Iran-Israel War | ఇరాన్‌పై ఇజ్రాయెల్ భీకర దాడులు.. డ్రోన్ల వర్షం

Iran-Israel War | త్రినేత్ర.న్యూస్ : అమెరికా, ఇజ్రాయెల్ సంయుక్త దళాలకు, ఇరాన్‌కు మధ్య జరుగుతున్న యుద్ధం బుధవారం నాటికి 12వ రోజుకు చేరుకుంది. దాడులు, ప్రతిదాడులతో పశ్చిమాసియా అట్టుడుకుతోంది. బుధవారం తెల్లవారుజామున ఇరాన్ రాజధాని టెహ్రాన్‌లోని తూర్పు, పశ్చిమ ప్రాంతాలపై ఇజ్రాయెల్ సరికొత్త దాడులకు దిగింది. దీనికి ప్రతీకారంగా గల్ఫ్ దేశాల్లోని అమెరికా స్థావరాలపై ఇరాన్ క్షిపణులు, డ్రోన్ల వర్షం కురిపించింది.

Iran-Israel War | గల్ఫ్ దేశాల్లో అలర్ట్.. దాడులు చేస్తున్న ఇరాన్

ఖతార్, ఇరాక్ (కుర్దిస్తాన్), యూఏఈ, బహ్రెయిన్, కువైట్‌లలోని అమెరికా స్థావరాలే లక్ష్యంగా ఇరాన్ ఇస్లామిక్ రివల్యూషనరీ గార్డ్ కార్ప్స్ దాడులు చేసింది. ఖతార్ రాజధాని దోహాలో వరుస పేలుళ్లు వినిపించాయి. ఖతార్ ఎయిర్ డిఫెన్స్ సిస్టమ్స్ పలు ఇరాన్ క్షిపణులను అడ్డుకున్నాయి. దేశంలో 'హై అలర్ట్' ప్రకటించిన ప్రభుత్వం, ప్రజలు ఇళ్లకే పరిమితం కావాలని ఆదేశించింది. తాము దాడులను ఎదుర్కొంటున్న ప్రస్తుత తరుణంలో ఇరాన్‌తో మధ్యవర్తిత్వం వహించలేమని ఖతార్ స్పష్టం చేసింది.

దుబాయ్ విమానాశ్రయం వద్ద డ్రోన్లు

దుబాయ్ ఇంటర్నేషనల్ ఎయిర్‌పోర్ట్ సమీపంలో రెండు డ్రోన్లు కూలిపోవడంతో నలుగురు గాయపడ్డారు. వీరిలో ఒక భారతీయుడు ఉన్నారు. అయితే విమాన రాకపోకలకు ఎలాంటి అంతరాయం కలగలేదని అధికారులు తెలిపారు. యూఏఈ కూడా తమ గగనతలంలోకి దూసుకొచ్చిన ఇరాన్ డ్రోన్స్‌ను అడ్డుకున్నట్లు వెల్లడించింది. ఇరాక్ కుర్దిస్తాన్‌లోని ఎర్బిల్ విమానాశ్రయం సమీపంలో ఉన్న అమెరికా స్థావరంపై దాడికి వచ్చిన డ్రోన్‌ను కూల్చివేశారు.

హార్ముజ్ జలసంధిలో ఉద్రిక్తత.. భగ్గుమంటున్న చమురు ధరలు

ఈ దాడులు ఆపకపోతే గల్ఫ్ నుంచి చమురు రవాణాను అడ్డుకుంటామని ఇరాన్ హెచ్చరించింది. హార్ముజ్ జలసంధి గుండా షిప్పింగ్‌ను నిలిపివేస్తే తీవ్ర పరిణామాలు ఉంటాయని అమెరికా అధ్యక్షుడు డొనాల్డ్ ట్రంప్ హెచ్చరించారు. సముద్రంలో మందుపాతరలు వేసే 10 ఇరాన్ నౌకలను అమెరికా దళాలు ధ్వంసం చేశాయని ఆయన ప్రకటించారు. ఇదే జలసంధిలో భారత్‌లోని గుజరాత్ వస్తున్న థాయ్‌లాండ్ కార్గో షిప్‌పై దాడి చేయగా, 20 మంది సిబ్బందిని రక్షించారు.

