Petrol Price | అక్క‌డ లీట‌ర్ పెట్రోల్ రూ.321.. డీజిల్ ధ‌ర ఎంతంటే?

Petrol Price | త్రినేత్ర‌.న్యూస్‌: ఇరాన్‌, ఇజ్రాయెల్ యుద్ధంతో (Iran Israel War) ప్ర‌పంచ వ్యాప్తంగా ఇంధ‌న కొర‌త ఏర్ప‌డింది. హ‌ర్మూజ్ జ‌ల‌సంధిని (Strait of Hormuz) ఇరాన్ మూసివేయ‌డంతో ఎక్క‌డిక‌క్క‌డ చమురు ర‌వాణా నిలిచిపోయింది. దీంతో చాలా దేశాల‌కు గ్యాస్‌, పెట్రోల్‌, డీజీల్ స‌ర‌ఫ‌రా ఆగిపోయింది. ఇప్ప‌టికే తీవ్ర ఆర్థిక స‌మ‌స్య‌ల్లో కూరుకుపోయిన పాకిస్థాన్ (Pakistan) ప‌రిస్థితి.. మూలిగే న‌క్క మీద తాటిపండు ప‌డిన చందంగా మారింది. రోజురోజుకు ఇంధన ధరలు భారీగా పెరుగుతుండ‌టంతో ప్రజలకు మోయ‌లేని భారంగా మారుతున్న‌ది. ఇటీవల లీటరుకు ఒక్క‌సారిగా రూ.55 పెర‌గ‌డంతో పెట్రోల్ ధర (Petrol Price) రూ.321 దాటింది. సాధార‌ణంగా పెట్రోల్ కంటే త‌క్కువ‌గా ఉండే డీజిల్ ధ‌ర దానిని దాటేసింది. ప్ర‌స్తుతం అక్క‌డ లీట‌ర్ డీజిల్ కొనాలంటే రూ.335.86 చెల్లించాల్సిందే. పాక్‌లో ఒకే నెలలో రెండుసార్లు ఇంధ‌న‌ ధరలు పెరగడం గమనార్హం.

కాగా, సాధారణ ప్రజలపై నేరుగా భారం పడకుండా విలాసవంతమైన వాహనాలను ఉపయోగించే వారిని మాత్ర‌మే ల‌క్ష్యంగా చేసుకుని పెట్రో ధ‌ర‌లు పెంచిన‌ట్లు ప్ర‌భుత్వం తెలిపింది. అయితే ఇంధన ధరల పెరుగుదల పరోక్షంగా అన్ని రంగాలపై ప్రభావం చూసే అవకాశం ఉంటుంది.

మ‌రోవైపు శ్రీలంక‌లో కూడా పెట్రో ధ‌ర‌లు పెరిగాయి. ప్ర‌స్తుతం అక్క‌డ ఆక్టేన్ 92 పెట్రోల్ ధ‌ర లీట‌ర్ రూ.398కి చేరింది. అదేవిధంగా ఆక్టేన్ 95 పెట్రోల్ రూ.455గా ఉంది. ఇక డీజిల్ లీట‌ర్ రూ.382, సూప‌ర్ డీజిల్ రూ.443, కిరోసిన్ ధ‌ర లీట‌రుకు రూ.255కు చేరింది.