China J-35AE Fighter Jet | డ్రాగన్ కొత్త మాస్టర్ ప్లాన్: పాకిస్థాన్ చేతికి చైనా ఫైటర్ జెట్స్!

• ఎగుమతుల (Exports) కోసం ప్రత్యేకంగా 5వ తరం 'J-35AE' స్టీల్త్ ఫైటర్ జెట్‌ను ప్రదర్శించిన చైనా
• తొలి కస్టమర్‌గా పాకిస్థాన్
• సుమారు 40 ఫైటర్ జెట్ల కొనుగోలుకు రంగం సిద్ధం
• ఇప్పటికే చైనాలో ఈ అత్యాధునిక జెట్స్ నడిపేందుకు శిక్షణ తీసుకుంటున్న పాక్ పైలట్లు
• ఇండియా-పాక్ 'ఆపరేషన్ సింధూర్' (Operation Sindoor) జరిగి ఏడాది కావస్తున్న వేళ ఈ ఆయుధ ఒప్పందం అత్యంత ప్రాధాన్యం సంతరించుకుంది

China J-35AE Fighter Jet | త్రినేత్ర.న్యూస్ : భారత్-పాకిస్థాన్ మధ్య భీకర వాయు యుద్ధానికి దారితీసిన 'ఆపరేషన్ సింధూర్' (Operation Sindoor) జరిగి ఏడాది పూర్తవుతున్న తరుణంలో రక్షణ రంగానికి సంబంధించి ఒక కీలక పరిణామం చోటుచేసుకుంది. అంతర్జాతీయ ఆయుధ మార్కెట్లో అమెరికాకు చెందిన అధునాతన F-35 జెట్స్‌కు గట్టి పోటీ ఇవ్వడమే లక్ష్యంగా, చైనా తన సరికొత్త 5వ తరం స్టీల్త్ ఫైటర్ జెట్ 'J-35AE' ను బహిర్గతం చేసింది. ఈ అత్యాధునిక యుద్ధ విమానాలను కొనుగోలు చేసే తొలి దేశంగా పాకిస్థాన్ నిలిచే అవకాశం బలంగా కనిపిస్తోంది.

ఎగుమతుల కోసమే ప్రత్యేకంగా

చైనా అధికారిక మీడియా సంస్థ సీసీటీవీ (CCTV) ప్రసారం చేసిన ఒక ప్రత్యేక కార్యక్రమంలో ఈ 'J-35AE' మోడల్‌ను తొలిసారిగా ప్రదర్శించారు. పీపుల్స్ లిబరేషన్ ఆర్మీ (PLA) లోగోకు బదులుగా చైనా ఏవియేషన్ సంస్థ (AVIC) లోగో ఉండటంతో, ఇది పూర్తిగా ఇతర దేశాలకు ఎగుమతి చేసేందుకే (Export variant) తయారు చేశారని స్పష్టమైంది.

చైనా 'J-35 AE' ప్రత్యేకతలు ఏంటి?

J-20 తర్వాత పూర్తిస్థాయి స్టీల్త్ (Stealth) టెక్నాలజీతో చైనా అభివృద్ధి చేసిన రెండో 5వ తరం ఫైటర్ జెట్ ఇది. ట్విన్-ఇంజిన్, ఇంటర్నల్ వెపన్స్ బే (Internal weapons bay), మోడ్రన్ రాడార్ సిస్టమ్స్ దీని సొంతం. ఇది గరిష్టంగా మ్యాక్ 1.8 (Mach 1.8) వేగంతో దూసుకెళ్లగలదు. శత్రువుల కంటపడకుండా ఒకేసారి పలు టార్గెట్స్‌ను ట్రాక్ చేసి, దాడి చేయగల అడ్వాన్స్‌డ్ AESA రాడార్ ఇందులో ఉంది. అలాగే PL-15 లాంటి సూపర్ సోనిక్ ఎయిర్-టు-ఎయిర్ క్షిపణులను (Missiles) సులభంగా మోసుకెళ్లగలదు.

తొలి కస్టమర్ పాకిస్థానేనా?

అమెరికా తయారు చేసే F-35 కన్నా చాలా తక్కువ ధరకే (ఒక్కో యూనిట్ సుమారు $35-80 మిలియన్లు) ఆయుధాలు ఇస్తామని చైనా ఎప్పట్నుంచో చెబుతోంది. ఎగుమతుల కోసం రూపొందించిన J-35 AE ని కొనుగోలు చేయడానికి డ్రాగన్ దేశానికి అత్యంత ఆప్తుడైన పాకిస్థాన్ తీవ్ర ఆసక్తి చూపిస్తోంది.

సుమారు 40 ఫైటర్ జెట్ల కొనుగోలుకు పాక్ ఎయిర్ ఫోర్స్ (PAF) ఇప్పటికే ఆమోదం తెలిపినట్లు వార్తలు వస్తున్నాయి. అంతేకాకుండా, పాకిస్థాన్ పైలట్లు చైనాలో వీటిపై శిక్షణ కూడా తీసుకుంటున్నారని సమాచారం. 2026 చివరి నాటికి లేదా 2027 లోపు ఈ జెట్స్ పాకిస్థాన్‌కు చేరుకునే అవకాశం ఉందని రక్షణ రంగ నిపుణులు అంచనా వేస్తున్నారు.