Middle East Crisis | గల్ఫ్‌లో మండుతున్న యుద్ధాగ్ని.. కోటి మంది భారతీయుల భద్రతపై క్వశ్చన్ మార్క్?

రూ.3.7 లక్షల కోట్ల ఆర్థిక వ్యవస్థపై ఆందోళన

Middle East Crisis | త్రినేత్ర.న్యూస్ : పశ్చిమాసియా (మిడిల్ ఈస్ట్) మరోసారి యుద్ధ మేఘాలతో కమ్ముకుంది. ఇరాన్ పై ఇజ్రాయెల్, అమెరికా సంయుక్తంగా జరిపిన వైమానిక దాడులు, దానికి ప్రతిగా ఇరాన్ గల్ఫ్ దేశాలలోని అమెరికా మిత్ర దేశాలైన ఖతార్, యూఏఈ (దుబాయ్) లపై దాడులు చేయడంతో పరిస్థితి అత్యంత ఉద్రిక్తంగా మారింది. ఈ పరిణామాలు కేవలం ఆయా దేశాలకే కాకుండా, అక్కడ నివసిస్తున్న లక్షలాది మంది భారతీయుల భద్రతకు, అలాగే భారత ఆర్థిక వ్యవస్థకు తీవ్ర నష్టం కలిగిస్తున్నాయి.

ఏ గల్ఫ్ దేశంలో ఎంత మంది భారతీయులు ఉన్నారు?

గల్ఫ్ కోఆపరేషన్ కౌన్సిల్ దేశాలలో భారతీయుల సంఖ్య చాలా ఎక్కువ. ఉపాధి, విదేశీ మారకద్రవ్యం పరంగా ఇవి మనకు అత్యంత కీలకం. అందుబాటులో ఉన్న గణాంకాల ప్రకారం గల్ఫ్, పశ్చిమాసియాలో భారతీయుల జనాభా ఎంత ఉందంటే?

యునైటెడ్ అరబ్ ఎమిరేట్స్ (UAE): అత్యధికంగా సుమారు 43.26 లక్షల మంది.
సౌదీ అరేబియా: సుమారు 27.47 లక్షల మంది.
కువైట్: సుమారు 10.36 లక్షల మంది.
ఖతార్: సుమారు 8.30 లక్షల మంది.
ఒమన్: సుమారు 6.76 లక్షల మంది.
బహ్రెయిన్: సుమారు 3.17 లక్షల మంది.
ఇజ్రాయెల్: సుమారు 1.23 లక్షల మంది.
ఇరాన్: సుమారు 10765 మంది (వీరిలో సుమారు 3000 మంది విద్యార్థులు).

అంటే మొత్తం గల్ఫ్ దేశాలలో దాదాపు ఒక కోటి మంది భారతీయులు నివసిస్తున్నారు. దుబాయ్, బహ్రెయిన్ వంటి ప్రాంతాలపై దాడులు జరుగుతున్న నేపథ్యంలో వీరందరి భద్రత గాల్లో దీపంగా మారింది.

90 లక్షల మందికి పైగా భారతీయుల భద్రతపై అత్యవసర భేటీ

గల్ఫ్ దేశాల్లో నెలకొన్న ఉద్రిక్తతల నేపథ్యంలో భారత ప్రధాన మంత్రి నరేంద్ర మోదీ అధ్యక్షతన ఇటీవలే క్యాబినెట్ కమిటీ ఆన్ సెక్యూరిటీ అత్యవసరంగా సమావేశమైంది. ఈ మూడు గంటల సుదీర్ఘ సమావేశంలో ప్రధానంగా మిడిల్ ఈస్ట్‌లో నివసిస్తున్న, పనిచేస్తున్న దాదాపు 90 లక్షల నుంచి 1 కోటి మంది భారతీయుల భద్రతపై తీవ్రంగా చర్చించారు. భారత అగ్రశ్రేణి నిర్ణయాత్మక సంస్థ అయిన ఈ కమిటీ, ఈ ప్రాంతాన్ని విస్తృత ఘర్షణ అంచుకు నెట్టిన సైనిక పరిణామాలపై లోతుగా సమీక్షించింది.

భౌతిక భద్రతతో పాటు, భారతీయ పౌరులు ఎదుర్కొంటున్న లాజిస్టికల్ సమస్యలపైనా కమిటీ ఆందోళన వ్యక్తం చేసింది. 11 దేశాల్లో గగనతలం మూసివేయడం వల్ల భారతీయ క్యారియర్‌లకు చెందిన 350 అంతర్జాతీయ విమానాలు రద్దు కావడం, కీలక పరీక్షలు రాయాల్సిన విద్యార్థుల పరిస్థితిపై చర్చ జరిగింది. అలాగే, భారతదేశ ఇంధన భద్రత, వాణిజ్య కార్యకలాపాలకు కీలకమైన హార్ముజ్ జలసంధి వంటి సముద్ర వాణిజ్య మార్గాలకు అంతరాయం కలిగే అవకాశంపైనా అంచనా వేశారు.

రూ.3.7 లక్షల కోట్ల ఆర్థిక ప్రవాహంపై ఎఫెక్ట్ పడుతుందా?

