప్పుగా ఫైనాన్షియర్‌ జెఫ్రీ ఎప్‌స్టీన్‌ ఇచ్చాడని తన ఫిర్యాదులో పేర్కొంది. ఫైనాన్షియర్‌ జెఫ్రీ ఎఫ్‌స్టీన్‌ 2019 లో న్యూయార్క్‌ జైలులో ఆత్మహత్య చేసుకున్నాడు. 20 ఏండ్ల క్రితం తాను 18 ఏండ్ల కన్నా తక్కువ వయసులో ఉన్నప్పుడు లండన్‌ సోషియల్‌ జిస్లైన్‌ మాక్స్‌వెల్‌ ఇంట్లో తనను లైంగికంగా వేధించాడని ఆరోపించింది. ఎప్‌స్టీన్‌ ఇంటితోపాటు వర్జిన్‌ దీవుల్లోని లిటిల్‌ సెయింట్‌ జేమ్స్‌ దీవిలో కూడా ఆండ్రూ తనను దుర్భాషలాడారని గిఫ్రే పేర్కొన్నది. అయితే, ఈ ఆరోప‌ణ‌ల‌ను ఆండ్రూ ఎప్ప‌టిక‌ప్పుడు తిర‌స్క‌రిస్తూ వ‌స్తున్నారు. ఆమె ఎవరో కూడా తనకు తెలియదని, ఎప్పుడూ కలువలేదని పేర్కొన్నారు.

ఇక లైంగిక ఆరోప‌ణ‌ల నేప‌థ్యంలో ప్రిన్స్‌ ఆండ్రూ రాయ‌ల్ టైటిల్‌ను కూడా కోల్పోయిన విష‌యం తెలిసిందే. జెఫ్రీ ఎప్‌స్టీన్‌తో సన్నిహిత సంబంధాలు ఉన్నట్లు ఆరోపణలు ఎదుర్కొంటున్న తన తమ్ముడు ప్రిన్స్‌ ఆండ్రూని అన్ని రాచరిక హోదాలు, గౌరవాల నుంచి బ్రిటన్‌ రాజు చార్లెస్‌-3 తప్పించినట్లు బకింగ్‌హామ్‌ ప్యాలెస్ ఇటీవ‌లే ప్రకటించింది. అంతేగాక ఆండ్రూ విండ్సర్‌లోని తన విలాసవంతమైన భవనం రాయల్‌ లాడ్జీని కూడా ఖాళీ చేయాలని కింగ్‌ చార్లెస్‌ ఆదేశించారు. దీంతో ప్ర‌స్తుతం ఆ బంగ్లాను ఆండ్రూ ఖాళీ చేసి వేరేచోటుకు షిఫ్ట్ అయ్యాడు.