మరోవైపు గల్ఫ్ సంక్షోభంతో ప్రపంచవ్యాప్తంగా చమురు ధరలు పెరుగుతున్నాయి. దీనిని అరికట్టేందుకు ఇంటర్నేషనల్ ఎనర్జీ ఏజెన్సీ భారీ స్థాయిలో చమురు నిల్వలను విడుదల చేయాలని సిఫార్సు చేయనుంది. జపాన్, ఆస్ట్రియా దేశాలు ఇప్పటికే తమ చమురు నిల్వలను వాడేందుకు సిద్ధమయ్యాయి.

లెబనాన్‌లో 570కి చేరిన మృతులు

ఇజ్రాయెల్ దాడుల కారణంగా లెబనాన్‌లో మరణించిన వారి సంఖ్య 570కి చేరుకోగా, 1444 మంది గాయపడ్డారు. హిజ్బుల్లా స్థావరాలే లక్ష్యంగా దక్షిణ బీరుట్‌లోని దహియే ప్రాంత ప్రజలు వెంటనే ఖాళీ చేసి వెళ్లాలని ఇజ్రాయెల్ డిఫెన్స్ ఫోర్సెస్ తాజా హెచ్చరికలు జారీ చేసింది. ఇరాన్‌పై ఈ యుద్ధానికి ఎలాంటి కాలపరిమితి లేదని ఇజ్రాయెల్ రక్షణ మంత్రి స్పష్టం చేశారు.

ఇరాన్ కొత్త సుప్రీం లీడర్‌కు గాయాలు?

అమెరికా-ఇజ్రాయెల్ దాడుల్లో ఇరాన్ సుప్రీం లీడర్ అయతుల్లా అలీ ఖమేనీ మరణించిన తర్వాత, ఆయన కుమారుడు 56 ఏళ్ల మొజ్తబా ఖమేనీ కొత్త లీడర్‌గా బాధ్యతలు చేపట్టారు. అయితే యుద్ధం ప్రారంభంలో ఆయన స్వల్పంగా గాయపడ్డారని, అందుకే ఆయన బహిరంగంగా కనిపించడం లేదని ఇజ్రాయెల్ ఇంటెలిజెన్స్ అంచనా వేస్తోంది.

ఐక్యరాజ్యసమితి తీర్మానం.. అంతర్జాతీయ స్పందన

పొరుగు దేశాలపై ఇరాన్ దాడులను తక్షణమే ఆపాలని కోరుతూ గల్ఫ్ దేశాలు ప్రవేశపెట్టిన తీర్మానంపై ఐరాస భద్రతా మండలి త్వరలో ఓటింగ్ నిర్వహించనుంది. రష్యా అధ్యక్షుడు వ్లాదిమిర్ పుతిన్.. ఇరాన్ అధ్యక్షుడు మసౌద్ పెజెష్కియాన్, యూఏఈ అధ్యక్షుడు మహ్మద్ బిన్ జాయెద్ అల్ నహ్యాన్‌లతో ఫోన్‌లో మాట్లాడి ఉద్రిక్తతలు తగ్గించాలని కోరారు. మధ్యప్రాచ్యంలో దౌత్యపరమైన పరిష్కారానికి ఇరాన్ ప్రస్తుతానికి సిద్ధంగా లేదని జర్మనీ విదేశాంగ మంత్రి వ్యాఖ్యానించారు. ఇరాన్‌లోని మినాబ్ బాలికల పాఠశాలపై జరిగిన వైమానిక దాడిలో 160 మంది బాలికలు మరణించడాన్ని ఇటలీ ప్రధాని జార్జియా మెలోని తీవ్రంగా ఖండించారు.

భారతీయ కార్మికుల ప్రయాణం నిలిపివేత

యుద్ధ ఉద్రిక్తతల నేపథ్యంలో ఇజ్రాయెల్‌లో నిర్మాణ పనుల కోసం ఉత్తరప్రదేశ్ నుంచి వెళ్లాల్సిన సుమారు 300 మంది భారతీయ కార్మికుల ప్రయాణాన్ని మార్చి 21 వరకు భారత ప్రభుత్వం తాత్కాలికంగా నిలిపివేసింది.