భారతదేశ ఆర్థిక వ్యవస్థలో గల్ఫ్ దేశాల నుంచి వచ్చే విదేశీ మారకద్రవ్యం కీలక పాత్ర పోషిస్తుంది. 2023–24 ఆర్థిక సంవత్సరంలో భారతదేశం మొత్తం 118.7 బిలియన్ డాలర్ల విదేశీ మారక ద్రవ్యాన్ని అందుకుంటే, అందులో గల్ఫ్ దేశాల వాటాయే 37.9 శాతంగా ఉంది. అంటే ఇది దాదాపు 3.7 లక్షల కోట్ల రూపాయలతో సమానం.

ఒక్క యూఏఈ నుంచే 19.2 శాతం (సుమారు 22.8 బిలియన్ డాలర్లు) వస్తోంది. సౌదీ అరేబియా 6.7 శాతం (సుమారు 7.9 బిలియన్ డాలర్లు), కువైట్ 3.9 శాతం (సుమారు 4.6 బిలియన్ డాలర్లు) వాటాను కలిగి ఉన్నాయి.

ప్రపంచ బ్యాంకు నివేదిక ప్రకారం, రెమిటెన్స్‌లను స్వీకరించే దేశాలలో భారత్ మొదటి స్థానంలో ఉంది. అయితే, ప్రస్తుత యుద్ధ వాతావరణం కొనసాగితే ఈ రెమిటెన్స్‌లపై తీవ్ర ప్రభావం పడే అవకాశం ఉందని ఆర్థిక నిపుణులు హెచ్చరిస్తున్నారు.

విమానయాన రంగంపై తీవ్ర ప్రభావం

భారత్-గల్ఫ్ మార్గం అతిపెద్ద అంతర్జాతీయ కారిడార్‌లలో ఒకటి. డైరెక్టరేట్ జనరల్ ఆఫ్ సివిల్ ఏవియేషన్ ప్రకారం, వారానికి వేలాది విమానాలు ఈ మార్గంలో నడుస్తుంటాయి. ఎయిర్ ఇండియా, ఎమిరేట్స్, ఎతిహాద్, ఖతార్ ఎయిర్‌వేస్ తదితర సంస్థలు నిరంతరం సేవలందిస్తున్నాయి. అయితే, తాజా ఉద్రిక్తతల కారణంగా 11 దేశాల్లో ఎయిర్ స్పేస్ మూసివేయడంతో కేవలం ఒక్కరోజులోనే 350 విమానాలు రద్దయ్యాయి. భవిష్యత్తులో ఈ సంఖ్య మరింత పెరిగే ప్రమాదం ఉంది.

రంగంలోకి దిగిన మోదీ.. ఇజ్రాయెల్, యూఏఈ అధినేతలతో ఫోన్ కాల్స్

ఈ సంక్షోభ సమయంలో ప్రధాని మోదీ క్రియాశీలకంగా వ్యవహరిస్తున్నారు. ఆయన ఇజ్రాయెల్ ప్రధాని బెంజమిన్ నెతన్యాహుతో ఫోన్‌లో మాట్లాడి భారతీయ పౌరుల భద్రత తమ ప్రథమ ప్రాధాన్యత అని స్పష్టం చేశారు. "శత్రుత్వాలను వీలైనంత త్వరగా ఆపాలి" అని ఆయన ఎక్స్ వేదికగా కోరారు.

అలాగే, దాడులకు గురైన యూఏఈ అధ్యక్షుడు షేక్ మహ్మద్ బిన్ జాయెద్ అల్ నహ్యాన్‌తోనూ మోదీ మాట్లాడారు. ఆయన్ను 'నా సోదరుడు' అని సంబోధిస్తూ, యూఏఈపై దాడులను తీవ్రంగా ఖండించారు. "ఈ కష్టకాలంలో భారత్ యూఏఈకి అండగా ఉంటుంది. అక్కడ ఉన్న భారతీయులను చూసుకుంటున్నందుకు ధన్యవాదాలు. ప్రాంతీయ శాంతి, భద్రతను మేము సమర్థిస్తున్నాము" అని మోదీ తెలిపారు.

అప్రమత్తమైన భారత ప్రభుత్వం.. హెల్ప్‌లైన్ నంబర్లు

భారత ప్రభుత్వం, విదేశీ వ్యవహారాల మంత్రిత్వ శాఖ అప్రమత్తమయ్యాయి. సౌదీ అరేబియా, యూఏఈ, బహ్రెయిన్, కువైట్, ఖతార్, జోర్డాన్, పాలస్తీనాలోని భారత పౌరులు అప్రమత్తంగా ఉండాలని హైకమిషన్లు హెచ్చరికలు జారీ చేశాయి. అత్యవసర పరిస్థితుల కోసం టెహ్రాన్, టెల్ అవీవ్, అబుదాబి, దుబాయ్ మిషన్లలో 24/7 హెల్ప్‌లైన్ నంబర్లను ప్రారంభించారు. ఒకవేళ పరిస్థితి మరింత దిగజారితే పౌరులను తరలించేందుకు ముందస్తు ప్రణాళికలను కూడా ప్రభుత్వం సిద్ధం చేస్తోంది. ఒకవైపు పౌరులను రక్షించుకుంటూనే, మరోవైపు దౌత్యం ద్వారా ప్రాంతీయ శాంతికి కృషి చేయడంపై న్యూఢిల్లీ దృష్టి సారించింది.