Israel Elections | నెత‌న్యాహుకి షాక్‌.. అతిపెద్ద కూట‌మిగా అవ‌త‌రించినా.. మెజార్టీకి దూరంగా..

Israel Elections | త్రినేత్ర న్యూస్‌: సార్వ‌త్రిక ఎన్నిక‌ల్లో (Israel Elections) ప్ర‌ధాన‌మంత్రి బెంజ‌మిన్ నెత‌న్యాహుకి (Benjamin Netanyahu) ఇజ్రాయెల్ ప్ర‌జ‌లు షాక్ ఇచ్చారు. ఆయ‌న నేతృత్వంలోని కూట‌మికి ఆధిక్యం క‌ట్ట‌బెట్టిన‌ప్ప‌టికీ.. ప్ర‌భుత్వ ఏర్పాటుకు అవ‌స‌ర‌మైన మెజార్జీ ఇవ్వ‌లేదు. ఏ కూట‌మికీ స్ప‌ష్ట‌మైన మెజార్టీ (majority) రాక‌పోవ‌డంతో హంగ్ త‌ప్ప‌లేదు. ప్ర‌భుత్వ ఏర్పాటులో అర‌బ్ పార్టీలు కింగ్ మేక‌ర్లుగా మారాయి. దీంతో మ‌రోసారి అధికారాన్ని చేజిక్కించుకోవాల‌నుకున్న నెత‌న్యాహుకి ఎదురుదెబ్బ త‌గిలిన‌ట్ల‌యింది.

ఈ నెల 27న జ‌రిగిన పార్ల‌మెంట్ ఎన్నిక‌ల ఓట్ల లెక్కింపు పూర్త‌యింది. కేంద్ర ఎన్నికల క‌మిటీ ప్ర‌క‌టించిన తుది ఫ‌లితాల ప్ర‌కారం నెతన్యాహు నేతృత్వంలోని కూటమికి కేవలం 53 సీట్లు మాత్రమే దక్కాయి. ఇందులో 27 స్థానాల‌తో లికుడ్ పార్టీ (Likud Party) అతిపెద్ద పార్టీగా అవతరించింది. ఆయనకు వ్యతిరేకంగా పోటీ చేసిన ప్రతిపక్ష నేత గాది ఐసెన్‌కోట్ (Gadi Eisenkot) నేతృత్వంలోని కూటమి 48 స్థానాలకే ప‌రిమిత‌మైంది. అరబ్ పార్టీల (Arab Parties) కూటమి రికార్డు స్థాయిలో 19 స్థానాలను గెలుచుకుని తుది ఫలితాన్ని శాసించే స్థాయికి చేరింది. ఇజ్రాయెల్ పార్ల‌మెంటులో (నెస్సెట్) మొత్తం 120 స్థానాలున్నాయి. ప్రభుత్వం ఏర్పాటుకు అవ‌స‌ర‌మైన‌ మ్యాజిక్ ఫిగర్ అయిన 61 సీట్లు. 53 స్థానాల్లో గెలుపొందిన నెత‌న్యాహు కూట‌మి మ‌రో 8 స్థానాల దూరంలో నిలిచింది. దీంతో సంకీర్ణ ప్ర‌భుత్వ ఏర్పాటు త‌ప్పనిస‌రి అయింది.

అయితే అర‌బ్ స్థానాల‌పై విదేశీ జోక్యం, అక్ర‌మాలు జ‌రిగాయంటూ లిక్‌డ్ పార్టీ ఆరోప‌ణ‌లు గుప్పించిన విష‌యం తెలిసిందే. ఈ నేప‌థ్యంలో నెత‌న్యాహు కూట‌మితో అర‌బ్ పార్టీలు (Arab-led Parties) జ‌ట్టు క‌డ‌తాయా అనే సందేహాలు వ్య‌క్త‌మ‌వుతున్నాయి. మ‌రోవైపు నెత‌న్యాహుని అధికారినికి దూరం చేయాల‌నే వ్యూహంతో విప‌క్ష కూట‌మి పావులు క‌దుపుతున్న‌ది. అర‌బ్ పార్టీల‌తో క‌లిసి ప్ర‌భుత్వ ఏర్పాటు దిశ‌గా చ‌ర్చ‌లు జ‌రుపుతున్న‌ది. అయితే ఏ కూట‌మీ ప్ర‌భుత్వాన్ని ఏర్పాటు చేయ‌ని ప‌క్షంలో మ‌రోసారి ఎన్నిక‌ల‌కు వెళ్లాల్సి వ‌స్తుంది. కాగా, దేశంలో కొత్త ప్ర‌భుత్వం కొలువుదీరే వ‌ర‌కు నెత‌న్యాహు ప్ర‌ధానిగా కొన‌సాగ‌నున్నారు.